PROVERBIOS 26

1Mya tuj tumel ka ma tzaj tk'ab che'w tuj tk'ijlalil cyak, ex mya tuj tumel ka ma tzaj jbal oc tjaw chmet twitz awal, ax icxtzun mya tuj tumel tu'n t-xi k'ot nimbil te jun xjal minti' tnabl. 2Ic tza'n jun tal tz'unin nne'l tzpet ex ic tza'n jun xtx'a'yil in lipan twitz cya'j, ictzun tten ju mya ba'n in xi cykanin xjal ti'j juntl; ka minti' til xjal mlay japun jlu. 3Ba'n tu'n tcub mansit chej tu'n asyal, atzunte bur ba'n tu'n tocx pren tuj ttzi', atzunju xjal minti' tnabl, ba'n tu'n t-xi jatet tasyal. 4Mi'n txi ttzak'we'na tyol xjal minti' tnabl tuc'il yol minti' tnabl, tu'ntzun mi'n tpona ic tza'n te. 5Tzak'wenxa ju xjal minti' tnabl ic tza'nxju tyol, tu'ntzun mi'n toc tk'on tib at tnabl. 6Ka ma txi ksama'n jun xjal minti' tnabl te ksanjel, a jlu mer ic tza'n nne'l tx'emin ke kkan ex in tzaj mya ba'n ki'j. 7Ic tza'n jun xjal cox mya segur ate' ke tkan, icxtzun tten ju yol te xnak'tzbil tu'nju xjal minti' tnabl. 8Ic tza'n jun xjal nno'cx tc'alo'n jun abj tuj jun xobl te, mya ba'n jlu, icxtzun tten ju xjal in xi k'onte nimbil teju xjal minti' tnabl. 9Ic tza'n ch'i'x in xi' tuj tk'ab jun xjal c'al k'e'n, ictzun tten jun yol te xnak'tzbil tu'nju xjal minti' tnabl. 10Ic tza'n ju xjal in xi t-xo'n plech ti'j nok alcyex jun xjal nnic' bet, icxtzun tten aju in xi k'onte tak'un jun xjal minti' tnabl ex nok in betje'. 11Ic tza'n jun tx'yan nna'j meltz'aj lo'l t-xa'w juntl maj, ictzun tten ju xjal minti' tnabl nna'j meltz'aj juntl maj binchalte mya ba'n. 12Mas ba'n ch'intl te xjal minti' tnabl, twitzju xjal nno'c tk'on tib te at tnabl. 13Aju xjal tc'i' tz'ak'nan in tma'n cyja': Tuj cay at jun balun tcubsa'n ex tuj be tcubsa'n juntl. 14Ic tza'n tlamel ja in yucch cyu'n ke visagr cyoc ti'j, icxtzun tten ju xjal cy'aj nok in tol tic' tuj tcoẍbil. 15Aju xjal cy'aj in xi tlamo'n tk'ab tuj lak tu'n twa'n, pero minti' nno'c tilil tu'n tu'n tpon canun tuj ttzi'. 16Aju xjal cy'aj nno'c tk'on tib mas at tnabl cywitz wuk xjal ba'n ttzak'wenjtz yol cyu'n tuj tumelxix. 17Aju xjal nno'cx tk'on tib tuj jun k'oj minti' toclen ti'j, junx ta' ic tza'n jun xjal in tzaj ttzyu'n jun tx'yan cyi'j twi t-ẍcyin. 18Ic tza'n jun xjal in tzaj tuj twitz in che'x t-xo'n ke plech in c'ant k'ak' cyi'j ex ke plech in che naj xjal tu'n, 19ictzun tten ju xjal in cub t-sbu'n tamiw, ex te tibajxi in tma'n: Nok jun la'jbil jlu chi. 20Ka minti' si' in cu'x yupj k'ak', ex ka mi a'l jun xjal in si'min yol in baj k'oj. 21Aju xk'a'l at tajben tu'n tjaw c'ant k'ak' ti'j; aju si' at tajben tu'n tocx tuj k'ak'; ex tu'nju xjal jawni k'ojl in tzaj mastl k'oj. 22Aju tyol xjal si'mil yol ic tten ic tza'n jun ti'xti nno'cx tuj ttzi' puro chi' wen, ex max in cu'pun tuj tc'u'j. 23Ic tza'n jun c'il tx'otx' ttx'otx'il toc tc'a' sak pwak, ictzun tten tyol xjal cye'yix tbinx atzunju t-ximbetz mya ba'n. 24Aju xjal in ic'un ti'j juntl minti' in xi tyec'un t-ximbetz oc tyolin, pero tuj tanmi in baj t-ximan mya ba'n; 25ka ma yolin tuj mansbajil teya, mi'n txi tnimana porque aju t-ximbetz nojni tu'n mya ba'n; 26masque cub tewan tk'oj, pero aju tbinchben mya ba'n c'elel tuj k'ancha'l cywitz cycyakil xjal. 27Alcye jun xjal in cu'x lacunte jun jul tu'n t-xi tz'ak juntl xjal tuj, axte cbelex tz'ak tuj; ex alcye jun in xi tolinte jun abj tibaj juntl xjal, tibajx in tzaj tolj abj. 28Aju xjal nic'al yol nne'l tic'un aju axix toc, ex aju xjal mejor xmoxin tu'n t-sbun, xitbil in tzaj tu'n.

will be added

X\