SALMOS 103

1Cxel nk'o'ne chjonte te Kman Dios tu'n tcyakil wanmiye; cxel nk'o'ne chjonte te tu'n tcyakil nc'u'je, tu'nju xjan tbi. 2Cxel nk'o'ne chjonte te Kman tu'n tcyakil wanmiye; mlay tzic' tna'l wu'ne tcyakilju t-xtalbil in tzaj tk'o'n weye. 3Ate Kman in cub najsante tcyakil wile, in chin banixe tu'n tuj tcyakil nyabile. 4Ate Kman in clonte weye te camic ex txolin wi'je tu'n tc'ujlalil ex tu'n tk'ak'bil tc'u'j. 5In tzaj tk'o'n nimcu ba'n weye tu'n toctl wipune, ic tza'n tipun jun cu'xun, ex ic tza'n tipun jun t'iw. 6In tbincha'n Kman aju tz'aklxix, ex tuj tumelxix in xi tbincha'n cyi'j keju in che yajlanjtz. 7Xi tchic'ba'n te Mois├ęs alcye t-ximbetz tu'n tbant tu'n, ex xi tyec'un cye aj Israel ke tbinchben nim cyipumal. 8In k'ak'an tc'u'j Kman ki'j ex in tz'e'y tc'u'j ki'j; nim tpasens ki'j ex nim tc'ujlalil. 9Mya cucx in ko oc tic'le'n, ex minti' in ten tk'oj te jumajx. 10Minti' in cub tk'o'n kcastiw ic tza'n cyajlal kil ex ke kbinchben mya ba'n. 11Ic tza'n te cya'j lek'ch tjaw tibaj tx'otx', ax icx te Dios nim tc'ujlalil cyi'j keju in che niman te. 12Ic tza'n tjawitz k'ij ex telex k'ij najchak cyxol, ax icxtzun ke kil najchak ma tz'el tlak'ba'n Dios ki'j. 13Ic tza'n jun mambaj in tzaj tz'e'y tc'u'j cyi'j tc'wa'l, ax icx te Kman in tzaj tz'e'y tc'u'j cyi'j keju in che niman te. 14Porque ojtzki'n tu'n alcye banin ko' ti'j: ba'n tu'n tkukil tx'otx' ko'. 15Aju tank'ibl xjal ic tten ic tza'n c'ul nok ch'in in ten; ex ic tza'n jun bech tuj cojbil jurat in tzaj pok'l; 16oc nnic' cyk'ik' tibaj, bi'x in naj tu'n ex mlay cyil xjal juntl maj. 17Atzunte Kman tc'ujlalil cucx tten te jumajx cyi'j ke xjal in che niman te, ex cucx tbinchante aju tz'aklxix cye cycyakil c'loj xjal ojtxi ex keju che ul itz'j te tibajxi, 18cye keju in japun tyol cyu'n, aju cyaj bant ti'j tu'n cyuc'il cyxe'chel, ex minti' nnic' tna'l cyu'n tu'n t-xi cyniman ke tmandamyent. 19Ma cub tk'o'n Kman tk'ukbil te tcawbil tuj cya'j, ex in cawin tibaj tcyakil. 20Cyk'onxe chjonte te Kman akeye anjel at nim cyipune ex in cybincha'ne aju in tzaj k'ma'n cyeye, ex tocxix cywi'ye ti'j tyol tu'n t-xi cynimane. 21Cyk'onxe chjonte te Kman akeye ate'ye tuj cya'j nim cyajlale ex in che ajbene te, ex in bant aju tajbil cyu'ne. 22Cyk'onxe chjonte te Kman cycyakile bincha'n keye tu'n, ate'ye tuj tcyakil lugar te tcawbil. Cxel nk'o'ne chjonte te Kman tu'n tcyakil wanmiye.

will be added

X\