PROVERBIOS 25

1Ax icx ke jlu yol te xnak'tzbil ke tu'n Salomón, aju jatz cytz'iban xjal aj tz'ibal te Ezequías, aju rey te Judá: 2Jun nimbil te Dios tu'n tcub tewan jun ti'xti, atzun cye rey, jun nimbil te cye ka ma baj cyxpich'un jun ti'xti tu'n tel tuj k'ancha'l. 3Aju twa'l cya'j, aju t-xe'pun tx'otx' ex aju cyximbetz ke rey, ake jlu mlay tz'el nic'baj cyi'j. 4K'i'n ela tz'il ti'j sak pwak, ex jacu bant jun vas ti'j tu'n binchalte; 5ke xjal binchal mya ba'n che tpa'n ela ke twitz rey, ex aju tk'ukbil ccyuwsetel tuj tumelxix. 6Mi'n tz'oc tk'on tiba te ma' toclena twitz rey, ex mi'n cub tena tuj tlugar jun xjal ma' toclen; 7porque mas ba'n ka ma tzaj cyman teya: Ttzaja ex kecuya tzalu, twitzju tu'n ttzaj k'ma'n teya cywitz ke xjal ma' cyoclen: Tic' lak'e'ya tzalu. 8Akeju in che tila cyu'n ke tbak' twitza, mi'n txi naja k'malte cye aj sanjelal, porque tu'n juntl testiw jacu tz'oc k'o'na nic'al yol, ex te bajsbil mlay tz'el tnic'a ti'j alcye tu'n tbant tu'na. 9Binchanxa ti'j k'oj tuc'il tvesina cyjunalxe, ex mi'n baj tyolina te juntl aju ma bant ti'j cyu'ne cyxolxe; 10mya yajcu at jun xjal jacu bin teya ex jacu cub k'o'n tch'ixwiya tu'n, ex aju yolbil teya mya ba'n, mlay tzic' tna'njtz cyu'n xjal. 11Oc ttzaj k'ma'n jun yol at tajben, ic tten jlu ic tza'n jun tilbilal mansan k'an pwak ttx'otx'il ex cyoc junjun tilbilal ti'j sak pwak cytx'otx'il. 12Ka ma ko mayonjtz ti'j jun mya ba'n tu'n jun xjal at tnabl ex ka ma txi kbi'n, ic tten jlu te ke ic tza'n jun xmulk'abaj ex jun uwj k'an pwak tbanilxix cytx'otx'il. 13Aju sanjel in japunxix tu'n, ic nno'c teju samalte te ic tza'n t-schewil ttxa che'w tuj tk'ijlalil cyak, porque tu'n jlu in ke' tc'u'j tpatrón ti'j. 14Ke xjal in cyma'n tu'n t-xi cyk'o'n jun oyaj te juntl ex minti' in xi cyk'o'n, ic cyten ic tza'n muj ex cyk'ik' minti' jbal cyuj. 15Tu'n nim pasens in cub tc'u'j jun cawil; ex masque puro cyuw cyanmi xjal, pero in cub ti'j cyu'n ke yol ba'n cybinx. 16Ka ma cnet ta'l cab tu'na, mi'n txi tlo'na nim, mya yajcu jatz t-xa'wina tu'nju nim otok txi tlo'na. 17Ka ma txi'ya visitarilte jun tamiwoya, mi'n txi'ya coc'x wen, mya yajcu jacu sict tu'na ex jacu tz'el ic'una tu'n. 18Aju xjal in tma'n jun nic'aj yol ti'j jun tuc'il, ic tten ic tza'n jun martiy, ex ka spad, ex ka plech tz'u'p twi'. 19Oc ttzaj yajbil ki'j ex ka ma tz'oc ke' kc'u'j ti'j jun xjal mya ba'n, junx ta' jlu ic tza'n in ko bet tuc'il jun kkan otok tz'ex k'ulpaj, ex ic tza'n in ko wa'n tuc'il jun twitz ke' otok tz'etz tokj. 20Ka ma txi bitzan jun bitz cywitz ke xjal in che bisun, junx ta' jlu ic tza'n in cu'x k'ot ta'l vinagr tuj jun tx'a'c, ex ic tza'n nne'l ti'n xjal t-xbalun tuj tk'ijlalil che'w. 21Ka at we'yaj ti'j aj k'oj ti'ja, k'onxa twa, ex ka at txketle'n ti'j, k'onxa tc'a; 22tu'ntzun jlu bi'x ctzajel tch'ixwi, ex ate Kman ck'olte t-xel teya. 23Tu'n cyk'ik' in tzaj tuj tbank'ab k'ij in tzaj jbal, ex tu'nju mya ba'n yolin xjal in tzaj k'oj tu'n. 24Mas ba'n tu'n tnajan jun xinak tjunalx tuj jun tal galer, twitzju tu'n tnajan tuj jun matij ja tuc'il jun xu'j jawni k'ojl. 25Oc tul jun tkanil ba'n tzajni tuj jun tx'otx' najchak, junx ta' ic tza'n che'w a' in xi tc'a'n jun xjal at txketle'n ti'j. 26Ka at jun xjal tz'aklxix in cub tcuyin aju in tzaj k'ma'n te tu'n jun xjal mya ba'n, ic tten xjal lu ic tza'n jun twi a' in baj xok'li'n tuj ex in tz'ilix twitz. 27Mya ba'n ka ma txi klo'n nim ta'l cab, ax icx mya ba'n ka in ko jyon ti'j nimbil ke. 28Aju xjal minti' in tjac'unte tib, ic tten ic tza'n jun tnam minti' muro toc ti'j ex at tuj xobajil.

will be added

X\