1 Oc ke' nc'u'je ti'j Kman, atzun te cub ten bilte nyole tej ncubsane te. 2 In jatz k'i'ne tu'n tuj jun jul xobajilxix ex in clete tu'n, in colpete tu'n tu'n mi'n nxi'ye tuj soban. Cub tk'o'n nkane twi pic ex e tcyuwsa tu'n nbete. 3 Tzaj t-xnak'tza'n jun ac'aj bitz weye, jun bitz te ak'bil chjonte te Kman Dios. Tej cyque'yinte nimcu xjal, tzaj tchi cyi'j ex oc ke' cyc'u'j ti'j Kman. 4 At nim tzalajbil teju xjal in ke' tc'u'j ti'j Kman ex minti' in jaw tuc'in tib cyuc'il keju jawni cywitz, ex mi cyuc'il keju in che c'ulun te jun dios mya ax toc. 5 Nman Dios, nimcu tbinchbena tbanilxix ma bant, aju t-ximbetza ki'je puro ba'n, mi a'l juntl jacu pon ic tza'n teya. Jacu wajbeye tu'n t-xi nchic'ba'ne tcyakil jlu ex tu'n nyoline cyi'j, pero nok ch'in jacu chic'bet wu'ne, porque nim jlu. 6 Minti' in tzalaja cyi'j ke alumaj in che'x k'o'n te chojbil, ex mi cyi'j ke oyaj ti'j twitz awal; minti' ma tkaniya tu'n cycub patit ke alumaj tibaj altar ex mi jun oyaj tu'n tchjet il. Atzun weye ma jaket nẍcyine tu'na tu'n nbinteye tyola. 7 Cyja'tzun ma txi nma'ne teya: Lu kine lu ic tza'n in tma'n wi'je tuj tu'jil. 8 Nman Dios, in chin tzalaje tu'n tbant tajbila; aju t-xnak'tzbila c'u'n wu'ne tuj wanmiye. 9 Ma txi nchic'ba'ne cye xjal cybuyin cyib nim cyajlal ka aya tz'aklxix. Tzki'n tu'na Nman, minti' ma chin k'ajene tu'n nyoline. 10 Minti' ma chin k'ajene tu'n t-xi nma'ne ka aya tz'aklxix, cucx in chin yoline ti'j ka in japun tyola tu'na ex ti'j ju colbil tu'na; minti' ma cub wewane tc'ujlalila ex ju tyola axix toc cywitz nimcu xjal etzan tu'na. 11 Atzun teya Nman, mi'n cub t-xc'ayina tk'ak'bil tc'u'ja. Cucxwit chin clete tu'na tu'nju tc'ujlalila ex tu'nju tyola axix toc. 12 Nim ma tzic'x wu'ne ex mlayx canun tu'n tbaj nma'ne tcyakil. Axju nbinchbene mya ba'n ma cub tz'ak wibaje; ex bi'x ma che naj tbak' nwitze. Mas nim tajlal nbinchbene mya ba'n ic tza'n ttzmal nwi'ye, ex bi'x ma tzaj baj nc'u'je. 13 Nman, binchama xtalbil, chin tcloma. Nman, tzaj naja onil weye. 14 Bi'xwit naj cynabl tu'n tel cych'ixwi keju in che ximan ti'j tu'n nnaje cyu'n. Bi'xwit che el ok, tu'n tel cych'ixwi keju cyaj tu'n ttzaj mya ba'n wi'je. 15 Bi'xwit che el ok tu'n tel cych'ixwi keju in che xmayin wi'je. 16 Atzun keju in che jyon ti'ja che tzalajxwit nim wen; keju in che tzalaj ti'j colbil tu'na cucxwit txi cyma'n: Nimanxwit tbi Kman. 17 Ic tza'n weye puro meba kine ex in chin bisune, mi'n tzic' nna'le tu'na Nman. Aya onil weye ex clol weye, mi'n cub tyo'na nim, Nman Dios.
