SALMOS 19

1Ti'j cya'j in tyec'un tib tajwalil Dios, ex ti'j twitz cya'j in yec'unjtz tak'unben tk'ab. 2Aju yol in tma'n jun k'ij, ax in yolin juntl k'ij ti'j; ex aju yol in tma'n jun konic'an, ax in yolin juntl konic'an ti'j, in che yolin ti'j tnabl Dios. 3Masque minti' k'ajk'aj ke yol ex minti' in binjtz jun tk'ajk'ajel wibaj, 4pero aju tkanil in xi' tuj tcyakil twitz tx'otx' ex max in pon baj cyyol ttxa'npun tx'otx', max jatum ta' tnajbil k'ij. 5Ic tten k'ij ic tza'n jun cu'xun at tipun tu'n tkelan, ex ic tza'n jun chmilbaj nne'tz tuj tja c'itzke toclen moje'. 6Nne'tz k'ij tuj jun pac' t-xe cya'j ex in pon baj tuj juntl pac', mi a'l jun jacu tz'el ok twitz tcyakal. 7Aju tley Kman Dios tz'aklxixte porque in tk'o'n ac'aj kipumal; ke tmandamyent axix toc ke ex aju xjal minti' ch'in ba'n tu'n nno'c tnabl cyu'n. 8Ke t-xnak'tzbil Kman Dios tz'aklxix ke ex in cytzalajsa'n kanmi. Ke tmandamyent mya smo'n cyten ex in cyspic'ba'n tuj kwitz. 9Aju tu'n kxob twitz Kman Dios ex tu'n kniman te, minti' tpaltil ex cucx ctel te jumajx. Ke tmandamyent axix toc ke, ex cycyakil tz'aklxix. 10Mas tbanilxix ke twitz k'an pwak ex mas chi' ke twitz ta'l cab. 11In cyk'o'n nnable, akine tmajena; ka ma che japun wu'ne, nim ba'n in cybincha'n weye. 12┬┐Alcye jun jacu tz'el tnic' ti'j tpaltil? Nman, najsama aju npaltile minti' nne'l nnic'e ti'j. 13Chin tcwentin oca tu'n mi tjaw nniman wibe, mi'n tak'a ambil tu'n tcub wi'je tu'n nnimbil wibe. Cyja'tzun chin oquele te tz'aklxix ex mlay chin ic'e tibaj tleya. 14Ba'nwt tz'ela nyole ex nximbetze tuj twitza, aya Nman clol weye ex tzokpil weye.

will be added

X\