SALMOS 144

1Nimanxwit tbi Kman aju colol wi'je. Ate in k'onte xnak'tzbil weye ex in bant ntene tu'n tu'ntzun nk'ojine oc toc k'oj; 2at tc'ujlalil wi'je ex ate colbil wibe, ate wewbil wibe mas ma' tjax ex tzokpilte weye; ic tten te weye ic tza'n jun makbil in ajben tuj k'oj ex tuc'il in pon nclon wibe; ate in cub k'onte cye ke tnam tjak' ncawbile. 3Nman Dios, ¿ti cyxilen ke xjal tu'nju cucx in ximana cyi'j? ¿Ti cyxilen ke xjal tu'nju c'ujla'n ke tu'na? 4Ic tten xjal ic tza'n ch'in cyk'ik' in tzaj ex jurat nne'x, ex ic tten tchwinklal ic tza'n jun xlecun in cub naj. 5Nman, jako'n ela twitz cya'j ex tcu'tza; macon oca ke witz tu'ntzun tetz sib cyuj; 6samantza tkan k'ancyok tu'n cybaj sputj ke aj k'oj ti'ja, xo'nxa ke tplecha cyi'j tu'n cyel ok. 7Nukpintza tk'aba max jawni ex chin tcloma tuj nimxix xobajil; chin tcloma tuj cyk'ab xjal cyuj mastl nasyon, 8ex cywitz keju in cyma'n nic'aj yol ex in jaw cyyec'un cybank'ab twitz cya'j te cyuwsabl te jun yol mya ax toc. 9Nman Dios, cxel nbitzane jun ac'aj bitz te teya; che xel nbitzane ke bitz te teya tuc'il quitar. 10Tu'na in xi tk'o'na cambabl cye ke rey; tu'na o chin clete akine David aju tmajena, minti' ma chin cube tu'n spad; 11co'pin ela kine ex chin tcloma tuj cyk'ab xjal cyuj mastl nasyon, ex cywitz keju in cyma'n nic'aj yol ex in jaw cyyec'un cybank'ab twitz cya'j te cyuwsabl te jun yol mya ax toc. 12Che ch'iyxwit ke kcy'ajal ic tza'n ke tze', ex ke kme'jel tbanilxixwit che que'yin ic tza'n ke tkan ja c'ochimaj cyi'j ate' tuj tja rey. 13Che nojxwit ke ktx'utx' tu'n tcyakil twitz awal ba'n tnic'benjtz. Che chmet-xwit ke kẍne'l tuj milin cybet, ela'wt mil cybaj che ten cyuj kcojbil. 14Atwit cyipun kwacẍ tu'n cyjawon iktz, mi'nwt che oc tzokpaj xjal ki'j, ex mi'nwt ko el ok cywitz. Ex mi'nwt ko jaw sch'in tu'n xobajil cyuj cay. 15At tzalajbil cye xjal at tcyakil jlu cye. At tzalajbil cye xjal a Kman toc te Cydios.

will be added

X\