SALMOS 109

1Nman Dios, mi'n nok tzaj tbi'na nna'j Diose, 2porque ke xjal nic'al yol ex ke xjal mya ba'n in che yolin mya ba'n wi'je, ex mya ax toc aju in cyma'n. 3Txolin wi'je cyu'n ke xjal in che yolin yol te ic'bil; in che oc tzokpaj wi'je ex minti' wile. 4At nc'ujlalile cyi'j, atzun cye in che oc tzokpaj wi'je; pero weye in chin na'ne Dios. 5Mya ba'n chojbil weye tzaj cyk'o'n te t-xel aju ba'n nbinchaye cye, ex te t-xel nc'ujlalile ma chin el ic'une cyu'n. 6K'on oca jun jwes mya ba'n tu'n toc xjal lu tuj xjel tu'n, ex tu'n tcub t-sentens ax tu'nju xjal toc te yolil ti'j. 7Oc toc tuj xjel tz'ocwit at til; tu'nxwit tyol te colbil tib cub t-sentens. 8Nic'xwit k'ij tz'ank'in ex juntlxwit txi c'monte toclen. 9E cycyaj ten ke tc'wa'l minti' cyman ex aju t-xu'jil e toc te meba xu'j. 10E cyoc tcy'ajal te mo'l ex tu'n cyel labt ke nok jachak. E cyex lajet tuj ttx'akan cyja. 11Txi'wt ti'n k'ol ch'ex tcyakilju at te. Awt xjal mi ojtzki'n tu'n txi k'inte twitz tak'unben. 12Minti'wt jun xjal tzaj tz'e'y tc'u'j ti'j ex mi cyi'j ke tc'wa'l oc cycyaj ten minti' cyman. 13Bi'xwit che cub baj ke tiyjil, e tnaj cybi te jumajx. 14Tzajxwit tna'n Kman aju mya ba'n tbincha tman xjal lu ex mi'nxwit cub najsa'n til ttxu'; 15cucxwit tzaj tna'n Kman aju cyil ex mi'nwt tzaj na'ntl cybi xjal lu tzalu twitz tx'otx'. 16Minti'x cub t-ximan tu'n ttzaj tz'e'y tc'u'j cyi'j xjal; nok o'cx e baj tyajla'n ke meba ex keju minti' cyipun ex keju in che bisun, ex e cub tbyo'n. 17Tu'nju mas o tajbe tu'n t-xi tkanin jun mya ba'n tibaj juntl, icxwittzun te e ttzaj mya ba'n tibaj. Minti' o tajbe tu'n tcub tcy'iwla'n juntl, ex mi'nxwittzun cub cy'iwla'n te. 18O'cx o kanin tu'n ttzaj mya ba'n cyibaj xjal; ic tten mya ba'n te te ic tza'n t-xbalun toc, ocx tuj tc'u'j ic tza'n a' ex ocx tuj tbakil ic tza'n aseyt; 19e toc txayin ti'j ic tza'n tu'n jun xbalun ex e toc jatz'o'n tc'u'j mer ic tza'n tu'n jun sinch. 20Icwit tten cub cycastiw ke aj k'oj wi'je tu'n Kman ex keju in che yolin mya ba'n wi'je. 21Atzun teya Nman, chin t-xtalin cuba tu'n tjaw nimsa'n tbiya. Chin tcloma tu'nju t-xtalbila ex tc'ujlalila. 22Jumajx meba kine ex in chin bisune, ma tzaj ta'w tuj wanmiye. 23Niban ncub naje ic tza'n jun xlecun, in chinx jawo'ne tu'n cyk'ik' mer ic tza'n jun ẍplon. 24Tu'nju minti' in chin wa'ne, in che jaw lu'lun ke nkane ex ma tz'oc wi'je. 25Ma chin oque te cytzebl xjal. Oc tcyil kine, in xi cyyucun cywi' tu'n cyxmayin wi'je. 26Chin tonintza Nman Dios, chin tcloma tu'n tc'ujlalila, 27tu'ntzun tel cynic' xjal ti'j ka tu'na o che bant ke jlu tu'n tk'aba. 28Ma bant-x ka ma tzaj cykanin mya ba'n wibaje, atzun teya chin bel tcy'iwla'na. Tzajxwit cych'ixwi, atzun weye chin tzalajele, akine tmajena. 29Tzajxwit cych'ixwi ke aj k'oj wi'je. Ex e toc txayin cyi'j tu'nju ch'ixbil ic tza'n tu'n jun xbalun. 30Tu'n ntzi'ye cucx cxel nk'o'ne nim chjonte te Kman; cjawil nnimsa'ne cyxol nimcu xjal. 31Porque ate in colin cyi'j ke meba ex in che clet tu'n tuj cyk'ab keju in che cub k'onte cysentens.

will be added

X\