PROVERBIOS 24

1Mi'n tzaj tlo'ch tc'u'ja cyi'j ke xjal binchal mya ba'n, ex mi'n pon tc'u'ja ti'j tu'n toc tuc'in tiba cyuc'il, 2porque ke xjal lu o'cx in che ximan ti'j tu'n cyelk'an ex o'cx in che yolin ti'j tu'n cybinchante mya ba'n. 3Tu'n nabl in jaw binchet jun ja, ex tu'n ximbetz in cub ke' t-simyentil, 4tu'n ojtzkibl in baj noj cyuj ke cwart cyu'n ke ti'xti wi'yilxix ex tbanilxix che que'yin. 5Mas nim toclen jun xjal at tnabl twitz jun xjal at nim tipun, ex mas ba'n tu'n tten tojtzkibl jun xjal twitzju tu'n tten tipun; 6porque ka ma tz'oc jun k'oj, cheba in cub ximet tza'n tten tu'n ttzyet, ex ka at nim xjal in cyk'o'n consej, jacu cub ti'j aj k'oj. 7Aju xjal minti' tnabl, minti' ba'n tu'n alcye yol tu'n t-xi tma'n cywitz aj sanjelal, tu'nju ma' t-xilen ju nabl ex mlay tz'el tnic' ti'j. 8Aju xjal o'cx in ximan ti'j tu'n tbinchante mya ba'n, c'oquel tbi cyu'n xjal jawni sbun. 9Aju xjal minti' tnabl, o'cx in ximan ti'j tu'n tbant il tu'n; ex aju xjal ba'n xmayin, ic'un twitz cyu'n xjal. 10Ka ma tzaj baj tc'u'ja oc ttzaj yajbil ti'ja, myatzun nim tipuna at icju. 11Cloma ke xjal tcub cysentens tu'n cycyim; ex cloma ke xjal ch'ix cyxi k'i'n tu'n cycub byo'n. 12Masque txi tma'na: Minti' we bi'n wu'n, ka chiya, baka mlay tz'el tnic' Dios ti'j jlu, aju in baj que'yinte cyanmi xjal; aju toc tcwent ti'j tchwinklala ya ba'ntl tu'n, ex tu'n in xi tk'o'n chojbil te xjal ic tza'n tbinchben. 13Nc'wa'l, lo'nxa aju ta'l cab puro chi', aju tjak' c'ul cab; nic'benxa ex puro chi' loblte wen. 14Ax icxtzun puro chi' c'elel te teya aju nabl ex ju ojtzkibl; katzun ma che cnet tu'na, te tibajxi puro ba'n c'elel te teya, ex aju in ayona ti'j mlayx cub xitun. 15Mi'n cub t-ximana tu'n tbinchanteya mya ba'n ti'j jun xjal tz'aklxix, ex mi'n tz'etz telk'ana aju at tuj tja. 16Masque cub tz'ak wuk maj ju xjal tz'aklxix, pero in jaw we' juntl maj; atzun ke xjal binchal mya ba'n, nok cyja' in che'x mastl tuj ju mya ba'n. 17Mi'n jaw tzalaja oc tcub tz'ak aju aj k'oj ti'ja ex oc ttzaj jun mya ba'n tibaj, 18porque oc tlonte Kman jlu, mlay tzalaj ti'j, ex jacu cyaj tcolin tu'n mi tk'ojin ti'j. 19Mi'n jaw k'ojla tu'n cylaj ke xjal binchal mya ba'n, ex mi'n tzaj tx'a'l tc'u'ja ti'j xjal ploj tmod, 20porque aju xjal binchal mya ba'n, misicyer jun oc tcamba'; ic c'oquel ic tza'n jun candil in cu'x yupj. 21Nc'wa'l, nimana te Dios ex te rey, mi'n tz'oc tmojban tiba cyuc'il xjal miban che niman, 22porque minaben che najel ex mi jun ba'n tu'n aju cycastiw ctzajel tu'n Dios ex tu'n rey. 23Ax icx ke jlu ax cyyol ke xjal at cynabl: Ka nno'c cyque'yin ke jwes aju t-xilen xjal, mya ba'n jlu. 24Aju nno'c k'onte jun xjal te minti' til ex at til, cxel kanin mya ba'n tibaj cyu'n tnam xjal ex c'elel ic'un cyu'n ke nasyon; 25atzun keju in che cub k'onte tcastiw, at tzalajbil cye ex ctzajel cykanin xjal cy'iwbil cyibaj. 26Aju xjal in xi tk'o'n jun tzak'webl ba'nxix, nimxix in che tzalaj xjal ti'j. 27Binchama cyi'j ke tak'una ex txi'ya binchalte tak'una tuj cojbil, ex te tibajxi ba'ntzun tu'n tjaw tbincha'na tjaya. 28Mi'n tz'oca jun testiw nic'al yol ti'j tuc'ila, ex mi'n txi tcyuwsa'na jun ti'xti ka mya ax toc. 29Mi'n cub t-ximana tu'n taj tk'o'na t-xel mya ba'n, mi tu'n tbinchanteya ti'j juntl ic tza'nx otok tbincha ti'ja. 30In exe tuj tcojbil ju xjal cy'aj ex cyxol tkan t-uva ju xjal minti' tnabl: 31aju o wile, jun tx'otx' nojni tu'n ch'i'x, ex ke abj toc te tpe'nil otok che el tilj. 32Tej twile jlu, in oc tene ximal ti'j; o wile ex oc te jun xnak'tzbil weye. 33Tu'n tlaj cucx ttana ex cucx tpich'je' twi'ya tu'n watl ex cucx tcub ttz'ulin tk'aba tu'n ttana, 34tzul mebayil ti'ja ex c'oquel tzokpaj ti'ja ic tza'n jun xjal elek' k'i'n ubl tu'n.

will be added

X\