SALMOS 116

1At nc'ujlalile ti'j Kman tu'nju ma tzaj tbi'n nyole ex ncubsbile, 2ex tu'nju ma chin tzaj bi'ne tu'n. Cyja'tzun chin cubsale twitz tuj tcyakil k'ij te wank'ible. 3In tzyete tu'n tipumal camic mer ic tza'n tuj c'obil, tzaj nim xobajil wi'je tu'nju ch'ixtok npone tuj cynajbil cyimni; tzaj nxobile ex tzaj c'ixc'oj wi'je. 4In cubsantzune twitz Kman ex nchiye: Nman, chin tcloma. 5Tz'aklxix te Kman ex in tzaj tz'e'y tc'u'j ki'j, ex nim tk'ak'bil tc'u'j Kdios ki'j. 6Ate Kman cwentil cye keju nok ch'in cynabl at. Tej minti'tok wipune in clete tu'n. 7Ja'lo minti'tl in baj nc'u'je porque nim t-xtalbil Kman ma tbincha weye. 8Tu'n ma chin clete tu'n mi'n ncyime, ex tu'n mi'n cucx tel ta'l nwitze, ex tu'n mi'n ncub tz'ake. 9Chin betele ba'n twitz Kman cyxol ke xjal najl twitz tx'otx'. 10Xi woncsla'ne, cyja'tzun in chin yoline, masque atine tuj nim bis. 11Tej otok baj nc'u'je, o nmaye ka cycyakil xjal ba'n che nic'an yol. 12¿Tza'n tten tu'n tchjet wu'ne te Kman tcyakilju ba'n o tbincha wi'je? 13Ctzajel wi'ne jun vas ta'l twitz uva te jun oyaj te Kman tu'n t-xi nk'o'ne chjonte te, tu'nju ma chin clete tu'n. 14Cjapunel wu'ne tcyakilju yol xi ntziyane te Kman cywitz cycyakil xjal etzan tu'n. 15Ma' t-xilen tuj twitz Kman ka ma cyim jun xjal cyxol keju in che niman te. 16Nman Dios, akine tmajena, tal aju tmajena xu'j; tej c'alo'ntok kine, in el tco'pina. 17Cxel nk'o'ne jun oyaj teya te jun ak'bil chjonte, ex chin cubsale twitza Nman. 18Aju yol xi ntziyane te Kman cjapunel wu'ne cywitz cycyakil xjal etzan tu'n, 19cjapunel wu'ne ttxa'n pe'n twitz tja Kman, ax tuj tmija tnam Jerusalén. Nimanxwit tbi Kman.

will be added

X\