SALMOS 41

1At tzalajbil teju xjal in ximan cyi'j keju minti' cyipun ex cyi'j ke meba; porque oc cletel tu'n Kman tuj tk'ijlalil mya ba'n. 2C'oquel cwentin tu'n Kman, cxel tk'o'n tchwinklal ex ctzalajel twitz tx'otx', ex mlay txi k'o'n tu'n Kman tuj cyk'ab ke aj k'oj ti'j. 3Cxel tk'o'n Kman tipun oc ttzaj yabil ti'j ex cbanixel tyabil tu'n. 4O txi nma'ne cyja': Nman, k'ak'antz tc'u'ja wi'je; chin tk'anan oca, masque o chin binchane il twitza. 5Ke aj k'oj wi'je in cyma'n mya ba'n wi'je, ex in che kanin ti'j: ¿Jtoj ban tcyim ex tu'n mi'n ttzaj na'ntl tbi? Che chi. 6Ka ma che ul que'yil weye, puro ba'n cyyol in cyma'n weye, pero mya ax toc cyu'n; in xi cyc'u'n tuj cyanmi tcyakilju mya ba'n in cyil wi'je, ex octzun cyex ti'jxi in baj cyma'n cye cycyakil xjal. 7Akeju in che el ic'unte weye in baj cychmon cyib ex in che oc ten yolil wi'je; tuj cyximbetz ka tu'n wexwe nlaj in chin yajlanjtze, 8ex in cyma'n: Aju tyabil toc puro plojxix ex minti' k'anbil ti'j; ma cub tz'ak tuj tcoẍbil ex mlay jaw we'tl. 9Ajunlpe aju mejor wamiwoye, aju otok tz'oc ke' nc'u'je ti'j ex o wa'n junx wuc'ile, ma tz'oc aj k'oj wi'je. 10Atzun teya Nman, k'ak'antz tc'u'ja wi'je; chin tonintza tu'n nbanixe, tu'ntzun t-xi nk'o'ne jun chojbil cye ti'j ju in cybincha'n wi'je. 11Atzun c'elel nnic'e ti'j ka in tzalaja wi'je; oc mi'n cycamban ke aj k'oj wi'je. 12Atzun weye, cwentin kine tu'na tu'nju minti' npaltile, ex tu'na chin tele twitza te jumajx. 13Nimanxwit tbi Kman aju Cydios aj Israel ja'lo ex te jumajx. Icxwitju.

will be added

X\