PROVERBIOS 7

1Nc'wa'l, nimanxa nyole; c'u'nxa ke nmandamyente tuj tanmiya. 2Nimanxa ke nmandamyente ex ke nxnak'tzbile; cwentinxa ke ic tza'n nno'c tcwentina ke t-santil tbak' twitza, tu'ntzun tank'ina. 3C'alo'n oca ke cyi'j ke tal tk'aba, ex awa'n cu'xa ke tuj tanmiya. 4K'o'nca ju nabl ic tza'n tanba, ex k'o'nca ju ojtzkibl ic tza'n tamiwoya. 5Porque ake jlu che clol teya twitz ju xu'j aj pajil ex twitz juntl xu'j cye'yix tponlen tyol. 6At jun k'ij in chin que'yintoke ttzi nventaniye, 7o wile jun c'loj cu'xun minti' in che ximan ti'j alcye ba'n tu'n tbant cyu'n, ex oc nk'o'ne cwent ti'j jun jumajx minti' tnabl. 8Tej tpon tuj scyin, ic'x tuj cay tu'n tpon tja ju xu'j aj pajil, 9otok tz'oc kax ex cyja'tok toc yupj. 10Etz naj ju xu'j canul ti'j cu'xun lu, tbinchanxix tib tuj t-xbalun, aju in ajbenxix tu'n tu'n tyaẍin, ex jawni xmoxin, 11nokxix lonx jun xu'j jawni twitz tu'n tbinchante mya ba'n ex minti' in ten tja, 12nok in bet tic' tuj cay, tuj plas ex tuj scyin ex in xk'ukin ti'j nok alcyexcu xinak ma tzic'x tuj cay. 13Tzajtzun chle'n cu'xun tu'n xu'j ex el ttz'uban twitz minti' tch'ixwi ti'j, ex xi tma'n te: 14O txi ntziyane tu'n t-xi nk'o'ne jun alumaj te oyaj te mojbabl tibil ex ma japun wu'ne ja'lo. 15Cyja'tzun ma chin tzaje canul ti'ja, porque at nim nganiye tu'n toc nque'yine twitza ex lu ma cneta wu'ne. 16Ma cub nlic'une ju xnok'al twi nwatbile ktz'umin twitz, tzajni tuj Ejipt, 17ex ma baj nk'o'ne perjum ti'j; atzun ke jlu: Mirra, áloe, ex canela. 18Ttzaja, ex jacu ko achin wen tuj enter konic'an, 19porque mi a'l nchmile, ma txi' tuj jun tbe najchak; 20ma txi ti'n jun ch'u'ẍ pwak ex maxi tzul meltz'aj ocxi ttijin xjaw, chi xu'j. 21Cub ti'j tnabl cu'xun tu'n tyol xu'j cye'yix tponlen wen; 22minabencu oc lpe' naj cu'xun ti'j ju xu'j, ic tza'n nno'c lpe' jun wacẍ ti'j jun xjal tu'n t-xi k'i'n tuj biybil te, ex ic tza'n jun masat oc in tzyet tu'n tramp; 23in tzaj xo'n naj jun plech ti'j tanmi tu'ntzun tcyim. Ic tten ic tza'n jun chyu'j nno'cx tk'on tib tuj c'obil, minti' ba'n tu'n ka te tzuybil te tu'n tnaj. 24Cyja'tzun nc'wa'l, chin tbincuya ex k'ontz twi'ya ti'j nyole. 25Mi'n txi tk'o'na t-ximbetza ti'j ju xu'j lu, mi'n tz'oc lpe'ya ti'j, porque jacu naja, 26pwes nimxi xjal o che cub tbyo'n ex nimxi jumajx o che naj tu'n. 27Aju tu'n kxi' tuj be in pon ma tja, junx ta' ic tza'n tu'n kcu'pun max tuj cynajbil cyimni.

will be added

X\