PROVERBIOS 30

1Ke tyol Agur, aju tcy'ajal Jaqué aju aj Masa. Xi tma'n Agur ke yol te Itiel ex te Ucal, aju yol otok tzaj tma'n Dios te cyja': 2Akine minti' nnable ic tza'n ke mastl xinak, ex minti' wojtzkible ic tza'n cye mastl xjal. 3Minti' o chin xnak'tzane ti'j tu'n toc nnable, ex minti' ba'n wu'ne ti'j ju Dios xjan. 4¿Alcye o txi' aj ex o cu'tz tuj cya'j? ¿Alcye jun o cub tzyunte cyk'ik' tuj tk'ab? ¿Alcye jun o baj balk'inte mar tuj t-xbalun te txaybil ti'j? ¿Alcye jun o cub k'onte ke tmojonil tx'otx'? Ka ba'n tu'na, k'mantza weye ti tbi ex ti tbi tc'wa'l. 5Tcyakil tyol Dios puro tz'aklxix ex minti' tpaltil; ex ate Kman cwentil cye keju k'ukl cyc'u'j ti'j. 6Mi'n tz'oc ttz'aksa'na juntl yol ti'j ju in tzaj tma'n, tu'ntzun mi'n toc mayo'na tu'n ex tu'n mi'n toc k'o'na te nic'al yol tu'n. 7Nok cabe nkanbetze ma txi nkanine teya Nman Dios; k'ontza ke jlu weye na'nxtok ncyime: 8K'i'n ela ju minti' tajben ex ju nic'aj yol wi'je, ex mi'n chin oc tk'o'na te k'inun ex mi te meba; o'cx k'ontza aju nwaye at tajben; 9porque ka ma sobryin nwaye, jacu bant tcub wewane ex jacu bant t-xi nma'ne ka minti' ojtzki'na wu'ne; ex ka minti' ma canun nwaye, jacu bant nxi'ye elk'al, ex tu'n jlu jacu chin yoline mya ba'n ti'ja. 10Mi'n jaw tnic'ana yol ti'j jun majen twitz tpatrón; mya yajcu tzaj tkanin jun mya ba'n tibaja ex jacu tzaj tcastiwoya. 11At junjun xjal in xi cykanin mya ba'n tibaj cyman, ex minti' in xi cykanin tu'n tcub cy'iwla'n cytxu'. 12At junjun in cyma'n ka minti' cypaltil, pero na'nx t-sakix tuj cyanmi tu'n cytz'ilil. 13At junjun nno'c cyk'on cyib te ma' cyoclen, ex tuc'il cynimbil cyib in xi cyque'yin cyi'j mastl. 14At junjun xjal ic tten twitz cye' ic tza'n spad, ex ke cycya' ic cyten ic tza'n puñal, tu'ntzun tel cyelk'a'n tcyakilju at cye xjal meba ate' tuj cytanmi. 15At jun tal ẍuk' sanguijwela tbi, ba'n c'an chic', at cabe tal ex o'cx in che kanin ti'j: K'ontza mastl chic' te kchiye, che chi. At ox ti'xti akeju mlayx bant tu'n cynoj, icxpe aju tcyajin mlayx tma acuxtzun jlu, chiwt, 16ex atzun ke jlu: Aju cynajbil cyimni, aju xu'j miban alin, aju tx'otx' minti' in baj tgan ti'j a', ex aju k'ak' mlayx tma: O'cx jlu cbajel tz'ey wu'ne, chiwt. 17Aju xjal nne'l ic'unte tman ex tc'i' txi tniman ttxu', ba'n tu'n cyjatz ke tbak' twitz cyu'n joj, ex ba'n tu'n t-xi chyo'n cyu'n ke c'utz. 18At ox ti'xti ex ka cyaje in chin jaw labine cyu'n ex minti' nne'l nnic'e cyi'j, 19ex atzun ke jlu: Tza'n tten in lipan t'iw twitz cya'j, tza'n tten in bet lobaj twi pic, tza'n tten in bet barc tibaj mar, ex tza'n tten in xi lpe' jun xinak ti'j jun k'apoj oc toc k'ajt ti'j. 20Aju in tbincha'n jun xu'j aj pajil, atzun jlu: In wa'n, nne'l t-su'n ttzi' ex in tma'n cyja': Minti' ma nbinchaye mya ba'n. 21At ox ti'xti in cybincha'n xjal bi'x in che jaw tilj xjal cyu'n, ex aju tcyajin mlayx tzic'x cyu'n xjal, ex atzun ke jlu: 22Aju xjal majen nno'c te rey, aju xjal minti' tnabl sobr twa at, 23aju xu'j ic'unxix in cnet tchmil, ex aju xu'j majen nne'l ti'n toclen xu'j aju tpatrón. 24At cyaje c'loj tal jil ate' twitz tx'otx' mas at cynabl cywitz ke xjal at cynabl, ex atzun ke jlu: 25Ke snic minti' cyipun, pero tuj coresma in baj cychmo'n cywa; 26ke cwatusa minti' cyipun, pero atzun in che najan cyuj ke toy' pic; 27ke ẍplon, masque minti' cyrey, pero cycyakil in che bet tuj c'lojin ex tuj tumelxix; 28ke ẍule, jacu che tzyet tu'n kk'ab, pero in che ocx max tuj tja rey. 29At ox mejorxix che que'yin oc in che bet, ax icx aju tcyajin mejorxix que'yin oc in bet, ex atzun ke jlu: 30Aju balun mas at tipun cywitz ke mastl txcup, minti' nne'l ok cywitz mastl txcup ex mi cywitz xjal; 31aju tzec' in jaw tniman tib cyxol ke ttxu ec'; aju tman chip in cub nej cywitz mastl chip, ex aju rey in cub nej cywitz ke t-soldad. 32Ka tu'nju minti' tnabla in jaw tniman tiba, ex ka o cub t-ximana tu'n tbinchanteya mya ba'n, tencuya ximal ti'j. 33Ka ma tz'oc tena chculte lech, cbantel mantequiy ti'j, ka ma tzaj t-sakma'na ttxa'na cyuw, c'eletz chic' tuj, ex ka ma tz'oc tic'le'na jun xjal tu'n ttzaj tk'oj, ctzajel k'oj cyxole tuc'il.

will be added

X\