1 Nc'wa'l, mi'n tzic' cyna'l ke nxnak'tzbile tu'na ex c'u'nxa ke nmandamyente tuj tanmiya, 2 porque clek'ebil tuj tk'ija cyu'n ex c'ank'ila tuj txubtxaj. 3 Mi'n cyaj tcolina aju c'ujlalil ex ju yol axix toc; k'o'n cuba ke tkula ic tza'n jun uwj. Awa'n cu'xa ke tuj tanmiya; 4 ka ma tbinchaya icju, ctzalajel Dios ti'ja ax icx ke xjal. 5 Ke'c tc'u'ja ti'j Kman tu'n tcyakil tanmiya ex mya tu'n toc ke' tc'u'ja ti'j texa tnabla. 6 Na'ntza Kman ti'j tcyakilju cbantel tu'na, ex a Kman cxel ẍaklun teya tuj be jikun ti'j. 7 Mi'n jaw tniman tiba ka at nim tnabla; nimana te Kman ex pa'n el tiba ti'j mya ba'n: 8 porque atzun jlu ic tza'n jun k'anbil teya tu'n toc tipun t-ximlala. 9 K'onxa nimbil te Kman ex k'onxa jun oyaj te ti'j tk'inumabla ex ti'j tnejel twitz tawala; 10 ka ma tbinchaya icju, che nojel ke ttx'utx'a wen ex ke tcubil ta'l twitz t-uvaya. 11 Nc'wa'l, ka ma cub cawina tu'n Kman, mi'n tz'el tic'una, ex mi'n tzaj tk'oja oc toc ilina tu'n; 12 porque te Kman in che cub tcawin keju c'ujla'n ke tu'n, ic tza'n jun mambaj in che cub tcawin tc'wa'l c'ujla'nxix tu'n. 13 At tzalajbil teju xjal in cnet nabl tu'n ex nne'l tnic' ti'j alcye ba'n tu'n tbant tu'n; 14 porque mas ma' t-xilen jlu twitz sak pwak ex mas nim tajben twitz k'an pwak. 15 Aju nabl mas ma' t-xilen cywitz ke tbanil abj perla cybi; ex mi jun juntl ti'xti tbanil in pon cyc'u'j xjal ti'j, jacu pon ic tza'n jlu. 16 Aju nabl, nej in tzaj tk'o'n chwinklal, ex te tibajxi in tzaj tk'o'n k'inumabl ex nimbil. 17 Ka ma ko oc lpe' ti'j be k'i'n tu'n, puro ba'n jlu; ex ka ma ko bet tuj tbe, jacu ko ten tuj tzalajbil. 18 Tzul k'o'n tchwinklal xjal aju in cnet nabl tu'n; at tzalajbil te cye keju minti' in xi cytzokpi'n. 19 Tu'n tnabl Kman cub tbincha'n tx'otx', ex tu'n tojtzkibl cyuwset cya'j; 20 tu'n tnabl e jaket twi a', ex tzaj jbal tuj muj tu'n. 21 Nc'wa'l, cucx tu'n tten tnabla, ex mi'n cyaj tcolina aju tnabla ba'n, 22 porque cyu'n jlu ctzajel k'o'n tchwinklala ex che oquel ic tza'n jun adorn te teya. 23 Cyja'tzun oc tbeta tuj tbeya minti' t-xobil ti'ja, ex mlayx jaw tolja. 24 Oc tojlana minti' tu'n t-xoba, ex oc tcub coẍe'ya, txubtxaj ctala. 25 Mlay xoba cywitz ke xobajil minabencu che tzajel, ex mi twitz ju c'ixbisabl tzul cyibaj ke binchal mya ba'n, 26 porque ate Kman ck'ukbalte tc'u'ja, ex oc cletela tu'n tu'n mi'n tcub tz'aka tuj c'obil. 27 Mi'n cub t-xc'ayin tiba tu'n tbinchanteya jun xtalbil teju xjal in kanin teya; ka jacu bant tu'na, binchama. 28 Ka at tumel tu'n t-xi tk'o'na onbil k'onxa ja'lo, mi'n cyaj tk'o'na te nchi'j. 29 Mi'n cub t-ximana tu'n tbinchanteya mya ba'n ti'j tvesina aju najl ttxlaja ex k'ukl tc'u'j ti'ja. 30 Mi'n tz'oc tena k'ojlel ti'j juntl ka minti' jun mya ba'n otok tbincha ti'ja. 31 Mi'n tzaj lo'ch tc'u'ja ti'j jun xjal jurat in jaw k'ojl, ex mi'n tz'el tcano'na aju in tbincha'n; 32 porque ic'un tu'n Kman ke xjal binchal mya ba'n; atzun keju in cybincha'n tz'aklxix, at tmojbabl tib cyuc'il. 33 In tzaj tk'o'n Kman mya ba'n cyibaj keju ate' tuj tja ju xjal binchal mya ba'n, atzun keju ate' tuj tja ju xjal tz'aklxix, in che cub tcy'iwla'n. 34 In xmayin Kman cyi'j keju ba'n che xmayin, atzun keju mans in tzaj tk'o'n Dios t-xtalbil cye. 35 Akeju at cynabl, che jawil nimsa'n, atzun keju minti' cynabl, ctzajel cych'ixwi.
