1 Aju ojtzkibl in jaw tk'ajk'ajel twi' cyuwxix wen, ex aju nabl in k'ajt twi'. 2 In cub we' cywi' ke witz, ex in cub ten jatum in baj cypa'n cyib ke be, 3 in k'ajt cytzi tpwertil tnam, ax icx jatum nno'cx be tuj tnam, ex in tma'n cyja': 4 Akeye xinak, te cyeye aju nyole lu: 5 Akeye cu'xun minti' ch'in ba'n cyu'ne ex minti' cynable, cyxnak'tzam cyibe tu'n tten cynable ex tu'n tel cynic'e ti'j alcye tu'n tbant cyu'ne. 6 Cyk'ontz cywi'ye ti'j ju yol cxel nma'ne ma' toclen ex tz'aklxix. 7 Ax toc aju yol cxel nma'ne, porque mi'n waje tu'n t-xi nma'ne nic'aj yol. 8 Tcyakil nyole cxel nma'ne puro tz'aklxix; mi jun mya ax toc ex mi jun ẍo'c ti'j. 9 Clarxix ke nyole ex tz'aklxix tuj twitz ju xjal at tnabl ex elni tnic' ti'j. 10 Te t-xel sak pwak ex k'an pwak, cyjyome aju xnak'tzbil ex aju ojtzkibl. 11 Aju nabl mas wi'yilxix cywitz ke tal abj tbanilxix, ex aju ti'xti nim in pon cyc'u'j xjal ti'j mlayx pon ic tza'n ju nabl. 12 Akine nabl, junx najl kine tuc'il ojtzkibl, at nnable ex mejorxix consej at wuc'ile. 13 Aju tu'n kniman te Kman, atzun tu'n tel kic'un ju mya ba'n. Aju xjal in jaw tniman tib, aju xjal jawni twitz, aju cybinchben xjal mya ba'n ex ju nic'aj yol, ic'un ke wu'ne. 14 Akine in chin cub ximante tu'n tbant jun ti'xti ex in japun wu'ne; ex wuc'ile ta' nabl ex ipumalj. 15 Wu'ne in bant cycawin ke rey ex wu'ne in che bant ke ley tuj tumelxix cyu'n cawil. 16 Wu'ne in bant cycawin ke nejenel cye nasyon, ex wu'ne in xi cybincha'n jwes ti'j cyxtis xjal. 17 C'ujla'n ke xjal wu'ne, akeju c'ujla'n kine cyu'n, ex keju in che jyo'n wi'je, in chin cnete cyu'n. 18 Wu'ne in xi nk'o'ne cyk'inumabl xjal ex nimbil cye, ex wu'ne nne'l ba'n tcyakilju in cybincha'n. 19 Aju in xi nk'o'ne cye mas ba'n twitz k'an pwak tbanilxix, ex aju in xi woyine cye mas ba'n twitz sak pwak tbanilxix. 20 In chin bete tuj be jikun ti'j, ex in chin bete tuj be tz'aklxix. 21 Cxel nk'o'ne cyetzbil keju in che c'ujla'n weye. 22 A kman o binchante weye t-xe tnejel, tej na'nxtok tbant jun ti'xti tu'n. 23 In binchanjtze tu'n atxix t-xe tnejel, tej na'nxtok tbant jun ti'xti tu'n. 24 In itz'je tu'n tej na'nxtok cybant ke nintz mar, ex tej na'nxtok cyjaw jlet ke nima ex ke twi a'. 25 Tej na'nxtok cybant ke nmak witz ex ke tal witz, otok chin itz'je tu'n Kman; 26 ex tej na'nxtok tbinchet tx'otx', mi ke cojbil mi ch'in tkukil tx'otx'. 27 Tej tbant twitz cya'j, aju tjaw tibaj nintz mar, lu kine atine. 28 Tej cybant ke muj twitz cya'j, ex tej cyjaket ke twi a' max t-xe mar, 29 ex tej tcub tk'o'n tmojonil ex tej t-xi tma'n te tu'n mi'n tex kojl tuj tlugar ex tej tcub tk'o'n tk'ukbil tx'otx', 30 lu kine atine ttxlaj tu'n tcub ximet alcye tu'n tbant. Tcyakil k'ij o tzalaj wi'je ex cucx in chin tzalaje twitz. 31 In chin tzalaje ti'j twitz tx'otx' otok bant tu'n, ex in chin tzalaje cyi'j ke xjal. 32 Atzun ja'lo, akeye ncy'ajal, chin cybintze; cybinchame aju in xi nma'ne cyeye, ex tu'n jlu che tele tuj tzalajbil. 33 Cyk'onx cywi'ye ti'j xnak'tzbil ex mi'n tz'el cyic'une ju nabl. 34 At tzalajbil teju xjal in tzaj tk'o'n twi' ti'j nyole, ex tcyakil k'ij in ayon ttzi njaye tu'n ncnete tu'n. 35 Porque ka ma chin cnete tu'n, cnetel tchwinklal ex cnetel t-xtalbil Kman tu'n; 36 pero ka ma tz'el tpa'n tib xjal wi'je, tu'nx cbajel tc'ixbisan tib, ex cycyakil keju in chin el ic'une cyu'n in che jyon ti'j camic.
