SALMOS 102

1Nman Dios bintza nna'j Diose, in chin kanine onbil teya, chin tbintza. 2Mi'n txi tewan tiba nwitze oc in tzaj yajbil wi'je; bix chin tzaj tbi'na, bix chin tzaj ttzak'we'n naja oc ntxocone ti'ja. 3Porque jurat in baj nchwinklale ic tza'n sib, in che tzaj julin nbakile mer ic tza'n k'ak', 4niban tbaj tipun wanmiye ic tza'n c'ul in tzkij; ex minti'tl nganiye tu'n nwa'ne. 5niban toc lac'e' ntz'umile cyi'j nbakile tu'n tlaj nimxix in chin ayayane. 6Ic ntene ic tza'n jun ẍin at tuj tzkij tx'otx', ex ic tza'n jun xitx' at cyxol ke ja o che baj xitj. 7Minti' in chin tane. Ic ntene ic tza'n jun chyu'j tjunalx tjax twi ja. 8Minti' in xi cycolin aj k'oj tu'n cyyasun wi'je, ex in ajben nbiye cyu'n tu'n t-xi cykanin mya ba'n ti'j juntl xjal. 9Te t-xel pan in xi nwa'ne tza'j; ex in baj t-smon tib ta'l nwitze tuj nc'aye 10tu'n tlaj tk'oja ex ttx'u'jila. Ma chin jaw ttzyu'na ex te tibajxi ma chin ex t-xo'na. 11Aju nchwinklale ic tten ic tza'n xlecun in cub naj; in chin oc tzkije ic tza'n c'ul. 12Atzun teya Nman, in cawina te jumajx; cucx ctzajel na'n tbiya. 13We'ctza, k'ak'antz tc'u'ja ti'j tnam Sión porque ma japun baj tk'ijlalil; ma pon or tu'n tcub tnajsa'na til. 14In che bisun ke tmajena cyi'j ke abj ate' tuj tnam, ex in tzaj ta'w tuj cyanmi cyi'j ke ttx'akan buy cub. 15Cycyakil nasyon ex ke rey ate' twitz tx'otx' cjawil cynimsa'n tbi Kman tbanilxix 16oc tjaw tbincha'n juntl maj aju tnam Sión ex oc tyec'unte tib tuj tajwalil. 17Ctzajel tbi'n cyna'j Dios keju otok che cyaj colin nej ex ctzajel tbi'n aju cycubsbil. 18E tcyaj tz'ibet jlu te cye ke xjal che ul itz'j te tibajxi, tu'ntzun tjaw cynimsa'n tbi Kman. 19Max tuj cya'j tzaj tque'yin Kman; twitz tx'otx' tzaj tque'yin max tuj tja xjan, 20tu'n cytzaj tbi'n keju ate'cx pres in che ok' ex tu'n cyclet keju tcub cysentens tu'n cycyim; 21tu'ntzun tpacbanjtz tbi Kman tuj Sión ex tu'n tjaw nimset tbi tuj tnam Jerusalén, 22oc toc cychmon cyib ke xjal najl cyuj cycyakil nasyon cyuc'ix ke rey, tu'n cyc'ulun te. 23Tu'n ma tz'el ti'n wipune tuj be; ma tz'oc tlak'ba'n tuj nk'ije. 24Xi nma'ne te cyja': Nman Dios, mi'n tak'a ambil tu'n ncyim naje na'nxtok tjapun wabk'iyile. Atzun teya minti' bajsbil te tabk'iyila. 25Cub tk'ukba'na twitz tx'otx' atxix t-xe tnejel; tu'nxa o bant cya'j. 26Tcyakil jlu cnajel, atzun teya cucx ctela te jumajx. Tcyakil jlu cbajel ic tza'n jun xbalun; tu'na cch'expetel, ex bi'x cch'expetelx ic tza'n jun xjal in baj tch'expu'n t-xbalun. 27Atzun teya cucx ttena te jumajx, ex minti' bajsbil te tabk'iyila. 28Ke cyc'wa'l tmajena oc che ank'il tuj segurxix, ex ke cyiyjil che bel ten twitza te jumajx.

will be added

X\