PROVERBIOS 31

1Ke tyol Lemuel aju rey te tnam Masa, akeju yol tzaj xnak'tza'n te tu'n ttxu', chi cyja': 2Wal, wu'ne ul wa'line ex xi ntziyane te Dios tu'n tajbena te, ¿ti mastl cxel nma'ne teya? 3Mi'n baj tyajana tipuna cyuc'il ke xu'j, porque tu'n cylaj ke xu'j in che el tzpet ke rey. 4Lemuel, mya ba'n tu'n t-xi cyc'a'n ke rey ex ke cawil aju vin ex k'e'n, 5porque mya yajcu tzic' tna'l ley cyu'n ex mlay txi cybincha'n cyi'j ke xjal meba ex ate' tuj bis. 6K'onxa k'e'n cye ke xjal ch'ix cycyim ex k'onxa vin cye keju in che bisun; 7e t-xi cyc'a'n tu'ntzun mi'n ttzaj cyna'n aju cymebyil ex aju c'ixc'oj nnic'x cyu'n. 8Yolina ti'j ju xjal miban yolin tu'ntzun tclet; ex colina ti'j ju xjal mi a'l jun colil ti'j. 9Yolina, binchanxa cyi'j tuj tumelxix; binchanxa cyi'j ke xjal meba ex keju minti' ch'in at cye. 10Aju xu'j puro ba'n tmod cwest tu'n tcnet, ex mas ma' t-xilen cywitz ke tal abj tbanilxix. 11Aju tchmil nno'c ke'xix tc'u'j ti'j, ex minti' jun ti'xti atx taj te. 12In tbincha'n ba'n te tchmil tcyakil k'ij tuj tank'ibl ex minti' in tbincha'n mya ba'n ti'j. 13In xi' jyol lan ex nok' lino, ex tuc'il tzalajbil nno'c ten chmol ti'j. 14Aju xu'j lu najchak in tzaj ti'n twa, ic tten ic tza'n ke comersyant in che'x k'il cyc'a'ẍ tuj barc najchak. 15Na'nxtok tcub k'ij, in jaw we' ex in oc ten c'a'chal cye tal ex ke tmajen xu'j. 16Ka ma tz'oc tque'yin jun piẍ tx'otx', in cyaj tlak'o'n; ex tu'nju tpwak in tcamba'n ti'j tak'unben, in cu'x tawa'n tkan uva. 17Nno'c mastl tipun, ex tu'n tcyakil tc'u'j in oc ten ak'nal. 18Toc tcwent ti'j tza'n tten tu'n tch'iy tc'a'ẍ, ex te konic'an yaj in xi tcolin tak'un. 19Tu'nx in baj tchko'n nok' ex in cu'tz tchmo'n. 20In onin cyi'j ke meba ex cyi'j keju atx taj cye. 21Minti' in bisun cyi'j keju ate' tuj tja tu'n tlaj ttxa che'w, porque cycyakil ke toc cyxbalun pim wen. 22Tu'nx ju xu'j in che bant ke ttxo'w, ex puro tbanil t-xbalun toc. 23Aju tchmil ojtzki'nxix cyu'n xjal oc tcub ke' ttzi tpwertil tnam cyxol ke xjal ma' cyoclen. 24In bant xbalun ex c'itzbaj tu'n, ex in xi tc'ayin cye ke comersyant. 25At tipun ex niman cyu'n xjal, ex minti' in baj tc'u'j ti'j ju tzul tuj k'ij nchi'j. 26At tnabl tu'n tyolin, ex in tk'o'n xnak'tzbil tuc'il tc'ujlalil. 27Toc tcwent ti'j tza'n tten tu'n cyten ba'n keju ate' tuj tja, ex in ak'nan wen tu'n twa'n. 28Ke tal in che yolin ti'j: Puro ba'n ktxu'ye, che chi. Ax icx tchmil in tzalaj ti'j ex in xi tma'n te: 29At nimcu xu'j puro ba'n, pero aya mas ba'n cywitz cycyakil, chi tchmil te. 30Mlay ke' kc'u'j ti'j ka ba'n jun xu'j nok tu'nju tbanil que'yin, porque a jlu nok te cab k'ij in ten; atzunju xu'j ba'n niman te Kman, atzunju ba'n tu'n kyolin ba'n ti'j. 31Che yoline ba'n ti'j cywitz cycyakil tnam xjal; ex che yoline ti'j tcyakil tbinchben ba'n.

will be added

X\