SALMOS 38

1Aya Nman, mi'n chin oc tcawina tuc'il tk'oja ex mi'n cub tk'o'na ncastiwoye tuc'il ttx'u'jila. 2Porque wi'je ma che oc tz'upj ke tplecha; ex ma cub tk'o'na ncastiwoye. 3Tu'n cylaj ke wile ma tzaj tk'oja wi'je, cyja'tzun tcyakil nximlale ma yabt; misicyer jun nbakile ba'n ta'. 4Cyu'n keju mya ba'n o nbinchaye, in nna'ne mer ic tza'n ma chin cyaj mulk'aje tjak' jun a'; ex mer ic tza'n jun iktz ke jlu mlay c'isj wu'ne. 5Tu'n tlaj miban txi nbi'ne, ke ẍil ate'c wi'je niban cyk'ay ex tzu'wtl ke. 6Enter k'ij in chin bete tuj bis, nok moc'l kine ex minti'tl wipune. 7In julin ttzal wi'je tu'n cyak; tcyakil nximlale yab ta'. 8Nim ma chin baj c'ixbisa'ne ex jumajx minti' wipune; in chin ayayane tu'nju nimxix bis at tuj wanmiye. 9Nman, ojtzki'n tu'na tcyakilju in pon nc'u'je ti'j, mya tuj ewaj in xjik'ban nc'u'je twitza. 10In putin wanmiye, niban tbaj wipune, ex niban woque moẍ. 11Ke mejor wamiwoye ex cyuc'ixpe ke xjal at nxilene cyuc'il, najchak ma che tzaj we' wi'je tu'n tlaj nyabile. 12Keju cyaj tu'n ncub cybyo'n, in cub cyk'o'n c'obil wi'je; keju cyaj tu'n cybinchante mya ba'n wi'je, in che yolin tu'n nnaje cyu'n ex cucx in baj cyximan tu'n cysbun. 13Atzun weye nno'c nk'on wibe te chcyin, mer ic tza'n minti' otok nbiye; ex nno'c nk'on wibe ic tza'n men kine, ex minti' in chin k'ajte. 14Ic in tene ic tza'nju xjal minti' in tbi'n ex mlay bant tu'n t-xi tma'n jun yol te tcolbil tib. 15Chin ayole ti'ja Nman Dios, ex chin tzajel ttzak'we'na. 16O'cx in xi nkanine tu'n mi'n cytze'n xjal wi'je, ex tu'n mi'n cytzalaj oc ttzaj mya ba'n wi'je. 17Ax toc, ch'ix nnaje; cucx tten c'ixc'oj wi'je. 18Che jawitz nma'ne ke wile, ma tzaj nbise tu'n tlaj ju mya ba'n o nbinchaye. 19Ke aj k'oj wi'je ma chmet-xix cybaj; nim cybaj keju nok elajx in chin el ic'une cyu'n. 20Tzaj cyk'o'n mya ba'n weye te t-xel ju ba'n o nbinchaye cye; in che k'ojin wi'je tu'n tlaj in nbincha'ne aju ba'n. 21Nman, mi'n chin cyaj tk'o'na njunale. Nman Dios, mi'n tz'el lak'e'ya wi'je. 22Nman Dios ex clol weye, tzaj naja onil weye.

will be added

X\