1 Nman Dios, binchanxa wi'je; colina wi'je cywitz ke xjal mya nimal teya. Chin tcloma cywitz ke xjal sbul ex mya ba'n, 2 aya Ndiose ex colol wi'je. ¿Tiku'n ma chin el tic'una? ¿Tiku'n cucx tu'n ntene tuj bis tu'nju yajbil wi'je cyu'n ke aj k'oj? 3 Samantza t-spic'umala weye ex tyola axix toc tu'ntzun nẍaklunjtze cyu'n tuj nbeye, ex tu'n nxi k'i'ne twi witz xjan aju etzan tu'na, tuj lugar jatum najliya. 4 Chin poltzune twitz t-altara Nman Dios, ex atzun cxel nk'o'ne chjonte teya tu'n tk'ajk'ajel twi chnab arpa, porque aya Ndiose ex tu'na nim in chin tzalaje. 5 ¿Tiku'n in chin bisune? ¿Tiku'n in tzaj baj nc'u'je? O'cx ti'j Dios ma ke' nc'u'je, ex cucx cjawil nnimsa'ne tbi, porque a Ndiose ex clol weye.
