PROVERBIOS 29

1Aju xjal minti' in xi tniman cawbil te, minaben cnajel ex mlayx clet. 2Oc cycawin ke xjal tz'aklxix, in che jaw tzalaj ke xjal; octzun cycawin ke xjal mya ba'n, bi'x in che jaw ayayan xjal tu'n cybis. 3Aju c'wa'lbaj at tnabl in jaw tzalaj tman tu'n; atzunju c'wa'lbaj in xi' cyuc'il ke xu'j jawni cywitz cyuc'il xinak, cbel naj tk'inumabl. 4Aju rey in xi tbincha'n ti'j tcyakil tuj tumelxix in tcyuwsa'n ttanmi; atzunju rey o'cx in kanin chojenj cyibaj xjal in naj ttanmi tu'n. 5Aju xjal nno'c ten k'malte yol ba'n nok tu'n tcub t-sbu'n jun tuc'il, in cub tk'o'n jun c'obil tuj tex tbe. 6Ax ke til xjal binchal mya ba'n in che oc te jun c'obil te; atzunju xjal tz'aklxix in bitzan ex in tzalaj. 7Aju xjal tz'aklxix in colin cyi'j ke xjal meba ex in onin cyi'j, atzunju xjal binchal mya ba'n minti' taj cyi'j. 8Ke xjal jyol k'oj, in che jaw tilj tnam xjal cyu'n; atzun ke xjal at cynabl, in chewix k'oj cyu'n. 9Ka ma tz'etz tk'oj jun xjal at tnabl tuc'il jun xjal minti' tnabl, ate xjal minti' tnabl nok in jaw k'ojl, nno'c ten xmayil ex mlayx bant ti'j k'oj cyu'n. 10Ke xjal byol xjal ke, ic'un ju xjal ba'n tmod cyu'n, atzun ke xjal ba'n cymod in che jyon tza'n tten tu'n cytzalaj. 11Aju xjal minti' tnabl in xi ttzokpin tib tu'n tk'ojin, atzunju xjal at tnabl in tjac'unte tib tu'n mi'n tk'ojin. 12Ka at jun cawil in xi tk'o'n twi' cyi'j ke nic'aj yol, cycyakil xjal at cyoclen ttxlaj che oquel te mya ba'n. 13Aju xjal meba ex ju xjal in yajlante te, at jun in cyc'mo'n cycabil; tu'n Kman xi tk'o'n ke tbak' cywitz cycabil. 14Aju rey in cawin tuj tumelxix cyibaj ke xjal meba cucx ccawil te jumajx. 15Ka ma txi cawin jun c'wa'l ex ma txi' tasyal, tu'n jlu nno'c tnabl, atzunju c'wa'lbaj in xi k'o'n ambil te tu'n tbinchante nok alcye tajbil, jun ch'ixbil jlu te ttxu'. 16Ka ma chmet nim xjal binchal mya ba'n, ax icx in chmet nim il; pero ke xjal tz'aklxix oc cyila' oc cycub tz'ak ke jlu. 17Cawinx tc'wa'la ex c'ank'iltzuna tu'n tuj txubtxaj, ex nim jacu tzalaja ti'j. 18Jatum minti' jun t-sanjel Dios tuj jun tnam, mya tuj ttxolil in che ank'in xjal, pero at tzalajbil teju xjal in japun tley Dios tu'n. 19Nok tu'n yol mlay txi cawit aju majen, masque tz'ex tuj twi' pero mlay txi tniman. 20Mas ba'n ch'intl te xjal minti' tnabl twitzju xjal jurat in yolin naj ex minti' in ximan ti'j tyol. 21Aju xjal mi tel-len jun tmajen tu'n atxix tuj tne'yilx majen, te bajsbil mya ba'n c'elel te patrĂ³n lu. 22Aju xjal jawni k'ojl, nok k'oj in tzaj ti'n, ex aju xjal tx'u'j twi', nok cyja' tchmet til. 23Aju xjal in jaw tniman tib, c'oquel k'o'n te ch'in toclen, atzunju xjal mans, cjawil nimsa'n. 24Aju xjal nno'c tuc'in tib tuc'il jun elek', tu'nx nne'l tic'un tib, ex masque tbi ke mya ba'n che tzajel ti'j, pero minti' in jatz tma'n til. 25Aju xjal in tzaj t-xobil twitz juntl xjal, jun c'obil jlu te te, atzunju xjal k'ukl tc'u'j ti'j Kman, ctel tuj segur. 26Nimcu xjal in che jyon ti'j jun xtalbil tu'n jun cawil, pero o'cxte Kman in xi binchante ti'j tcyakil tuj tumelxix. 27Ke xjal tz'aklxix, in che ic'un cyi'j ke xjal mya ba'n, ex ke xjal binchal mya ba'n, in che ic'un cyi'j ke xjal tz'aklxix.

will be added

X\