1 Nc'wa'l, nimanxa aju nabl in xi nk'o'ne ex k'ontz twi'ya ti'j wojtzkible 2 tu'ntzun tel tnic'a ti'j alcye ba'n tu'n tbant tu'na, ex jacu yolina jun yol tuc'il ojtzkibl. 3 Aju tyol ju xu'j aj pajil ba'nxix tbinx, ax icx tk'ajk'ajel twi' puro txubtxaj tbinx wen; 4 pero te tibajxi mas c'a nno'c ic tza'n c'ul t-xc'a wacẍ, ex mas at ttzi' ic tza'n jun spad te cabe pac' ttzi'. 5 Aju in bet tuc'il xu'j lu atzun in xi' tuj camic; porque aju be k'i'n tu'n txuc in xi' tuj cynajbil cyimni. 6 Minti' taj xu'j lu ti'j be te chwinklal ex minti' nno'c tk'o'n tcwent ti'j tbe mya tuj tumel ta'. 7 Cyja'tzun nc'wa'l, binxa aju in xi nma'ne ex mi'n tz'el tpa'n tiba cyi'j ke nxnak'tzbile. 8 Tel lak'eya ti'j xu'j aj pajil; ex mi'nlpe txi lak'eya ttzi tja, 9 tu'ntzun mi'n t-xi tk'o'na tk'inumabla cye junxitl xjal ex tu'n mi'n toc lak'e' tuj tabk'iyila tu'nju xu'j jawni sbun, 10 ex tu'n mi'n tbaj cywa'n junxitl xjal aju in tk'o'n tak'unbena, aju ma cnet tu'na tu'n sictle'n; 11 ex tu'n mi'n tjaw ok'a oc tpon or tu'n tcyima, oc tnaj tcyakil t-ximlala tu'n yabil. 12 Ex c'oqueltzun tena k'malte: ¿Tza'n tten el wic'une aju o cawin wi'je? ¿Tza'n tten minti' xi nnimane aju oc mayonte weye ti'j mya ba'n? 13 Minti' xi nnimane ke xnak'tzal weye ex minti' xi nk'on nwi'ye ti'j cyyol keju e k'onte xnak'tzbil weye. 14 Ex nok tu'n ch'intl ch'ixmi in naje tuj mya ba'n cywitz cycyakil tnam xjal. 15 Ka in txket ti'j tc'u'ja, c'ana a' tuj xoch etzan tu'na. 16 Mi'n baj tko'na a' in jatz jlet tuj tjaya; mi'n baj tyajana tu'n tbaj tko'na tuj cay. 17 Aju xoch ex aju a' nok tecuya jlu, mya te juntl; mi'n txi tk'o'na cye junxitl xjal. 18 Cy'iwla'nxwit ju twi a' aju etzan tu'na. Tzalajxa tuc'il xu'j aju moje'ya tuc'il tuj tcu'xumala. 19 Icwit tz'e'la te teya ic tza'n jun ttxu masat tbanilxix que'yin. Tzalajxa ti'j t-xu'jila oc ttzaj chlena tu'n, ex tzalajxa ti'j tc'ujlalil at ti'ja. 20 Nc'wa'l, ¿tiku'n c'oquel t-xo'n tganiya ti'j jun xu'j aj pajil? ex ¿tiku'n ctzajel tchle'na junxitl xu'j? 21 In tque'yin Kman tcyakil aju in cybincha'n xjal, ex toc twitz cyi'j oc in che bet tuj cybe. 22 Aju xjal binchal mya ba'n cnajel tu'nx tbinchben mya ba'n; ex tu'nx til cbajel c'alo'n ic tza'n tu'n sakbak. 23 Cnajel tu'nju minti' in tjac'unte tib; cxe'l tuj najen tu'nju cyuw twi'.
