SALMOS 140

1Nman, chin tcloma cywitz ke xjal mya ba'n; colina wi'je cywitz ke xjal jawni cywitz tu'n cyk'ojin, 2ex cywitz keju o'cx in che ximan ti'j tu'n cybinchante mya ba'n ex tcyakil k'ij in tzaj k'oj cyu'n. 3Puro tz'u'p twi' cyak' ic tza'n tak' jun lobaj; ic tten cyyol ic tza'n tvenen k'anti'. 4Nman, colina wi'je tuj cyk'ab ke xjal mya ba'n, colina wi'je cywitz ke xjal jawni cywitz tu'n cyk'ojin ex cywitz keju in che ximan ti'j tu'n ncub tz'ake. 5Akeju in jaw cyniman cyib ma cub cyk'o'n jun c'obil wi'je; ma cub cylic'un ke xyub ex ke sakbak tuj be te c'obil weye. 6O txi nma'ne teya cyja' Nman Dios: Aya Ndiose, nchiye. Nman, bintza nkanbetze oc nkanine onbil teya. 7Nman Dios, aya colol weye ma'xix tipumal, aya in colin ti'j nwi'ye tuj k'oj. 8Nman, mi'n txi tk'o'na cye ke xjal mya ba'n aju in pon cyc'u'j ti'j; mi'n tak'a ambil tu'n tjapun aju in cub cyximan, tu'ntzun mi'n tjaw cyniman cyib. 9Keju txolin cyten wi'jele e tcub tz'ak cyibajx aju mya ba'n in tzaj cykanin tibaj juntl. 10E tcub tz'ak xk'a'l in c'ant tu'n k'ak' cyibaj; e cyxi xo'n tuj jul jalo ponin t-xe' jatum mlay che jatztl. 11Mi'nwt cucx tten twitz tx'otx' aju xjal si'mil yol; bajwit yajla'n tu'n mya ba'n aju xjal jawni twitz tu'n tk'ojin, ex najxwit tu'n. 12Ba'n wu'ne in xi tbincha'n Kman cyi'j ke meba ex in colin cyi'j ke xjal atx taj cye. 13Ke xjal tz'aklxix cjawil cynimsa'n tbiya; ke xjal in che bet tuj tumel che najal twitza.

will be added

X\