SALMOS 139

1Nman Dios, aya xpich'ul weye ex ojtzki'ntl kine tu'na; 2ojtzki'n tu'na tcyakilju in bant wu'ne; masque najchak ta'ya, pero ba'ntl nximbetze tu'na. 3Ojtzki'ntl tu'na ka in chin bete ex ka in chin ojlane, ba'ntl tu'na tcyakilju in bant wu'ne. 4Oc na'nxtok tetz jun yol tuj ntzi'ye, lu ojtzki'ntl tcyakil tu'na, Nman. 5Txolin wi'je tu'na; ex tzyu'n kine tu'n tk'aba. 6Nimxix nne'la tnabla tuj nwitze, mlayx canun nnable ti'j ex ma' t-xilen, tu'ntzunju mlayx chin canune tu'n tel nnic'e ti'j. 7¿Tza'n ban nxi'ye najchak twitz T-xewa? ¿Ex tza'n ban nxi oke twitza? 8Ka ma chin jaxe max twitz cya'j, atzun ta'ya ma chixin, ex ka ma chin cu'xe t-xe'pun tx'otx' jatum ta' cynajbil cyimni, ex axtzun ta'ya ma chixin; 9ka ma chinx lipane jatum in tzaj spic'e' t-xe cya'j, ex ka ma chin najane jlajxi mar tuj telex k'ij, 10ax icx ma chixin ẍaklu'n kine tu'n tk'aba, ex mlayx chinx ttzokpi'n tbank'aba. 11Ka ma cub nximane tu'n tcub wewan wibe tuj klolj, ex ka ma cub nximane tu'n tch'expet spic'un at wi'jele tu'n toc te klolj, 12mlayx bant tu'n ncub ewane tu'n klolj twitza; porque in koptz'aj konic'an twitza ic tza'n k'ijl. Junx nne'la klolj teya ic tza'n spic'un. 13Aya binchante nximlale; tu'na in bante tuj talbil ntxu'ye. 14Cxel nk'o'ne chjonte teya tu'nju ma'xix t-xilen tak'unbena; in chin labine ti'j ex ma tz'el nnic'e ti'j ax toc jlu. 15Minti' ewat nximlale twitza tej twinikax ex tej nbante tuj ewaj tuj talbil ntxu'ye, ax icx tej nwinikaxe tuj ewaj, mer ic tza'ncu t-xe'pun tx'otx' tuj klolj. 16O chin tila tej matok in chin winikaxe; tcyakil jlu tz'ibamaj tuj tu'ja. Ximamajtl tu'na jte' abk'i tu'n ntene tej na'nxtok wul itz'je. 17Nman Dios, ma'xix t-xilen t-ximbetza tuj nwitze porque nimxix cyajlal. 18Nokwit chin oc tene ajlal cye, maslo nim cyajlal twitz ttxa tz'a'n; ex oc tel nwatle ax atine tuc'ila. 19Nman Dios, byoncuya keju binchal mya ba'n, ex lak'ba'mila wi'je ke byol xjal, 20ex keju in che xmayin ti'ja, akeju in che k'ojin ti'ja nokx gan. 21Nman, in che el wic'une keju in che ic'un teya. Nc'i'ye tu'n ntene cyxol aj k'oj ti'ja. 22Te jumajx ma che el wic'une. Ma che oc nk'o'ne te aj k'oj wi'je. 23Nman Dios, chin t-xpich'un baja ex ojtzkima wanmiye; e tic' twitza wi'je ex ojtzkima tuj nnable; 24ex que'yintza ka in chin bete tuj be mya ba'n, ex chin t-ẍakluma tuj be te jumajx.

will be added

X\