SALMOS 148

1Nimanxwit tbi Kman. Nimanxwit tbi Kman max tuj cya'j. Akeye najl tuj cya'j, cynimsa'n jawe tbi Kman. 2Akeye t-anjel Kman, cynimsa'n jawe tbi cycyakile. Akeye nimxix cyajlale ate'ye tuj cya'j, cynimsa'n jawe tbi cycyakile. 3Aya k'ij ex aya xjaw, cynimsa'n jawe tbi. Akeye che'w in che koptz'aj, cynimsa'n jawe tbi. 4Aya cya'j ma' tjaw, nimsa'n jawa tbi, aya a' at twitz cya'j, nimsa'n jawa tbi. 5E tjaw nimset tbi Kman porque a o k'mante tu'n cybant cycyakil jlu; 6e cub tk'o'n tu'n cyten tuj cylugar te jumajx, cub tk'o'n jun tley cyibaj ex mlay che ic' tibaj. 7Ax icx cyeye akeye ate' tuj tcyakil twitz tx'otx', cynimsa'n jawe tbi Kman: Akeye nmak txcup ate' tuj mar ex aya mar ma' t-xe', 8ax icx teya tkan k'ancyok ex sakbakun, aya ttxa che'w ex muj, ex aya cyk'ik' nim tipuna ex in japun tu'na aju in tzaj k'ma'n teya; 9akeye nmak witz ex ke tal witz, akeye tze' wi'ten ex ke tze' ba'n tlo'njtz cywitz, 10akeye alumaj ex ke txcup tuj c'ul, ke chyu'j, ex ke jil in xi cyjaku'n cyc'u'j twitz tx'otx'; 11akeye rey twitz tx'otx' ex cycyakil tnam; cycyakil ke nejenel ex ke cawil twitz tx'otx', 12ke cu'xun ex ke k'apoj; ke tij xjal ex ke c'wa'l. 13Cycyakile cynimsa'n jawe tbi Kman, porque o'cx te ma' t-xilen. Mas ma' tajwalil twitz tajwalil cya'j ex tajwalil tx'otx'. 14Ma txi tk'o'n cyipumal ke xjal etzan tu'n. E tjaw nimsa'n tbi cyu'n ke ocslal ti'j, akeju aj Israel nikayin ate' ttxlaj ex etzan ke tu'n. Nimanxwit tbi Kman.

will be added

X\