SALMOS 22

1Nman Dios, Nman Dios, ¿tiku'n ma chin cyaj tcolina? ¿Tiku'n mi'n saja colol wi'je? ¿Tiku'n minti' in tzaj tk'o'na twi'ya wi'je oc in chin ayayane? 2Aya Nman Dios, in chin cubsane twitza k'ijl ex konic'an, ex minti' in tzaj ttzak'we'na, minti' ch'in ojlabl weye. 3Pero aya xjan; k'ukliya tuj tk'ukbila tu'n tcawina ex tu'n tjaw nimsa'na cyu'n aj Israel. 4Ke kxe'chele o ke' cyc'u'j ti'ja ex o che colpet tu'na; 5xi cykanin onbil teya ex e tzokpet tu'na. O ke' cyc'u'j ti'ja ex tu'n jlu minti' cub cych'ixwi. 6Ja'lo mer ic tza'n mya xjal kine, ma chin oque ic tza'n jun tal ẍuk', ma chin el ic'une cyu'n xjal. 7Keju in che que'yin weye in che xmayin wi'je, in xi cyyucun cywi' te jun techal cyxmaybil, 8ex in cyma'n: O ke' tc'u'j ti'j Kman, ¿tiku'ntzun minti' ma tzul colol ti'j ka ax toc at tgan ti'j? Che chi. 9Pero tu'na in ul itz'je ti'j ntxu'ye, ex aya k'ukbante nc'u'je tej ntene ttzi t-xu'c ntxu'ye. 10Tej na'nxtok wul itz'je cwentin kine tu'na, ex axa Ndiosa tej atinxtoke tuj talbil ntxu'ye. 11Mi'n tz'el tpa'n tiba wi'je, porque ch'ix ttzaj jun bis wibaje ex mi a'l jun onil weye. 12Ma baj cytxolban cyib ke aj k'oj wi'je, mer ic tza'n ke tor puro jawni ate' tuj tx'otx' Basán. 13In che tzanun wi'je ic tza'n ke balun puro tx'u'j, ex in xi cyc'abin tuj cytzi' tu'n cytzaj lipan wi'je. 14Ma chin oque ic tza'n a' nne'l kojl, ex ma che k'ulpaj ke nbakile. Aju wanmiye in cub ulj max wuje mer ic tza'n xcab. 15Puro tzkij tuj ntzi'ye, mer ic tza'n xc'o'n, ex bi'x ma tz'oc tlac'on tib wak'e twitz nc'o'ne. Ma chin cu'x tk'o'na tuj cymukbil cyimni. 16At jun c'loj xjal mya ba'n ma baj cytxolban cyib wi'je, ic tza'n tx'yan tu'n cyoc tzokpaj wi'je. Ma baj cyxyu'n ti'j nk'abe ex ti'j nkane. 17K'ancha'lxix ke nbakile. Minti' nne'l cyi'n cywitz aj k'oj wi'je. 18Ma jaw cyi'n swert ti'j nxbalune ex ma baj cysipan cyxolx. 19Pero aya Nman k'ol wipumale, mi'n tz'el lak'e'ya wi'je, tzaj naja onil weye. 20Chin tcloma tu'n mi'n ncyime tu'n spad, ex mi'n txi tk'o'na ambil tu'n ncube cyu'n ke xjal mer tx'yan ke. 21Chin tcloma cye ke xjal mer balun ke, ex chin tcloma cye xjal mer at cycach ic tza'n ke tor. 22Cxel nma'ne tkanil ti'ja cye wermaniye, ex cxel nk'o'ne chjonte teya cyxol keju in cub cybuyin cyib. 23Akeye ba'n che niman te Kman, cyk'onxe chjonte te; cycyakil keye tiyjil Jacob cynimsa'n jawe tbi, che c'ulune cycyakile twitz, akeye tiyjil Israel. 24Minti' in che el tic'un ke xjal meba, ex minti' nnic' tna'l tu'n aju yajbil cye, minti' nne'l tewan twitz cyi'j, ex in che tzaj tbi'n oc in cykanin onbil. 25Oc tcub cybuyin cyib nim xjal etzan tu'na, cxel nk'o'ne chjonte teya cywitz, ti'j ju ma tbinchaya, ex cywitz keju in che niman teya cjapunel wu'ne aju o txi ntziyane teya. 26Ke xjal meba oc che wa'l ocxi tnoj cyc'u'j, cxel cyk'o'n chjonte te Kman keju in che jyon onbil tuc'il, cucxwit che tzalaje. 27Akeye xjal te tcyakil c'loj cyiyjile, ex te tcyakil tnam, ex cycyakil xjal ttxa'npun tx'otx', tzulx Kman ti'j cyc'u'je ex cytzaje tuc'il; che ẍmejecuye twitz. 28Porque ate Kman aju rey ex a in cawin cyibaj ke nasyon. 29Moc'ec cywi'ye ex che c'ulune o'cx te, cycyakile akeye at nim cyeye, ex cycyakil keju che cymel, porque mlay che ank'in cyu'nx cyib. 30Ke wiyjile che ul itz'j te tibajxi che c'ulul te Kman ex mlay che k'ajen tu'n cyyolin ti'j; 31cxel cyma'n cye keju che ul itz'j te tibajxi ti'j tak'unben Kman, ka ate Kman tz'aklxix.

will be added

X\