SALMOS 42

1Ic tza'n te masat oc in txket ti'j tc'u'j in xi' jyolte jun nima, icxtzun weye Nman Dios, in chin jyone ti'ja. 2In txket wanmiye ti'j Dios, aju Dios itz'. ¿Jtoj ba'n npone tu'n toc nque'yine twitz? 3In chin ok'e k'ijl ex konic'an ex minti' in chin wa'ne; atzun ke xjal in cyma'n weye tcyakil k'ij: ¿Jatum ta' Tdiosa? 4Tcyakil jlu in tzaj nna'ne ex in chin bisune tuj wanmiye. In tzaj nna'ne tej nbete cyxol nim xjal cyja' cyxi' tu'n cypon tuj tja Dios ex nejni kine cywitz, in jaw tk'ajk'ajel cywi' tu'n tzalajbil ex in che bitzan in che ic'san nink'ij cycyakil. 5¿Tiku'n in chin bisune? ¿Ex tiku'n in tzaj baj nc'u'je? O'cx ti'j Dios ma ke' nc'u'je, ex cucx cjawil nnimsa'ne tbi, porque a Ndiose ex a clol weye. 6Mer ic tza'n minti'tl wipune. Cyja'tzun nim in chin ximane ti'ja max ttzi nima Jordán ex max twi witz Hermón ex twi witz Mizar. 7Cyuj ke tkan xak ma' cyxe' in binjtz tk'ajk'ajel a' nne'x tilj twi xak in julun wen; aju nintz a' in tzaj tk'o'na, ma chin cyaje tjak' ex ma tz'ex wibaje. 8In tzaj tk'o'n Kman t-xtalbil weye k'ijl, ex konic'an in tzaj tk'o'n jun bitz tu'n nbitzane, ex in chin cubsane twitz Dios aju k'ol nchwinklale. 9In xi nma'ne te Dios aju clol weye: ¿Tiku'n ma chin ele ti'j tc'u'ja? ¿Tiku'n in chin bisune ex in chin yajlanjtze cyu'n ke aj k'oj wi'je? 10Cyuc'ix ke nbakile in che chyo'n tu'n cyxmaybil ke aj k'oj wi'je, ex cucx in cyma'n weye: ¿Jatum ta' Tdiosa? 11¿Tiku'n in chin bisune? ¿Tiku'n in tzaj baj nc'u'je? O'cx ti'j Dios ma ke' nc'u'je, ex cucx cjawil nnimsa'ne tbi, porque a Ndiose ex a clol weye.

will be added

X\