PROVERBIOS 4

1Akeye nc'wa'l, cybinxe ke xnak'tzbil in tk'o'n cymane; cyk'onx cywi'ye ti'j tu'ntzun toc cynable. 2Ma txi nk'o'ne jun xnak'tzbil ba'n cyeye, cyja'tzun mi'n cyaj cycoline ke nxnak'tzbile. 3Ax icx weye, c'wa'lbaj kine tej ntzaj ch'iye; nim in c'ujlanjtze tu'n ntxu'ye, 4ex tzaj tk'o'n nmane xnak'tzbil weye, chi cyja': C'u'nxa nyole tuj tanmiya; binchama aju ma txi nma'ne teya, ex c'ank'iltzuna. 5Jyoma aju nabl ex aju ojtzkibl; mi'n tzic' cyna'l ke nyole tu'na ex mi'n tz'el tpa'n tiba cyi'j. 6C'ujlama aju nabl, mi'n cyaj tcolina, ex atzunju ccolil ti'ja. 7Aju tu'n tbant tu'na tnejel twitz tcyakil, jyoma aju nabl ex aju ojtzkibl. 8C'ujlama ex cjawil nimsa'na tu'n; tzyuma ex ck'onjtzel nimbil teya tu'n; 9ctzajel tk'o'n jun c'albil twi'ya tbanilxix, ex c'oquel ic tza'n jun coron tjax tuj twi'ya te nimbil teya. 10Nc'wa'l, ka ma che'x tbi'na ke nyole, ex ka ma che'x tnimana, ctela nim k'ij twitz tx'otx'. 11Akine chin xel k'inte teya tuj be jatum tu'n tten tnabla; ex wu'ne cbetela tuj be jikun ti'j. 12Oc texa betel mlay ten jun tolsabl tuj tbeya, ex ka ma jaw ojkelena mlay jaw tolja. 13C'u'nxa xnak'tzbil tuj tanmiya ex mi'n cyaj tcolina; xnak'tzam tiba ti'j, porque chwinklal jlu te teya. 14Mi'n tz'oc lpe'ya ti'j cybinchben xjal mya ba'n, ex mi'n tz'oc lpe'ya ti'j cymod mya ba'n. 15Mi'n beta tuj cybe; pa'n el tiba cyi'j, ex lajonx teya tbe, 16porque mya txubtxaj in che tan ka minti' ma cybincha mya ba'n; ex miban tz'ocx watl tuj cywitz ka na'nxtok tcub tz'ak jun xjal cyu'n. 17Aju cyelk'aben ex ju mya ba'n in bant cyu'n, ic tten te cye ic tza'n cywa ex cyc'a. 18Atzun cybe keju tz'aklxix ic tten ic tza'n spic'un oc ttzaj t-xe cya'j ex in spic'e' ttzaj ocxi t-spic'e' tcyakil tu'n t-spic'umal k'ij. 19Atzun cybe keju binchal mya ba'n puro klolj tuj; ex minti' ba'n cyu'n al i'j in che jaw tolj. 20Nc'wa'l, bintza nyole ex k'ontz twi'ya ti'j, 21mi'n cyaj tcolina ex c'u'nxa tuj tanmiya. 22Porque aju yol lu in tk'o'n chwinklal cye ke xjal in che jyon ti'j, ex in ten cyximlal tuj txubtxaj tu'n. 23Aju mas ba'n tu'n tbinchanteya twitz tcyakil, k'onca cwent ti'j t-ximbetza, porque ti'j jlu in tzaj chwinklal. 24Mi'n yolina ti'j yol mya ax toc, pa'mil tiba ti'j nic'aj yol. 25Que'yinxa aju be tcub twitza ex mi'n tz'el ti'n twitza ti'j. 26K'o'nc tcwenta ti'j jatum cbel tk'o'n tkana, ex atzun k'oncu tkana tibaj tx'otx' cyuw tten. 27Mi'n tz'el tzpeta ti'j tbeya, ex pa'mil tiba ti'j be mya ba'n.

will be added

X\