PROVERBIOS 9

1Aju xjal at tnabl jaw tbincha'n jun tja ex baj t-xpe'lin wuk tkan; 2cub tbyo'n txkan alumaj tu'n tbant jun nintz wa'n tu'n, ex baj tbincha'n ta'l twitz uva te c'abj tbanil wen, ex cub tk'o'n tcyakil twi mes, 3ex e je'xtzun t-sama'n ke tmajen xu'j k'malte tkanil cyuj ke lugar ma' cyjaw tibaj tnam, che chi cyja': 4Cytzaje, akeye cu'xun na'nx toc cynable. Ax icx xi tma'n cye ke xjal minti' cynabl: 5Cytzaje wa'l ti'j wabj ma bant wu'ne ex che c'ane ti'j ta'l twitz uva ma baj nbincha'ne. 6Mi'n cucx che oque minti' cynable, ex che ank'iltzune; che bete ic tza'n jun xjal at tnabl, chi xjal at tnabl. 7Ka ma txi tcawina ju xjal jawni twitz ex binchal mya ba'n, c'oquel tzokpaj ti'ja tuc'il tyol mya ba'n ex c'elel ic'una tu'n. 8Mi'n tz'oc tmayo'na ju xjal jawni twitz, tu'ntzun mi'n tel ic'una tu'n; cawinxa ju xjal at tnabl ex mas ctel tc'ujlalil ti'ja. 9K'onxa xnak'tzbil teju xjal at tnabl ex c'oquel mas tnabl; k'onxa xnak'tzbil teju xjal tz'aklxix ex ctel mastl tojtzkibl. 10Ka ma ko niman te Kman, atzun in xe't tu'n tten knabl, ex ka ma tz'el knic' ti'j ju Dios Xjanxix, atzun in cnet ojtzkibl ku'n. 11Tu'n nabl cxel lak'e' tuj tk'ija, ex nim k'ij c'ank'ila. 12Ka at tnabla, texa c'ajbel jlu; ka jawni twitza, tu'nxa ctzajel ti'na mya ba'n tibaja. 13Aju xu'j minti' tnabl in che jaw tilj xjal tu'n tyol, mya tuj ttxolil in yolin ex minti' ch'in ba'n tu'n. 14In cub ke' tuj jun siy ttzi tja, tuj jun lugar mas ma' tjaw tibaj tnam, 15ex in che tzaj ttxco'n ke xjal in che bet tuj cybe ex in xi tma'n cye: 16Cytzaje akeye cu'xun na'nx toc cynable. Ax icx in xi tma'n cye xjal minti' cynabl: 17Aju a' elk'a'n in tzaj mas chi' tc'anjtz; ex aju pan in xi wa't tuj ewaj c'oc'j wabl te, chi xu'j. 18Ex minti' ba'n cyu'n xjal ka atzun ta' camic tuj tja xu'j lu, ex keju in che txconjtz tu'n, max cycu'x ke t-xe'pun cynajbil cyimni.

will be added

X\