SALMOS 105

1Cyk'onxe chjonte te Kman ex che cubsane twitz, cymanxe cye xjal ate' cyuj mastl nasyon aju o tbincha. 2Che bitzane bitz te nimbil te. Ex che yoline cyi'j ke tbinchben ma' cyxilen. 3Che tzalajxe ti'j tbi xjan. Tzalajxwit cyanmi keju in che jyon ti'j Kman. 4Che lak'exe tuc'il Kman tu'ntzun ttzaj tk'o'n cyipumale; che lak'exe tuc'il tcyakil maj. 5Cyna'ntze ke tbinchben ma' cyoclen ex nim cyipumal, ex cyna'ntze ke tley tzaj tma'n; 6akeye tiyjil Abraham aju tmajen Dios ex akeye tc'wa'l Jacob sc'o'maj ke'ye tu'n. 7Atzun Kman jlu aju Kdios ex in cawin tibaj tcyakil twitz tx'otx'. 8Masque ma tzic' jun mil c'loj cyiyjil xjal, pero mlay tzic' tna'l tu'n aju tyol cyaj bant ti'j cyuc'il, 9ex mlay tzic' tna'l tu'n aju tyol cyaj bant ti'j tuc'il Abraham, ex aju tyol axix toc xi ttziyan te Isaac; 10cyaj tcyuwsa'n ju yol lu te Jacob tu'n toc ic tza'n jun ley, ex cyaj tcyuwsa'n te jumajx te Israel, 11tej tmante: Teya cxel nk'o'ne aju tx'otx' Canaán tu'n toc te tetzbila. 12Mya nim cybaj tej cyten tuj cytx'otx' aj Canaán ex stranjer xjal ke, 13nok e betje' tuj cytx'otx' ke nasyon ex e ten tjak' cycawbil ke rey, 14pero minti' xi tk'o'n Dios ambil tu'n cyyajlanjtz cyu'n mastl xjal, nokpe xi tma'n cye rey: 15Mi'n tz'oc cyk'o'ne cyk'abe cyi'j ke xjal sc'o'maj wu'ne ex mi'n che oc tene yajlal cye ke nsanjele. 16Tzaj we'yaj tu'n Dios tuj tx'otx' Canaán, ex el ti'n tcyakilju in ajben te cywa. 17Pero nej xi sama'n José tu'n Dios tuj tx'otx' Ejipt, aju otok txi cyc'ayin tu'n toc te cymajen xjal. 18O c'ixbisanjtz tu'n caden oc k'o'n ti'j tkan, ex oc tc'alo'n tkul tu'n c'uxbil te presbil te. 19Oc José tuj malbil tu'n tyol Kman maxi tej tjapun baj ju yol otok tma te tjak'xi. 20Aju rey in cawin cyibaj nimcu xjal xi tma'n tu'n ttzokpet José; 21ex oc tk'o'n te nejenel tuj tja tu'n toc tcwentin tcyakilju at te, 22tu'ntzun t-xi tk'o'n xnak'tzbil cye ke nejenel ex cye ke tij xjal tu'n toc nim cynabl. 23Te tibajxi pon Israel, aju ax Jacob tbi, ex o najan ic tza'n jun stranjer xjal tuj tx'otx' Ejipt, aju cytx'otx' tiyjil Cam. 24E chmet-xix ke tiyjil Jacob tu'n Dios, ex oc mas cyipun cywitz aj Ejipt. 25Pero te tibajxi ch'expet cyanmi aj Ejipt tu'n Dios, e oc ten yajlal cyi'j ke xjal etzan tu'n, ex e oc ten sbul cye ke tmajen. 26Xitzun t-sama'n Dios Moisés aju tmajen, tuc'ix Aarón aju otok jaw t-sc'o'n, 27ex tu'n Dios cybincha ke techal cyuc'ix ke binchben nim cyipumal tuj tx'otx' Ejipt. 28Tzaj t-sama'n Dios klolj ex bi'x cub kloljix tuj tcyakil part, pero minti' xi cyniman aj Ejipt tyol Dios. 29E oc ke nima tu'n te chic', ex bi'x e naj cycyakil cyiẍ; 30baj noj tuj tx'otx' cyu'n ke ẍal, tuc'ix tuj tja rey. 31Tzaj t-sama'n Dios txkan xmisak ex sak us, ex bi'x baj noj twitz cytx'otx' aj Ejipt cyu'n. 32Te t-xel jbal tzaj t-sama'n sakbakun tuc'ix tkan k'ancyok tibaj tx'otx' Ejipt. 33Bi'x e naj ke tkan uva ex ke tkan higo awa'n cyu'n; cyuc'ix ke tze' bi'x e naj tuj Ejipt. 34Tzaj t-sama'n Dios txkan ẍplon nimxix wen ex miban cyajlanjtz. 35Baj cywa'n tcyakil cha'x c'ul tuj cojbil, tuc'ix tcyakil awal. 36E cyim ke nej cyc'wa'l aj Ejipt tu'n, tujile junjun ja xjal. 37E je'tztzun ti'n Dios ke xjal etzan tu'n k'i'n k'an pwak tuc'ix sak pwak cyu'n, ex mi jun o baj tipun cyxol junjun c'loj cyiyjil. 38Bi'x e jaw tzalaj ke aj Ejipt tej cyque'yinte cub be cyu'n, tu'nju otok tzaj nim t-xobil cyi'j. 39Cub tlic'un Dios jun muj cyibaj tu'n cybet tjak', ex tzaj t-sama'n jun tkan k'ak' tu'n t-spic'bante cyibaj te konic'an. 40Xi cykanin cychi' te Dios, ex tzaj t-sama'n ke tz'uchin te cychi', ex noj cyc'u'j tu'n wabj tzaj t-sama'n Dios twitz cya'j. 41O pax pic tu'n ex etz a' tuj ex o bet ic tza'n jun nima tuj tzkij tx'otx'. 42Tzaj tna'n aju yol xjan otok txi ttziyan te Abraham aju tmajen. 43Cyja'tzun tten e je'tz ti'n Dios ke xjal etzan tu'n, ex keju sc'o'maj tu'n in che bitzan ex in che sch'in tu'n tzalajbil. 44Xi tk'o'n tx'otx' cye, aju cytx'otx' mastl nasyon, tuc'ix tcyakil cyawal ex tcyakilju cyak'unben, 45tu'ntzun t-xi cyniman aju tley Kman ex tu'n cyjapun ke tmandamyent cyu'n. Nimanxwit tbi Kman.

will be added

X\