SALMOS 10

1Nman ¿tiku'n najchak in cyaj tena? ¿Tiku'n in xi tewan tiba tuj tk'ijlalil c'ixbisabl? 2Ke xjal mya ba'n in jaw cyniman cyib, in baj cyyajla'n ke meba xjal; pero ax che cyjel tzyu'n cyu'n ke c'obil cyu'nx otok cub cyk'o'n. 3Ke xjal mya ba'n in jaw cyniman cyib ti'j cyex cyajbil; ex ke xjal in pon cyc'u'j ti'j nimcu, ic'un Kman cyu'n ex in che yolin mya ba'n ti'j. 4Ke xjal mya ba'n in jaw cyniman cyib ex in cyma'n: Minti' Dios at. Mi a'l jun jacu tzaj kaninte tajlal kak'unben, che chi. Atzun jlu in cub cyximan. 5Masque icju, cucx nne'l ba'n aju in cybincha'n. Minti' nne'l cynic' cyi'j ke tleya. In che oc ten xmayil cyi'j ke aj k'oj cyi'j, 6ex in cub cyximan: Mi a'l jun jacu xcye' ki'j tu'n kcub tz'ak, ex mlayx tzaj jun ti'xti mya ba'n ki'j, che chi. 7Nojni tuj cytzi' xjal lu tu'n yasbil, tu'n nic'aj yol, ex tu'n cyyol in cub cyyajla'n ke xjal. Nok tocx tuj cytzi' ke yol mya ba'n tu'n cyyajlan cyi'j xjal. 8In che cub ten xk'ukil cyuj ke aldey, ex tuj ewaj in cub cybyo'n jun xjal minti' til. Minti' nne'l cyi'n cywitz cyi'j ke xjal mi a'l jun colol cyi'j; 9ic cyten ic tza'n jun balun tocx tuj tjul, max tuj cyewbil in che cub ten xk'ukil cyi'j ke xjal meba, in che ayon tu'n cytzyet cyu'n ex oc in che tzyet cyu'n, in xi cyjawo'n. 10In che cub joke', nno'c cyyut'in cyib, ex in che'x t'icpaj tzyulte cye xjal mi a'l jun colol cyi'j. 11Tuj cywitz xjal mya ba'n, nnic' tna'njtz tu'n Dios ex txayin twitz Dios tu'n xbalun ex misicyer jun in til. 12We'ctza Nman, nukpinx tk'aba. Mi'n tzic' tna'l tu'na ke xjal ate' tuj bis. 13Nman Dios, ¿tiku'n c'oquel xmayina cyu'n ke xjal mya ba'n, akeju in che ximan ti'j ka mi'n tzaj tkanin Dios tajlal cyak'unben? 14Nman, ma tila aju c'ixbisabl in cybincha'n ki'je, ojtzki'n tu'na tcyakil jlu ex cbel tk'o'na cycastiw ic tza'nx cybinchben. Aju xjal minti' tipun tu'n tclonte tib in xi tokxenan tib teya; aya in onin cyi'j ke c'wa'l minti' cyman ex cytxu'. 15K'i'mela cyipumal ke xjal mya ba'n, k'o'nca ke tuj xjel ti'j tcyakil cybinchben mya ba'n. 16Ate Kman rey te jumajx; ke txkantl nasyon mya nimal Dios oc che elex lajo'n ke tuj tx'otx' etzan tu'n. 17Nman, in tzaj tbi'na cyna'j Dios ke xjal mans, in xi tcyuwsa'na cyc'u'j ex in che tzaj tbi'na ke. 18Binchanxa cyi'j ke c'wa'l minti' cyman ex cytxu' ex ke xjal in che baj yajla'n, tu'ntzun mi'n cucx cyxobtzan xjal banin ke ti'j tx'otx'.

will be added

X\