PROVERBIOS 6

1Nc'wa'l, ka ma cyaj we'ya ti'j tc'as jun tuc'ila ex ka ma txi ttziyana tu'n tchjet tc'as jun xjal minti' ojtzki'n tu'na, 2tu'nxa in baj tc'oban tiba, ex tu'nx ju tyola in tzyeta. 3Nc'wa'l, clom tiba yaque ma cub tz'aka tuj tk'ab tuc'ila. Aju tu'n tbinchanteya ja'lo, atzun jlu: Mansin cub tiba ex cubsana twitz ju c'asbenal tu'n tel ti'n tbiya ti'j tc'as. 4Mi'n tzic' tana ex mi'n ojlana ka na'nxtok tbant ti'j jlu tu'na, 5tel oka ic tza'n nne'l ok jun masat twitz jun cambal, ex ic tza'n nne'l ok jun chyu'j ti'j jun c'obil. 6Aya xjal cy'aj, txi'ya que'yil cye ke snic; k'o'nca cwent cyi'j alcye in cybincha'n ex cano'mila cyi'j: 7Masque minti' jun nejenel cyxol ex minti' jun caporal cyi'j ex minti' jun k'malte cye alcye tu'n tbant cyu'n, 8in baj cyc'u'n cywa tuj coresma, ex in baj cychmo'n tuj tk'ijlalil oc in jaw twitz awal. 9Aya xjal cy'aj, ¿jtoj ban tel ti'n twatla? ex ¿jtoj ban tjaw we'ya? 10Tu'n tlaj cucx ttana ex cucx tpich'un twi'ya tu'n watl ex cucx tcub ttz'ulin tk'aba tu'n ttana, 11tzul mebayil ti'ja ex c'oquel tzokpaj ti'ja ic tza'n jun betin xjal k'i'n ubl tu'n. 12Aju xjal binchal mya ba'n ex ic'bil twitz, o'cx nic'aj yol in yolin ti'j; 13in cub t-xmutz'in ttzi twitz tu'n tyec'unte ka mya ax toc aju in tma'n ex in tyec'un ke señ tu'n tkan, ex in xi tch'icun cyu'n ke tal tk'ab; 14aju tnabl xjal lu jumajx tuj mya ba'n ta', o'cx in ximan tu'n tbinchante mya ba'n, ex nno'c tilil tu'n tu'n cyk'ojin xjal cyxolx. 15Cyja'tzun nok minaben ctzajel jun xitbil ti'j; jurat cnajel, ex mlay bant tclon tib. 16At kak ti'xti ex ka wuk jumajx ic'un tu'n Kman, ex atzun ke jlu: 17Aju xjal in jaw tniman tib, aju xjal nic'al yol, aju xjal in cub byonte cye ke xjal minti' cyil, 18aju xjal in ximan ti'j alcye mya ba'n tu'n tbant tu'n, aju xjal in xi kelan tu'n tbinchante mya ba'n, 19aju testiw sbul ex nic'al yol, ex aju in to'yin cye xjal cyerman cyib tu'n cyk'ojin cyxolx. 20Nc'wa'l, nimanxa ke tmandamyent tmana, ex mi'n tz'el tic'una aju xnak'tzbil in tk'o'n ttxu'ya. 21Awa'n cu'xa ke tuj tanmiya, ex k'on cuba ke tkula; 22atzun ke jlu che ẍaklul teya tuj tbeya ex c'oquel cwentina cyu'n oc tcub tana, ex oc che yolil tuc'ila oc tel twatla. 23Porque ke mandamyent ic cyten ic tza'n ttxa'n tzaj, ex ke xnak'tzbil jun spic'un ke. Oc ttzaj k'o'n xnak'tzbil teya ex oc tcub cawina, atzun jlu be te chwinklal te teya. 24Oc che colil ti'ja twitz ju xu'j aj pajil ex twitz junxitl xu'j aju jawni xmoxin tu'n tyol. 25Ex mi'n tz'oc tachina tu'nju mejorxix que'yin; ex mi'n txi tk'on tiba tu'n ttzyeta tu'n, tu'nju in tzaj tque'yin ti'ja. 26Aju xu'j jawni twitz cyuc'il xinak in ke' tc'u'j nok tu'n ch'in twa, atzun teju xu'j aj pajil, o'cx nno'c lpe' ti'j jun xjal k'inun ma' t-xilen. 27Ka at jun ma tz'oc tk'o'n k'ak' ttzi t-xu'c, ctz'e'yil t-xbalun. 28Ka at jun ma tzic'x bet tibaj ttxa'n xk'a'l in c'ant k'ak' ti'j, ctz'e'yil tkan. 29Ax icxtzun ctembil aju xinak in cub tan tuc'il t-xu'jil tuc'il; mlay tzic'x ti'j tu'n mi'n tcub tcastiw. 30Minti' nne'l cyic'un xjal aju elek' ka in elk'an nok tu'n tnoj tc'u'j; 31pero ka ma cnet lu in elk'an, il ti'j tu'n taj tk'o'n wuk maj t-xel, ex tu'n t-xi tk'o'n tcyakil aju at te. 32Minti' tnabl ju xinak in tbincha'n aj pajil. Aju xinak in tbincha'n icju, tu'nx tib in naj. 33Cbajel baju'n, c'elel ic'un, ex aju tch'ixwi mlayx naj. 34Aju xinak at twitz ti'j t-xu'jil, jurat in tzaj tk'oj ex mlay cub tnajsa'n til juntl; il ti'j cbel tcastiw tu'n; 35mlay tc'am chojbil ti'j ju otok bant tu'n juntl ex mlay cub tc'u'j tu'n nimcu oyaj.

will be added

X\