SALMOS 115

1Kman Dios, ba'n tu'n tjaw nimset tbiya ex mya aju keye kbi tu'n tjaw nimset. Ba'n tu'n tjaw nimset tbiya tu'nju at tc'ujlalila ex tu'nju axix toc tyola. 2¿Tiku'n in cyma'n xjal cyuj mastl nasyon: Jatum ta' Cydios ke jlu? Che chi. 3Aju Kdios atzun ta' tuj cya'j ex in tbincha'n tcyakil alcye taj tu'n tbant tu'n. 4Ke tilbilal in che bant cyu'n xjal cyuj mastl nasyon, sak pwak ex k'an pwak cytx'otx'il, ex cyu'nx ke xjal in cub cybincha'n. 5At cytzi' pero miban che yolin; at tbak' cywitz pero miban che que'yin; 6at cyẍcyin pero miban che bin; at cytxa'n pero miban che skon; 7at cyk'ab pero mlay tzyet jun ti'xti cyu'n; at cykan pero miban che bet; mi jun tk'ajk'ajel in jatz tuj cykul. 8Ke xjal in che binchan cye ke tilbilal lu ex nno'c ke' cyc'u'j cyi'j, icx cyten ic tza'n cye. 9Akeye aj Israel, ke'c cyc'u'je ti'j Kman. A onil ke ex in colin ki'j. 10Akeye pal, ke'c cyc'u'je ti'j Kman. A onil ke ex in colin ki'j. 11Akeye in che niman te Kman, ke'c cyc'u'je ti'j. A onil ke ex in colin ki'j. 12Minti' nnic' kna'l tu'n Kman ex ko bel cy'iwla'n tu'n. Che bel cy'iwla'n aj Israel tu'n. Che bel cy'iwla'n ke pal tu'n. 13Che bel tcy'iwla'n keju in che niman te, tza'nx keju ma' cyoclen icx keju ch'in cyoclen. 14Cuchiwt chmet cybaj ke cyiyjile tu'n Kman, ax icx ke cyiyjil ke cyc'wa'le. 15Awt Kman cy'iwlan cyeye, aju binchante cya'j ex tx'otx'. 16Te te Kman aju cya'j, atzunju tx'otx' xi k'o'n cye xjal tu'n Kman. 17Keju o che cyim ex o che cu'pun tuj cynajbil cyimni, mlay bant tu'n t-xi cyk'o'n chjonte te Kman; 18atzun ke cxel kk'o'n chjonte te Kman ja'lo ex te jumajx. Nimanxwit tbi Kman.

will be added

X\