PROVERBIOS 21

1Ic tten t-ximbetz rey tuj tk'ab Kman ic tza'n jun a' in bet, in xi ti'n Kman nok jatum taj tu'n t-xi ti'n. 2Tuj twitz xjal ka ba'n tcyakilju in tbincha'n, pero ate Kman in baj que'yinte t-ximbetz xjal, ka ba'n ex ka mi'n. 3Aju xjal in tbincha'n ju tz'aklxix ex in bet tuj tumel, mas ma' t-xilen jlu tuj twitz Kman cywitz ke chojbil. 4Aju xjal jawni twitz ex in jaw tniman tib, ex aju t-ximbetz xjal binchal mya ba'n, tcyakil jlu il tuj twitz Kman. 5Aju xjal nej in cub ten ximal ti'j alcye tu'n tbant tu'n, ba'n nne'l te te, atzunju xjal nok t-xo'n tib ti'j jun ti'xti ex minti' in cub ten ximal ti'j ka ba'n, ctzajel mebayil ti'j. 6Aju tk'inumabl xjal in cnet nok tu'n nic'aj yol, jurat in cub naj ex jun c'obil jlu te te tu'n tcyim. 7Ke xjal binchal mya ba'n oc che najel tu'nx ju cytx'u'jil, tu'nju minti' cyajbil tu'n cybinchante aju tz'aklxix. 8Aju be k'i'n tu'n xjal binchal mya ba'n puro ẍo'c ti'j ex minti' ttxolil; atzun ke xjal minti' cyil in che bet tuj tumelxix. 9Mas ba'n tu'n tnajan jun xinak tjunalx tuj jun tal galer, twitzju tu'n tnajan tuj jun matij ja tuc'il jun xu'j jawni k'ojl. 10Aju xjal binchal mya ba'n o'cx in ximan ti'j tu'n tbinchante mya ba'n, ex minti' in tbincha'n jun xtalbil ti'j jun tuc'il. 11Oc tcub tcastiw jun xjal ba'n xmayin, atzun c'oquel tnabl ju xjal minti' ch'in ba'n tu'n; atzunju xjal at tnabl, c'oquel mastl tojtzkibl oc toc cawin. 12Ate Dios tz'aklxix in baj tque'yin aju in binchanjtz tuj tja xjal mya ba'n; ex in che'x tk'o'n ke xjal mya ba'n tuj xitbil cye. 13Aju xjal minti' in xi tbi'n tcubsbil jun xjal meba, ax icxtzun te mlay tzaj tzak'we'n oc toc ten kanil onbil. 14Aju oyaj in xi k'o'n tuj ewaj, in chewix ju k'oj ma' t-xilen tu'n. 15Aju xjal tz'aklxix in tzalaj ti'j ka in xi bincha'n cyi'j xjal tuj tumelxix, ex atzun cye xjal mya ba'n, in tzaj xitbil cyi'j. 16Aju xjal minti' in bet tuj tumel, max cpol we' cyxol ke cyimni. 17Aju xjal o'cx toc tc'u'j ti'j achbil ctel tuj mebayil, ex aju xjal o'cx toc tc'u'j ti'j vin ex ti'j perjum mlay tz'oc te k'inun. 18Aju xjal binchal mya ba'n ex sbul cbajel c'ixbisa'n te t-xel ju xjal tz'aklxix ex ba'n tmod. 19Mas ba'n tu'n knajan tuj lugar minti' cynajbil xjal tuj, twitzju tu'n kank'in tuc'il jun xu'j tx'u'j twi' ex jawni k'ojl. 20Tuj tja ju xjal at tnabl at k'inumabl ex nimcu at te, atzunju xjal minti' tnabl in baj tnajsa'n tcyakilju at te. 21Aju xjal nno'c tilil tu'n tu'n tbet tuj tumel ex tu'n tten tc'ujlalil in cnet chwinklal tu'n, nno'c k'o'n te tz'aklxix ex in tc'mo'n nimbilte. 22Aju xjal at tnabl nno'c tzokpaj ti'j jun tnam at nim tipun, ex in che baj t-xitun ke ja te cycolbil cyib xjal aju k'ukl cyc'u'j ti'j. 23Aju xjal toc tcwent ti'j tyol mlay tz'ocx tk'o'n tib tuj bis. 24Xmayil tbi ju xjal jawni twitz ex in jaw tniman tib. 25Aju xjal cy'aj in cyim tu'nju in pon tc'u'j ti'j nimcu ex tc'i' tz'ak'nan; 26tcyakil k'ij in pon tc'u'j ti'j nimcu. Atzunju xjal tz'aklxix, in xi tk'o'n cotzbaj ex minti' in cub t-xc'ayin. 27Ic'un tu'n Kman akeju chojbil in xi cyk'o'n ke xjal binchal mya ba'n, pyortzun ka in xi cyk'o'n tuc'il cyximbetz mya ba'n. 28Aju testiw nic'al yol cnajel; atzunju xjal in cub tbi'n jun yol, ax icx in xi ttzak'we'n. 29Aju xjal binchal mya ba'n in tyec'un mer ic tza'n ba'n ta'; atzunju xjal ba'n tmod, segur ta' ti'j ju in tbincha'n. 30Masque nim cynabl xjal ex nim cyojtzkibl ex mejor che ximan, pero mlay che xcye' ti'j Dios. 31Ate xjal in bant tten chej tu'n tu'n t-xi' tuj k'oj, pero tu'n Kman in che camban xjal tuj k'oj.

will be added

X\