1 Nman, ti'ja in chin txocone: jurat ttzaj naja, chin tbintza oc ncubsane twitza. 2 Icwit tz'e'la nna'j Diose ic tza'n storac in cub patit twitza, ex oc cyjaw nyec'une ke nk'abe twitz cya'j tu'n nna'ne Dios, icwit tz'e'la ic tza'n jun oyaj in xi k'o'n teya te kale. 3 Nman, k'onca jun xk'ukil te ntzi'ye tu'ntzun mi'n tetz jun yol mya ba'n tuj ntzi'ye. 4 Mi'n tak'a ambil tu'n nximane ti'j mya ba'n, mi tu'n nbinchanteye mya ba'n junx cyuc'il ke binchal mya ba'n, ex tu'n mi'n ntene tuj nin wa'n in bant cyu'n. 5 Ka ma cub tk'o'n xjal tz'aklxix ncastiwoye jun xtalbil oc tbincha' weye, ex mer ic tza'n perjum te weye ka ma chin oc tmayo'n. Mlay tz'el wic'une jlu; tu'n cylaj keju yajbil lu cucx oc chin na'le Dios. 6 Ke nejenel cye ke xjal mya ba'n che elex xo'n ttxa'n xak, ex c'elel cynic' ti'j axix toc nyole. 7 Cbajel sputj cybakil tuj cynajbil cyimni, ic tza'n in baj ch'oquit tx'otx'. 8 Nman Dios, o'cx ti'ja k'ukl nc'u'je. Ti'ja nno'c nclon wibe; mi'n chin cyaj tcolina. 9 Chin tcloma tuj c'obil ma cub cyk'o'n wi'je; chin tcloma tuj c'obil cyu'n ke xjal binchal mya ba'n. 10 E cycub tz'ak ke xjal mya ba'n tuj cyex cyc'obil, atzun weye tu'n nclete.
