SALMOS 25

1Nman, in chin cubsane twitza; 2aya Ndiose, ti'ja k'ukl nc'u'je: mi'n tak'a ambil tu'n tcub nch'ixwiye. Mi'nwt chin oque te cytzebl ke aj k'oj wi'je. 3Mi'nxwit cub cych'ixwi keju k'ukl cyc'u'j ti'ja. Cubxwit cych'ixwi keju nok elajx in jaw cyi'n cyib ti'ja. 4Nman, yec'untza ke tbeya weye; ex chin t-ẍaklunxa cyuj ke; 5chin t-ẍaklunxa tu'n tyola axix toc, ex chin t-xnak'tzama, porque aya Ndiose ex clol weye. O'cx ti'ja k'ukl nc'u'je tcyakil k'ij. 6Nman, na'ntza aju tc'ujlalila ex ju t-xtalbila, akeju e tzaj tyec'una keye atxix ojtxi, 7mi'n tzaj tna'na ke wile ex mi ke mya ba'n o nbinchaye tuj ncu'xumale. Nman, chin tna'ntza tu'nju tc'ujlalila ex t-xtalbila ma'xix. 8Ba'nte Kman ex tz'aklxix; cyja'tzun in xi tyec'un be ba'n cye xjal aj il, 9in che'x t-ẍaklu'n ke mans tuj tbe; ex in che'x t-xnak'tza'n ti'j ju tz'aklxix. 10Ate Dios axix toc tyol ex cucx at tc'ujlalil cyi'j keju in japun cyu'n aju yol cyaj bant ti'j tu'n cyuc'il, ex ke tmandamyent. 11Tu'nju ma'xix toclen tbiya Nman, najsama aju wile ma'xix. 12Aju xjal in niman te Kman, cxel yec'un te alcye be tu'n t-xi ti'n: 13oc c'ank'il tuj tzalajbil tu'n, ex cxel tk'o'n cyoclen ke tiyjil tu'n cyetzante aju tx'otx'. 14Nno'c Kman te cyamiw ke xjal in che niman te, ex in xi tma'n cye aju yol cyaj bant ti'j tu'n. 15Cucx in xi nque'yine ti'j Kman, porque ate in clonte weye tuj tcyakil xobajil. 16Chin tque'yintza Nman, ex k'ak'antz tc'u'ja wi'je, porque njunale atine ex in chin bisune. 17Nim in bisun wanmiye; chin tcloma tuj yajbil weye. 18Que'yintza aju nbise ex ju yajbil weye ex najsama ke wile. 19Que'yintza, ma che chmet nim aj k'oj wi'je; nimxix ma chin el cyic'un. 20Chin tcwentin oca ex chin tcloma. Mi'n tak'a ambil tu'n tcub nch'ixwiye, porque ti'ja ma tz'oc nclon wibe. 21Tz'ajbenxwit te colbil weye aju nmodiye ba'n ex tu'nju minti' wile, porque ti'ja ma tz'oc ke' nc'u'je. 22Nman Dios, cloma ke aj Israel tuj tcyakil yajbil cye.

will be added

X\