SALMOS 18

1Nman, aya k'ol wipumale; at nc'u'je ti'ja. 2Aya colol wi'je, aya jun lugar te colbil wibe ex tzokpilte weye. Aya Ndiose ic ttena te weye ic tza'n jun pic in chin clete tu'n, ex ic tza'n jun makbil in ajben tuj k'oj, ex tu'nju nim tipumala in chin clete, ic ttena ic tza'n jun ewbil wibe ma' tjax. 3Aya Nman, ba'n tu'n tjaw nimset tbiya; oc in chin txocone ti'ja in chin clete tu'na cywitz aj k'oj wi'je. 4Tuj nwitze mer ic tza'n otok baj nscun wibe tuj jun sakbak tu'n camic; o nna'ye t-xobil tej cyja'tok nnaje tu'n tipumal txkan a'. 5Mer ic tza'n otok chin cub xwacune tu'n sakbak tu'n ncyime; ex mer ic tza'n otok chin tzyete tu'n tc'obil camic. 6Tej in chin bisuntoke in oc tene txcolte Kman, xi nkanine onbil te Ndiose, ex in tzaj bi'ne tu'n max tuj tja; pon tk'ajk'ajel nwi'ye tuj t-ẍcyin. 7Tzajtzun jun nintz cyaknajnab ex e tzaj yucch cyk'ukbil ke witz; bi'x e baj yucch tu'n ttx'u'jil Kman. 8Etz sib tuj ttxa'n, atzun tuj ttzi' etz jun k'ak' in tz'e'y nimcu tu'n; ax icx nne'tz xk'a'l tuj ttzi' in c'ant wen. 9Jaket twitz cya'j tu'n ex cu'tztzun. Attok txkan k'ek muj tjak' tkan. 10Jax ten tibaj jun querubín ex tzaj lipan; tibaj cyk'ik' tzaj lipan. 11Cub tk'o'n k'ek muj nojni tu'n a' ex kloljxix que'yin; ic tenba tu'n ic tza'n jun xbalun te makbil, ex atzun ocx tewan tib tuj. 12Etz jun spic'un twitz in koptz'aj wen; tuj muj tzaj chitj sakbakun ex xk'a'l in c'ant. 13Ate Kman aju ma'xix toclen, max tuj cya'j o binjtz tk'ajk'ajel twi' in julin wen tuc'il sakbakun ex xk'a'l in c'ant. 14E tzaj t-xo'n ke tplech tuc'ix tkan k'ancyok, atzun ke aj k'oj ti'j bi'x e je'l ok ex bi'x baj cysputun cyib. 15Bi'x k'ancha'lin aju t-xe'pun mar, icx ke tk'ukbil tx'otx' tu'nju tk'ajk'ajel twi' Kman puro cyuw wen, ex tu'nju cyuwxix tzaj t-xupin. 16Max tuj cya'j tzaj tnukpi'n tk'ab Dios wi'je, ex tu'n tk'ab in jatze tuj nintz mar. 17O chin clete tu'n tuj cyk'ab aj k'oj wi'je, akeju in el ic'une cyu'n ex at mas cyipun nwitze. 18E oc tzokpaj wi'je tej otok tzaj jun yajbil wi'je, pero ate Kman tzaj oninte weye: 19In tzokpete tu'n tu'n ntene tuj jun chk'ajlaj ma' twitz; in clete tu'n tu'nju at tc'ujlalil wi'je. 20Ma tzaj k'o'n chojbil weye tu'n Kman, tu'nju ba'n nbinchbene twitz, 21ex tu'nju cucx in bete tuj tbe ex mi jun maj ma tz'el npa'n wibe ti'j Dios. 22Cucx in chin ximane cyi'j ke tmandamyent; mi jun maj ma tz'el wic'une ke tley. 23Ma chin tene twitz minti' npaltile; ma tz'el npa'n wibe ti'j mya ba'n. 24Ma tzaj tk'o'n Kman chojbil weye tu'nju minti' npaltile twitz. 25Aya Nman, tz'aklxixa tuc'il ju xjal tz'aklxix, ex puro ba'na tuc'il ju xjal ba'n tmod, 26puro ba'na tuc'il ju xjal sak tuj tanmi, pero ax cyuwa ti'j ju xjal elni twitz tu'n t-sbun. 27In che tclo'na ke xjal mans, atzun keju in jaw cyniman cyib, in che oc tk'o'na te minti' cyajben. 28Aya Nman in tzaj k'onte spic'un weye, aya Ndiose, tu'na in tzaj tk'o'na spic'un tuj klolj jatum atine. 29Tu'nju onin kine tu'na, chin oquel tzokpaje cyi'j ke aj k'oj wi'je, ex chin oquexe twi muro toc ti'jele cytanmi. 30Aju tbe Dios puro tz'aklxix; aju yol in tzaj ttziyan ba'n tu'n tke' kc'u'j ti'j; ate Dios colol cye cycyakil keju in ke' cyc'u'j ti'j. 31¿Atpe juntl Dios? Minti'. O'cx a Dios jacu ko clet tu'n. 32Ate Dios in tzaj k'onte wipune, a onil weye tu'n ntene minti' npaltile, 33a in tzaj k'onte tipumal nkane tu'n tbant nkelane ic tza'n jun masat, ex a in jax k'inte weye twi' jun lugar ma'xix tjaw, jatum tu'n ntene segurxix, 34a in tzaj k'onte xnak'tzbil weye tza'n tten tu'n tbant nk'ojine, ex a in tzaj k'onte wipune tu'n tli'pj ti'j xobl plech wu'ne, aju k'an c'uxbil ttx'otx'il. 35Aya colol wi'je ex in chin clete tu'na, tzyu'n kine tu'n tbank'aba; tu'nju t-xtalbila puro ba'n ma tz'el weye. 36Mya cyuw ma tz'e'la nbeye tu'na, ex bajx che ex jilj ke nkane. 37Inx lpe'ye cyi'j aj k'oj wi'je, ex e pon cnet ke wu'ne, maxi in ajtze tejxi cycub baj wu'ne. 38Cub cyi'j wu'ne ex e cub tz'ak twitz tx'otx'. Minti'tl e jaw we'. E cub tz'ak ke t-xe nkane. 39Aya tzaj k'onte wipumale tuj k'oj; o tbinchaya tu'n cycub moc'e' ke xjal nwitze, akeju aj k'oj wi'je, 40ex nwitze e je'l ok ke aj k'oj wi'je; cyja'tzun e naj wu'ne akeju in che el ic'un weye. 41E kanin onbil, pero misicyer jun onin cyi'j; e cubsan twitz Kman, pero minti' e tzaj ttzak'we'n. 42Bi'x e naj wu'ne mer ic tza'n kuk in xi ti'n cyk'ik'. E baj nwabane mer ic tza'n tx'otx' tuj cay. 43Ma chin clete tu'na te jun tnam miban bin, ma chin oc tk'o'na te nejenel cyibaj ke nasyon, ke xjal minti' ojtzki'n wu'ne in che ajben weye. 44Oc in chin yoline cye in chinx cyniman, ex in chin cub bi'ne cyu'n ke stranjer xjal. 45Ke stranjer xjal in tzaj tchi cyi'j, ex in che lu'lun oc cyetz tuj lugar te cycolbil cyib. 46Itz' te Kman. Nimanxwit aju colol wi'je. Jawxwit nimsa'n Dios aju clol weye. 47Atzunju Dios ma k'onte t-xel cyi'j ke aj k'oj wi'je, ex ma che cyaj tk'o'n ke tnam tjak' ncawbile. 48Ate Kman ma clon weye cye ke aj k'oj wi'je, akeju jaw cyi'n cyib tu'n cyk'ojin wi'je. Aya Nman, ma chin clete tu'na tuj cyk'ab ke xjal jawni cywitz tu'n cyk'ojin. 49Cyja'tzun cjawil nnimsa'ne tbiya cyxol ke nasyon, ex chin bitzale tu'n tjaw nimset tbiya. 50In tk'o'na tipumal ju rey sc'o'maj tu'na tu'n tcub cyi'j ke aj k'oj tu'n; cucx in tbincha'na xtalbil te David ex cye ke tiyjil.

will be added

X\