SALMOS 27

1Ate Kman spic'un weye ex clol weye. ¿Al etzun chin xobile? Ate Kman clol weye tuj tcyakil xobajil, cyja'tzun mlay chin xobe. 2Ke xjal binchal mya ba'n, akeju aj k'oj wi'je, baj cychmon cyib tu'n cyoc tzokpaj wi'je ex tu'n nnaje cyu'n, pero ax ke e jaw tolj ex e cub tz'ak. 3Masque baj cytxolban cyib txkan soldad wi'je, mlay tzaj baj nc'u'je; masque che oc ten k'ojlel wi'je, pero cucx ckebil nc'u'je. 4O'cx jun in xi nkanine te Kman, junx waje te; atzun tu'n ntene tuj tja Kman tuj tcyakil k'ij te wank'ible, tu'ntzun nc'ulune te ex tu'n ntzalaje ti'j tu'nju tbanilxix te. 5Oc ttzaj mya ba'n wi'je, chin xel ewane tu'n Kman tuj t-xlecumal, chin oquex ewane tu'n tuj tja tu'n nclete; chin jawix k'o'ne tu'n twi' jun pic tu'n nclete. 6Cyja'tzun cbel cyi'j aj k'oj wu'ne, akeju cytxolban cyib wi'je, ex cyja'tzun cxel nk'o'ne chojbil te Kman tuj tja; oc chin sch'ile tu'n tzalajbil; chin bitzale te Kman. 7In chin k'ajte ti'ja Nman, chin tbintza. K'ak'antz tc'u'ja wi'je, chin ttzak'wentza. 8Aju wanmiye in tma'n weye cyja': Tz'oc tililx tu'na tu'n ttena tuc'il Kman. Cyja'tzun nno'c tilil wu'ne tu'n ntene tuc'ila Kman. 9Mi'n tz'el tewan tiba nwitze Nman, mi'n tzaj tk'oja wi'je ex mi'n chin el tic'una; o'cxcu aya onil weye. Mi'n chin cyaj tk'o'na njunalxe ex mi'n chin cyaj tcolina, porque o'cx aya Ndiose ex clol weye. 10Masque ma chin cyaj coline tu'n nmane ex tu'n ntxu'ye, pero aya c'oquel cwentin weye Nman. 11Nman, yec'untza aju tbeya weye, chin t-ẍaklunxa tuj be jikun ti'j, tu'n cylaj ke aj k'oj wi'je. 12Mi'n chinx ttzokpi'na tuj cyk'ab aj k'oj, porque ma che oc ten xjal nic'al yol wi'je, ex o'cx in che ximan ti'j tu'n nc'ixbisanjtze cyu'n. 13Pero ma ke' nc'u'je ti'j tu'n nc'monteye t-xtalbil Kman acux itz'x kine tzalu twitz tx'otx'. 14Ke'c tc'u'ja ti'j Kman, tenx tipuna ex mi'n baj tc'u'ja. Ax toc ke'c tc'u'ja ti'j.

will be added

X\