1 Nman, cjawil nnimsa'ne tu'nju ma chin clete tu'na, ex tu'nju minti' tak'a ambil tu'n cyxmayin ke aj k'oj wi'je. 2 Nman Dios, xi nkanine onbil teya ex o chin banixe tu'na; 3 Nman, ma chin clete tu'na tuj camic; ma tzul nnable tu'na, ma chin clete tu'na tu'n mi'n ncyime. 4 Akeye in che niman te Kman, che bitzane bitz te, cynimsan jawe tbi xjan. 5 Porque nok ch'in tuj in ten tk'oj, atzunju t-xtalbil cucx in ten tuj tcyakil kank'ibl. Ka ma ko ok' te konic'an, atzun oc kskix ko tzalajel. 6 Tuj nwitze ka segur atine, ex cub nximane cyja': Minti' jun jacu chin cub tz'ake tu'n. 7 Nman, tu'nju t-xtalbila ma chin cub twabana tuj jun lugar segurxix, ex te tibajxi ma tz'el tewan twitza wi'je. Ma naj nnable tu'n xobajil. 8 Ti'ja in jaw tk'ajk'ajel nwi'ye Nman, ex teya in chin cubsane. 9 ¿Ti ctcamba'ya ti'j ka ma chin cyime ex ka ma chinx k'i'ne tuj mukbil? Oc toc nximlale te tx'otx' mlay jaw nnimsa'na, ex mlay chin yoline ti'j ju ttena tz'aklxix. 10 Nman, chin tbintza ex k'ak'antz tc'u'ja wi'je; chin tonintza Nman. 11 Ma tz'el ti'na bis wi'je ex ma tzaj tk'o'na tzalajbil te t-xel; aju nxbalune toc te techal bis, ma tz'el ti'na, ex ma tz'oc tk'o'na jun nxbalune te tzalajbil. 12 Cyja'tzun Nman Dios, mlay chin cub tene tu'n mi nk'ajte; che xel nbitzane ke bitz te nimbil teya ex cucx cxel nk'o'ne chjonte teya.
