1 At tzalajbil cye keju in che bet minti' cypaltil ex in japun tley Kman cyu'n. 2 At tzalajbil cye keju in cybincha'n aju in tma'n Dios tu'n tbant ex in che jyon ti'j Kman tu'n tcyakil cyanmi, 3 akeju minti' in cybincha'n jun mya ba'n, ex in che bet tuj tbe Kman. 4 Aya o k'mante tu'n cyjapun ke t-xnak'tzbila ic tza'nx cyten. 5 Cucxwit chin tene wa'lxix tu'ntzun t-xi nnimane ke tleya. 6 Mlay chin ch'ixwiye oc t-xi nnimane cycyakil tmandamyenta. 7 Axix toc cjawil nnimsa'ne tu'n wanmiye oc cybant wu'ne ke tleya tz'aklxix. 8 Waje tu'n cyjapun ke tleya wu'ne. Mi'n chin cyaj tcolina te jumajx. 9 ¿Ti jacu tenba tu'n jun cu'xun tu'n tten tchwinklal sak? O'cx tu'n tank'in ic tza'nx in tma'n tyola. 10 In chin jyone ti'ja tu'n tcyakil wanmiye; mi'n tak'a ambil tu'n tel npa'n wibe cyi'j ke tmandamyenta. 11 O txi nc'u'ne ke tyola tuj wanmiye tu'ntzun mi'n nbinchane il twitza. 12 Nimanxwit tbiya Nman. Chin t-xnak'tzantza cyi'j ke tleya. 13 O che'x nchic'ba'ne cycyakil ke tleya akeju o tmaya. 14 Mas in chin tzalaje tu'n woc lpe'ye cyi'j ke tmandamyenta twitz tcyakil k'inumabl. 15 Chin bel tene ximal cyi'j ke t-xnak'tzbila ex c'oquel nk'o'ne nwitze ti'j ju in bant tu'na. 16 Chin tzalajele cyi'j ke tleya ex mlay tzic' tna'l tyola wu'ne. 17 Binchama ba'n weye akine tmajena, tu'ntzun wank'ine ex tu'n t-xi nnimane tyola. 18 Spic'bama tuj nnable tu'ntzun twile ke t-xnak'tzbila ma'xix cyxilen ex tbanilxix. 19 Betin xjal kine tzalu twitz tx'otx'. Mi'n tz'el tewana ke tmandamyenta nwitze. 20 Ma baj wipune tu'n tlaj waje tu'n wojtzkinteye ke tmandamyenta. 21 In xi tmayo'na keju in jaw cyniman cyib ex mya ba'n ke, akeju nne'l cypa'n cyib cyi'j ke tmandamyenta. 22 Lak'ba'n ela ke wi'je tu'n mi'n cyxmayin wi'je ex tu'n mi'n wel ic'une cyu'n, porque ma txi nbi'ne ke tmandamyenta. 23 Masque che yolin ke nejenel cyxol xjal tu'n cybinchante mya ba'n wi'je, pero akine tmajena cucx chin ximale cyi'j ke tleya. 24 In chin tzalaje cyi'j ke tmandamyenta; atzun ke jlu in che k'onte nnable. 25 Ch'ix ncyime; k'ontza nchwinklale ic tza'nxju yol o tzaj ttziyana. 26 O txi nma'ne teya aju in baj wi'je, ex o chin tzaj ttzak'we'na. Chin t-xnak'tzantza cyi'j ke tleya. 27 K'ontza nnable tu'ntzun nxi lpe'ye cyi'j ke t-xnak'tzbila porque waje tu'n nximane cyi'j ke tbinchbena ma' cyxilen. 28 In chin ok'e tu'nju at nimxix bis tuj wanmiye; k'ukbantza nc'u'je ic tza'nx ju yol o tzaj ttziyana. 29 Mi'n tak'a ambil tu'n nnic'ane yol ex chin t-xtalintza cyu'n ke t-xnak'tzbila. 30 O jaw nsc'o'ne ju be axix toc ex at nganiye cyi'j ke tleya. 31 Nman, ma txi nk'on wibe tu'n nnimane ke tmandamyenta; mi'n cub tk'o'na nch'ixwiye. 32 Nno'c tilil wu'ne tu'n cyjapun ke tmandamyenta porque nojni wanmiye tu'n tzalajbil tu'na. 33 Nman, chin t-xnak'tzantza cyi'j ke tleya ex cucx che xel nnimane te jumajx. 34 K'ontza nnable tu'ntzun tjapun t-xnak'tzbila wu'ne; waje tu'n t-xi nnimane tu'n tcyakil wanmiye. 35 Onintza kine tu'n nnimane tmandamyenta, porque atzun in cnet tzalajbil wu'ne. 36 K'ontza nganiye cyi'j ke tmandamyenta ex mya ti'j cambabl in cnet mya tuj tumel. 37 Mi'n tak'a ambil tu'n toc ten nwitze cyi'j keju mya ax toc dios ke; k'ontza nchwinklale tu'n nbete tuj tbeya. 38 Akine tmajena, japunx tu'na wuc'ile aju yol o tzaj ttziyana cye keju in che niman teya. 39 Lak'ba'n ela wi'je aju xmaybil in chin xobe ti'j, porque ba'n ke tleya. 40 At-xix nganiye cyi'j ke t-xnak'tzbila; k'ontza nchwinklale porque tz'aklxix teya. 41 Nman, yec'untza weye aju tc'ujlalila ex ju colbil tu'na, ic tza'nx o tzaj ttziyana. 42 Cyja'tzun jacu tzak'wet wu'ne aju in xmayin wi'je porque k'ukl nc'u'je ti'j tyola. 43 Chin tonintza tu'n cucx nyoline ti'j ju yol ax toc porque ma ke' nc'u'je ti'j tleya. 44 Cucx che japunel ke tleya wu'ne tuj tcyakil wank'ible. 45 Cyja'tzun jacu chin ank'ine tzokpi'ntl kine, porque otok chinx lpe'ye cyi'j t-xnak'tzbila. 46 Oc chin yolile cyi'j ke tmandamyenta cywitz ke rey ex mlay tzaj nch'ixwiye, 47 porque c'ujla'n ke tmandamyenta wu'ne ex in chin tzalaje cyi'j. 48 C'ujla'n ke tmandamyenta wu'ne ex at nganiye cyi'j, ex nimxix in chin ximane cyi'j ke tleya. 49 Na'ntza aju yol tzaj tma'na weye, akine tmajena; aju tzaj tma'na tu'n tke' nc'u'je ti'j. 50 Atzun jlu ma tz'oc te k'ukbabl nc'u'je tuj bis: Tu'nju yol tzaj ttziyana ma tzaj tk'o'na nchwinklale. 51 Keju in jaw cyniman cyib minti' in xi cycolin tu'n cyxmayin wi'je, atzun weye mlay tz'el npa'n wibe ti'j tleya. 52 Na'n wu'ne aju tzaj tma'na ojtxi tu'n tbant ku'ne, ex cyi'jtzun jlu in cnet k'ukbabl nc'u'je, Nman. 53 Ma tzaj ntx'u'jile cyi'j ke xjal mya ba'n tu'nju in cyaj cycolin tleya. 54 In chin bitzane cyi'j ke tleya tuj tx'otx' jatum atine ic tza'n betin xjal. 55 Nman, konic'an in tzaj nna'ne tbiya; ex cjapunel tleya wu'ne. 56 Atzun jlu cbantel wu'ne: Cxel nnimane ke t-xnak'tzbila. 57 Nman, o'cx aya wetzbile, o txi ntziyane tu'n t-xi nnimane tyola. 58 Tu'n tcyakil wanmiye ma chin cubsane twitza, chin t-xtalin cuba ic tza'nxju yol o tzaj ttziyana. 59 In cub tene ximal ti'j ju in bant wu'ne, ex in ajtz meltz'aje juntl maj tu'n t-xi nnimane ke tmandamyenta. 60 Oc tilil wu'ne, jurat naj xi nnimane tmandamyenta. 61 Ma baj cytxolin cyib ke binchal mya ba'n wi'je tu'n ntzyete cyu'n, pero minti' ma tzic' cyna'njtz ke tleya wu'ne. 62 Tmij ak'bil in chin jaw we'ye k'ol chjonte teya cyi'j ke tleya tz'aklxix. 63 Wamiw wibe cyuc'il keju in che niman teya ex cyuc'il keju in che japun ke tleya cyu'n. 64 Nman, nojni twitz tx'otx' tu'n tc'ujlalila; chin t-xnak'tzantza cyi'j ke tleya. 65 Nman, ma tbinchaya ba'n weye, akine tmajena, ic tza'nx ju yol o tzaj ttziyana. 66 Chin t-xnak'tzantza tu'n tten nnable ex wojtzkible, porque k'ukl nc'u'je cyi'j ke tmandamyenta. 67 Tej na'nxtok nyajlanjtze, in el txalpuje ti'j tbeya, atzun ja'lo in xi nnimane tyola. 68 Ba'n teya ex in tbincha'na aju ba'n; chin t-xnak'tzantza cyi'j ke tleya. 69 Keju in jaw cyniman cyib in xi cynic'an yol wi'je, pero in che japun ke t-xnak'tzbila wu'ne tu'n tcyakil wanmiye. 70 Tzpetni ta' cynabl, atzun weye in chin tzalaje ti'j tleya. 71 Ba'n oc te weye tej nyajlanjtze, cyja'tzun tten el nnic'e cyi'j ke tleya. 72 Te weye mas ma' toclen aju xnak'tzbil tzaj tk'o'na twitz nimcu k'an pwak ex sak pwak. 73 Tu'na cub tbincha'na kine; k'ontza nnable tu'n tel nnic'e cyi'j ke tmandamyenta. 74 Keju in che niman teya che tzalajel oc woc cyque'yin, porque ma tz'oc ke' nc'u'je ti'j tyola. 75 Nman, ba'n wu'ne tz'aklxix ke tleya ex tuj tumel in yajlanjtze tu'na. 76 Tz'ajbenwt tc'ujlalila te k'ukbabl nc'u'je, ic tza'nx ju yol tzaj ttziyana weye. 77 Tzaj tz'e'y tc'u'ja wi'je tu'ntzun wank'ine, porque in chin tzalaje ti'j tleya. 78 Tzajxwit cych'ixwi keju in jaw cyniman cyib ex keju nok elajx in chin oc cyyaso'n; waje tu'n nximane cyi'j ke t-xnak'tzbila. 79 Tz'ocwit cychmon cyib wuc'ile keju in che niman teya, akeju ojtzki'n ke tmandamyenta cyu'n. 80 Cuchiwt tu'n woc lpe'ye cyi'j ke t-xnak'tzbila tu'n tcyakil wanmiye, tu'ntzun mi'n njaw ch'ixwiye. 81 Niban tbaj wipune tu'n tlaj in chin ayone ti'j tu'n nclete tu'na; pero ma tz'oc ke' nc'u'je ti'j tyola. 82 Niban tbaj cyipun ke tbak' nwitze tu'nju in chin ayone ti'j tu'n tjapun ju yol o tzaj ttziyana, ex in nma'ne: ¿Jtoj ban ttzaja k'ukbalte nc'u'je? 83 Masque ma chin tijine ex minti'tl wajbene, pero minti' nnic' cyna'njtz ke tleya wu'ne. 84 ¿Jte' k'ijtl tu'n nyone ti'j? ¿Jtoj ban tcub tk'o'na cysentens keju in che yajlante weye? 85 Ke xjal in jaw cyniman cyib ex minti' in xi cyniman tleya ma cu'x cylacu'n jun jul tu'n nxi tz'ake tuj. 86 Chin tonintza, porque nokx gan in chin baj yajla'ne. Cycyakil tmandamyenta axix toc ke. 87 Ch'ixmi in cub byo'ne cyu'n xjal, pero minti' cyaj ncoline ke t-xnak'tzbila. 88 K'ontza nchwinklale ic tza'nx tc'ujlalila tu'ntzun cyjapun ke tmandamyenta wu'ne. 89 Nman, te jumajx ctel tyola cyuwsa'maj max tuj cya'j. 90 Aju yol in tzaj ttziyana cucx in japun tu'na; tu'na cub tbincha'na aju tx'otx' ex cucx tten. 91 Cycyakil ti'xti cucx wa'lx ke ic tza'n cyaj tma'na, porque cycyakil in che ajben teya. 92 Nokwit minti' in tzaj ti'n t-xnak'tzbila tzalajbil weye, mawtlo chin naje tu'n bis. 93 Mlayx tzic' cyna'njtz ke t-xnak'tzbila wu'ne, porque cyu'n ke jlu ma tzaj tk'o'na nchwinklale. 94 Chin tcloma porque teya kine ex ma chin oc lpe'ye cyi'j ke t-xnak'tzbila. 95 Ke xjal mya ba'n o'cx in che ayon ti'j tu'n nnaje cyu'n, atzun weye o'cx in chin ximane cyi'j ke tmandamyenta. 96 Ma wile, cycyakil ti'xti at jatum tu'n cypon baj, atzun ke tmandamyenta minti' bajsbil cye. 97 C'ujla'nxix tleya wu'ne. Tcyakil k'ij in chin ximane ti'j. 98 Cyu'n ke tmandamyenta at mas nnable cywitz aj k'oj wi'je porque cucx ate' ke tmandamyenta wuc'ile. 99 Mas ma tzic' nnable cywitz ke xnak'tzal weye tu'nju cucx in chin ximane ti'j ju in tma'na weye tu'n nbinchanteye. 100 Mas ma tzic' nnable cywitz ke tij xjal tu'nju niman ke tmandamyenta wu'ne. 101 Ma tz'el npa'n wibe ti'j tcyakil be mya ba'n tu'ntzun tjapun tyola wu'ne. 102 Bajx tz'el npa'n wibe cyi'j ke tmandamyenta tu'nju aya xnak'tzal weye. 103 Aju yol tzaj ttziyana weye mas chi' nne'l tuj ntzi'ye twitz ta'l cab. 104 Cyu'n ke tmandamyenta ma tz'oc nnable, cyja'tzun nne'l wic'une tcyakil xnak'tzbil nic'aj yol. 105 Ic tten tyola ic tza'n jun candil te ẍaklul weye, in tk'o'n spic'un tuj nbeye. 106 Xi ntziyane jun nyole axix toc ex cjapunel wu'ne; ke tmandamyenta tz'aklxix che japunel wu'ne. 107 Nman, nimxix yajbil ma tzaj wi'je, k'ontza wank'ible ic tza'n o tzaj ttziyana. 108 C'monxa nyole te ak'bil chjonte teya Nman, ex chin t-xnak'tzantza cyi'j ke tmandamyenta. 109 Cucx nne'lje' wi'je tu'n ncyime, pero mlay tzic' tna'l tleya wu'ne. 110 Ke xjal mya ba'n in cub cyk'o'n c'obil tuj nbeye, pero bajx tz'el npa'n wibe cyi'j ke t-xnak'tzbila. 111 Ma che oc ke tmandamyenta te jun wetzbile te jumajx porque in cyk'o'n tzalajbil te wanmiye. 112 Tu'n tcyakil wanmiye ma cub nximane tu'n cyjapun ke tleya wu'ne te jumajx. 113 In che el wic'une ke xjal xmletz', atzunju tleya c'ujla'n wu'ne. 114 Aya clol weye ic tza'n jun makbil tu'n nclete; ma tz'oc ke' nc'u'je ti'j tyola. 115 Cylak'bamil cyibe wi'je akeye xjal mya ba'n, porque waje tu'n cyjapun wu'ne ke tmandamyent Ndiose. 116 K'ontza wipune ic tza'nxju yol o tzaj ttziyana, tu'ntzun wank'ine; japunx tu'na aju tzaj ttziyana, tu'ntzun mi'n wele tuj nch'ixwiye. 117 Chin tonintza ex jacu chin clete; cyja'tzun cucx che japunel ke tleya wu'ne. 118 In che el tic'una keju nne'l cypa'n cyib cyi'j ke tleya porque minti' tnabl cyximbetz. 119 Ke xjal mya ba'n ate' twitz tx'otx' in che el tic'una ic tza'n tz'is; cyja'tzun c'ujla'n ke tmandamyenta wu'ne. 120 In lu'lun nximlale tu'nju in chin xobe twitza; ma tzaj t-xobil wi'je cyu'n keju castiw tu'na. 121 Bajx txi ncoline tu'n nbinchanteye aju tz'aklxix; mi'n chinx tk'o'na tuj cyk'ab keju yajlal weye. 122 Tcyaj we'ya wi'je tu'n tbinchanteya ba'n weye; tu'n mi'n nbaj cyyaso'n keju in jaw cyniman cyib. 123 Niban tbaj cyipun ke tbak' nwitze tu'n tlaj in chin ayone tu'n nclete tu'na, in chin ayone tu'n ntzokpete tu'na ic tza'nx o tzaj ttziyana. 124 Xtalin cuba kine tu'nju tc'ujlalila, akine tmajena; chin t-xnak'tzantza cyi'j ke tleya. 125 Akine tmajena. K'ontza nnable porque waje tu'n tel nnic'e cyi'j ke tmandamyenta. 126 Nman, ma pon tk'ijlalil tu'n tcub cycastiw tu'na porque minti' o txi cyniman tleya. 127 Cyja'tzun in nc'ujla'ne ke tmandamyenta mas twitz k'an pwak tbanilxix. 128 Cyja'tzun in chinx lpe'ye cyi'j ke t-xnak'tzbila ex nne'l wic'une cycyakil xnak'tzbil nic'aj yol. 129 Ma' t-xilen tcyakilju t-xnak'tzbila, cyja'tzun niman wu'ne. 130 Aju chic'babl ti'j tyola in t-spic'ba'n tuj knable ex in tk'o'n cynabl ke xjal ch'in cynabl. 131 Nimxix waje cyi'j ke tmandamyenta. 132 Chin tque'yintza ex tzajx tz'e'y tc'u'ja wi'je ic tza'n in tbincha'na cyi'j keju in che c'ujlan teya. 133 Chin t-ẍakluma ic tza'nx in tma'n tyola, ex mi'n tak'a ambil tu'n tcub wi'je tu'nju mya ba'n. 134 Chin tcloma teju yajbil weye cyu'n xjal porque waje tu'n cyjapun ke tmandamyenta wu'ne. 135 Chin tque'yintza tu'n tzalajbil, akine tmajena, ex chin t-xnak'tzantza tu'n tel nnic'e cyi'j ke tleya. 136 Nimxix ta'l nwitze nne'l mer ic tza'n jun nima, porque minti' in xi niman t-xnak'tzbila cyu'n xjal. 137 Tz'aklxix teya Nman, ex tz'aklxix ke tmandamyenta. 138 Aju tmaya keye tu'n kbinchanteye, tz'aklxix ex ax toc. 139 Ma tzaj tlo'ch nc'u'je, porque ke aj k'oj wi'je minti' cyaj ti'j tyola. 140 Aju tyola minti' tpaltil, cyja'tzun c'ujla'n wu'ne, akine tmajena. 141 Nok ch'in woclene ex ic'un kine cyu'n xjal, pero minti' ma tzic' cyna'l ke tmandamyenta wu'ne. 142 Tz'aklxix teya te jumajx, ex aju xnak'tzbil tu'na axix toc. 143 O chin tene tuj c'ixc'oj ex tuj bis, pero ake tmandamyenta e tzalajsante weye. 144 Ke tmandamyenta tz'aklxix ke te jumajx; k'ontza nnable tu'n wank'ine. 145 Nman, in chin cubsane twitza tu'n tcyakil wanmiye; chin ttzak'wentza, waje tu'n cyjapun ke tleya wu'ne. 146 Twitza in chin cubsane, chin tonintza tu'ntzun cyjapun ke tmandamyenta wu'ne. 147 Na'nxtok tcub k'ij, in chin jaw we'ye kanil onbil teya; ma tz'oc ke' nc'u'je ti'j tyola. 148 In chin itz'lene enter ak'bil tu'ntzun nximane ti'j ju yol o tzaj ttziyana. 149 Bintza tk'ajk'ajel nwi'ye Nman nok tu'nju tc'ujlalila; k'ontza nchwinklale ic tza'nx tajbila. 150 Nikayin ate' wi'je ke yajlal weye mya ba'n ke, ex najchak cyelsa'n ti'j tleya. 151 Nikayin ta'ya Nman, ex cycyakil ke tmandamyenta axix toc ke. 152 Atxix ojtxi wojtzkiye ke tmandamyenta, akeju e cyaj bant tu'na te jumajx. 153 Que'yintza aju yajbil weye ex chin tcloma porque minti' nnic' tna'njtz tleya wu'ne. 154 Yolina wi'je tu'n nclete ex colpima kine, k'ontza nchwinklale ic tza'nx ju yol o tzaj ttziyana. 155 Mlayx che clet ke xjal mya ba'n porque minti' in che oc lpe' cyi'j ke tleya. 156 Nman, nim tk'ak'bil tc'u'ja; k'ontza nchwinklale ic tza'nx tajbila. 157 Nim cyajlal ke aj k'oj wi'je ex yajlal weye, pero minti' nne'l npa'n wibe cyi'j ke tmandamyenta. 158 Minti' in cub tuj nwitze ke xjal in che oc meltz'aj ti'ja tu'nju minti' in xi cyniman ke tmandamyenta. 159 Nman, que'yintza nim in nc'ujla'ne ke t-xnak'tzbila; k'ontza nchwinklale tu'nju tc'ujlalila. 160 Cycyakil ke tyola axix toc ke; cycyakil ke tleya tz'aklxix ke ex te jumajx ke. 161 Ke nejenel cyxol xjal nokx gan in chin baj yajla'ne cyu'n, atzun weye in chin xobe tu'n tyola. 162 In chin tzalaje tu'nju yol o tzaj ttziyana, ic tza'n jun xjal otok tz'oc noj ti'j jun nintz k'inumabl. 163 Nne'l wic'une aju nic'aj yol ex minti' in cub tuj nwitze, pero in nc'ujla'ne aju tleya. 164 Tcyakil or in jaw nnimsa'ne tbiya nok tu'nju tz'aklxix ke tleya. 165 Keju in cyc'ujla'n ke tleya txubtxaj ate', ex nok alcyex ma tzaj cyi'j, mlay che cub tz'ak. 166 Nman, chin ayole ti'j tu'n nclete tu'na, porque ma che japun ke tmandamyenta wu'ne. 167 In che'x nnimane ke tmandamyenta ex in che nc'ujla'ne tu'n tcyakil wanmiye. 168 In che'x nnimane ke t-xnak'tzbila ex ke tmandamyenta; ojtzki'n tu'na cycyakil ke nbinchbene. 169 Oc njaw sch'ine, ponxwit tk'ajk'ajel nwi'ye twitza Nman; k'ontza nnable ic tza'nx tyola. 170 Ponxwit aju nna'j Diose twitza; chin tcloma ic tza'nx o tzaj ttziyana. 171 Cuchiwt cucx jaw nnimsa'ne tbiya, porque o chin tzaj t-xnak'tza'na cyi'j ke tleya. 172 Cuchiwt cucx t-xi nbitzane jun bitz ti'j ju yol o tzaj ttziyana, porque cycyakil ke tmandamyenta tz'aklxix ke. 173 Nok tencuya tu'n ttzaj tk'o'na onbil weye, porque o jaw nsc'o'ne ke t-xnak'tzbila. 174 Nman, waje tu'n nclete tu'na. In chin tzalaje ti'j tleya. 175 Waje chin ank'ine tu'n tjaw nnimsa'ne tbiya; awt ju tbinchbena tz'aklxix onin wi'je. 176 Ma chin el tzpete ic tza'n jun ẍne'l; tzaja jyolte weye porque minti' nnic' cyna'l ke tmandamyenta wu'ne.
