SALMOS 135

1Nimanxwit te Kman. Cynimsa'n jawe tbi Kman; cynimsa'n jawe, akeye tmajen, 2akeye ate' tuj tja Kman ex ate'ye ttxa'n pe'n twitz tja Kman Dios. 3Cynimsa'n jawe Kman porque ba'n te; cybitzanxe ke bitz te nimbil tbi porque at xtalbil tuc'il. 4Porque tu'n e jaw t-sc'o'n ke tiyjil Jacob, akeju aj Israel ke, tu'n cyoc te tecuxix. 5Ba'n wu'ne ma'xix toclen Kman Dios cywitz cycyakil ke tilbilal nno'c cydiosin xjal. 6In tbincha'n Kman tcyakil nok alcye tajbil, tza'nx tuj cya'j ax icx twitz tx'otx', tza'nx tuj mar ax icx max t-xe'pun. 7In jaw jlet muj tu'n max ttxa'npun tx'otx', in tzaj tk'o'n xle'laj cya'j junx tuc'il jbal, ex nne'tz ti'n cyk'ik' tuj tcubil. 8Tu'n e cub tbyo'n cycyakil ke nej cyc'wa'l aj Ejipt ex ke nej cyal alumaj. 9Tuj tnam Ejipt tbincha ke techal ex ke binchben ma'xix cyipumal ti'j rey Faraón ex cyi'j ke xjal at cyoclen ttxlaj. 10E naj nimcu nasyon tu'n, e cub tbyo'n ke rey nimxix cyipumal: 11O cub Sehón aju rey cye aj Amorrey, tuc'ix Og aju rey tuj tx'otx' Basán, ex cyuc'ix cycyakil ke rey tuj Canaán; 12ex xi tk'o'n cytx'otx' ke rey lu te cyetzbil aj Israel, akeju etzan tu'n. 13Nman, ctel tbiya te jumajx; cucx ctzajel na'n tbiya cyu'n cycyakil c'loj xjal. 14In xi tbincha'n Kman cyi'j ke xjal etzan tu'n; at tk'ak'bil tc'u'j cyi'j ke tmajen. 15Ke tilbilal nno'c cydiosin xjal mya ocslal ti'j Dios, k'an pwak ex sak pwak cytx'otx'il, ake jlu tbinchben cyk'ab xjal ke. 16At cytzi', pero miban che yolin; at tbak' cywitz, pero miban che que'yin; 17at cyẍcyin, pero miban che bin; ex minti' cyxew in jatz. 18Akeju binchal cye icx cyten ic tza'n ke tilbilal lu, ax icx keju in ke' cyc'u'j cyi'j. 19Akeye aj Israel, cynimsa'n jawe tbi Kman, akeye tiyjil Aarón, cynimsa'n jawe tbi Kman, 20akeye aj Leví, cynimsa'n jawe tbi Kman; akeye in che niman te Kman, cynimsa'n jawe tbi. 21Nimanxwit tbi Kman tuj tnam Sión, aju Kman najl tuj Jerusalén. Nimanxwit te Kman.

will be added

X\