SALMOS 37

1Mi'n jaw cyakpaja tu'n cylaj ke xjal mya ba'n, mi'n tzaj tx'a'l tc'u'ja cyi'j ke binchal mya ba'n, 2porque jurat naj che najel ic tza'n ch'im in tzkij, ex che bel motx'j ic tza'n c'ul. 3Ke'c tc'u'ja ti'j Kman ex binchama ju ba'n, tz'ank'ina twitz tx'otx' ex cucx nimanxa tyol. 4Tzalajxa ti'j Kman, ex tzul tk'o'n teya aju in pon tc'u'ja ti'j. 5Okxenanx tiba tuj tk'ab Kman, ke'c tc'u'ja ti'j ex tzul onil teya. 6Cbel tyec'un Dios cywitz xjal aju tbinchbena ba'n ex ju ttena tz'aklxix, ic tza'n tkan k'ij oc nno'c chilcuk'ij. 7Txulecuya twitz Kman ex nok ayona ti'j oc tul onil teya. Mi'n tzaj tx'a'l tc'u'ja ti'j ju xjal jurat in jaw ti'n naj tipun, ex mi ti'j ju xjal in cub t-ximan tu'n tbinchante mya ba'n. 8Colinxa k'oj ex colinxa tu'n ttzaj tlo'ch tc'u'ja; mi'n jaw k'ojla, porque tu'ntzun jlu in xi' jun yol tuj tilil. 9Ax toc che elex lajo'n ke xjal mya ba'n, atzun keju k'ukl cyc'u'j ti'j Kman che oquel etzal teju tx'otx'. 10Nok ch'intl taj tu'n cycub naj keju mya ba'n, masque ma tz'oc tena jyolte cye pero mlay che cnet tu'na. 11Atzun ke xjal mans che oquel etzal teju tx'otx', ex puro tuj txubtxaj che tel. 12Aju xjal mya ba'n in cub ten ximal ti'j tza'n tten tu'n tnaj ju xjal ba'n, ex in xi tque'yin ti'j in k'ojl wen. 13Atzunte Kman nok in jaw tze'n ti'j ju xjal mya ba'n, porque ba'n tu'n ka ch'ix tpon or tu'n tnaj. 14Ke binchal mya ba'n in jatz cyi'n cyspad tuj tjayil, ex nne'l cyxkinin tak'al xobl cyplech, tu'n cycub ke xjal meba cyu'n ex ke mans ex keju in che bet tuj tumel. 15Pero tu'nx cyspad cbajel xyu'n cyanmi, ex che bajel tokj ke xobl cyplech. 16Aju ch'in at teju xjal ba'n, mas nim t-xilen twitz cyk'inumabl ke xjal mya ba'n. 17Porque c'elel ti'n Kman cyipumal ke xjal mya ba'n, atzun ke xjal ba'n che bel ttzyu'n tu'n mi cycub tz'ak. 18Keju minti' cypaltil, cwentin ke tu'n Kman, ex aju cyetzbil cucx ctel te jumajx. 19Tuj tk'ijlalil mya ba'n oc ttzaj we'yaj, mlay cub cych'ixwi tu'nju at nim cywa. 20Atzun ke xjal mya ba'n, che bajel tz'e'y ic tza'n tzkij ch'im, ex ke aj k'oj ti'j Kman che bel naj ic tza'n sib. 21Aju xjal mya ba'n in tkanin tch'ex ex minti'tl nna'j tchjo'n, atzunte xjal ba'n in tz'e'y tc'u'j ti'j juntl ex in xi tk'o'n cotzbaj. 22Keju cy'iwla'n tu'n Kman oc cyc'ma' tx'otx' te cyetzbil, atzun keju tcub cysentens tu'n, che najel. 23In xi tyec'un Kman alcye be tu'n t-xi ti'n xjal, ex in cub tk'o'n tuj be ba'n nne'l tuj twitz; 24masque ma tzic' tz'ak, pero in jaw twaban tib, porque tzyu'n tk'ab tu'n Kman. 25Cu'xun kine nej, atzun ja'lo ma chin tijine; pero bajx wile jun xinak ba'n otok cyaj colin, ex bajx wile in che mo'n ke tc'wa'l. 26Tcyakil k'ij in k'ak'an tc'u'j cyi'j xjal ex in xi tk'o'n pwak te cych'ex; ke tc'wa'l in che cub cy'iwla'n tu'n Kman. 27Pa'mil tiba ti'j ju mya ba'n ex binchama ju ba'n, ex cucxtzun ctel tnajbila. 28In tzalaj Kman ki'j ka in kbincha'n ju tz'aklxix, ex minti' in che cyaj tcolin keju wa'lxix tuj cyocslabl, atzun keju mya ba'n, in che naj tu'n ex minti' in cyaj tk'o'n cyiyjil. 29Ke xjal ba'n oc che etzal ti'j ju tx'otx', ex ax che tel tuj te jumajx. 30Aju xjal ba'n at tnabl tyol ex in yolin tuj tumel, 31tcu'x tley Dios tuj tanmi, ex mlayx jaw jilj tkan. 32Aju xjal mya ba'n in xk'ukin ti'j ju xjal ba'n, ex in ximan ti'j tu'n tcub tbyo'n; 33pero mlay txi tk'o'n Kman ambil te tu'n tcub tz'ak xjal ba'n tuj tk'ab, ex oc toc xjal ba'n tuj xjel, mlay tak' Dios ambil tu'n tcub t-sentens. 34Ke'c tc'u'ja ti'j Kman ex nimanxa, tu'ntzun jlu cjawil nimsa'na tu'n ex ctzajel tk'o'n aju tx'otx' te tetzbila, ex oc tila'ya oc cynaj ke xjal mya ba'n. 35O wile ju xjal mya ba'n ex puro jawni, ic tten ic tza'n jun tze' cyja' tch'iy wen ex puro pim t-xak; 36pero tej wic'e juntl maj ya mi a'l, in jyone ti'j pero minti' cnet wu'ne. 37K'o'nca cwent ti'j ju xjal tz'aklxix ex minti' tpaltil; tuj tk'ijlalil tzul ctel xjal lu tuj txubtxaj. 38Atzun keju miban che niman, che najel te jumajx; tuj tk'ijlalil tzul che najel ke mya ba'n. 39In che clet ke xjal tz'aklxix tu'n Kman, a in colin cyi'j tuj tk'ijlalil yajbil. 40A Kman onil cye ex in che colpet tu'n. In che clet tu'n tuj cyk'ab keju mya ba'n, tu'nju atzun k'ukl cyc'u'j ti'j tu'n cyclet.

will be added

X\