PROVERBIOS 20

1Aju c'abj vin, tx'u'j nno'c cywi' xjal tu'n; ex aju k'e'n, bi'x nne'l cynabl xjal tu'n; tu'ntzun jlu minti' in cybincha'n jun ti'xti tuj tumel. 2Oc in tzaj ttx'u'jil jun rey, junx ta' ic tza'n in tzanun jun balun; ex alcye jun ma tz'oc ic'lente te rey, mya yaj jacu cub byo'n tu'n. 3At nimbil te jun xjal nne'l tpa'n tib ti'j k'oj, pero aju xjal minti' tnabl ex miban bin, mas in jyon k'oj. 4Oc tpon tyemp te ch'ocbil tx'otx' aju xjal cy'aj minti' nno'c ten ch'oquil, octzun tpon tk'ijlalil tu'n tjaw chmet twitz awal c'oquel ten jyolte, pero mlay cnet twitz awal tu'n. 5Aju t-ximbetz jun xjal tuj ewaj in bant, ic tten ic tza'n jun a' ma' t-xe', pero aju xjal at tnabl jurat nne'l tnic' ti'j. 6At nimcu xjal in cyma'n ka puro ba'n ke, pero mlay cnet jun in japun tcyakil tu'n. 7Aju xjal ma bet tuj tumelxix ex ba'n tmod, at tzalajbil cye ke tc'wa'l che cyjel ten tu'n. 8Oc tocx ke' jun rey tuj tk'ukbil tu'n tcawin, jurat nne'l tnic' ti'j alcye ba'n ex alcye mya ba'n. 9Mi jun xjal jacu k'mante: Ma baj nsaksa'ne tuj wanmiye, tx'jo'ntl kine ex minti'tl wile. 10Aju marc mya cabal ex aju malbil mya cabal, ic'un ke tu'n Kman. 11Cyu'n ke tbinchben jun cu'xun nne'l nic'baj ti'j ka ba'n tmod ex ka tuj tumel in bet. 12Tu'n t-ẍcyin xjal in tbi'n ex tu'n tbak' twitz in til; tu'n Kman o che bant ke jlu. 13Mi'n nok tana, tu'ntzun mi'n toca te meba. Que'yin jaw twitza ex cyja'tzun ctel nim twaya. 14Aju xjal lak'ol in tma'n te c'ayil: Mya ba'n c'aẍjel lu, chi, pero t-xilenxi tlak'on, in jaw tzalaj ti'j. 15Aju xjal in yolin tuc'il nabl, mas ma' toclen tyol twitz k'an pwak ex cywitz nimcu tal abj tbanilxix. 16K'i'n ela t-xbalun xjal in cyaj we' ti'j tc'as juntl minti' ojtzki'n tu'n, ex axtzun tzyu'n cyaja te jun prent. 17Ba'n nne'la tuj twitz xjal tu'n twa'n nok tu'n nic'aj yol, pero te tibajxi jlu, ic nno'c te te ic tza'n ttxa' abj tuj ttzi'. 18Cyu'n ke consej ba'n, ba'n in che ela keju in cub kximan; ex na'nxtok cyxi' xjal tuj k'oj, ba'n tu'n cycub ten ximal ti'j nej alcye tu'n tbant cyu'n. 19Aju xjal ẍtak'il yol mlay cub tewan jun ti'xti tuj ewaj, cyja'tzun mi'n tz'oc tmojban tiba tuc'ilju xjal tcyakil in baj tyolin. 20Aju xjal nno'c yasonte tman ex ttxu', cnajel tuj klolj xobajilxix ic tza'n jun candil in cub yupj. 21Aju k'inumabl mya cwest in cnet t-xe tnejel, te tibajxi mlay tz'el ba'n te xjal tu'n. 22Mi'n txi tma'na: C'ajel nk'o'ne t-xel mya ba'n ma binchanjtz wi'je; o'cx ke'c tc'u'ja ti'j Kman ex oc cletela tu'n. 23Ic'un tu'n Kman ke marc mya cabal ex ke malbil mya cabal; mya ba'n ke jlu. 24Ate Kman ẍaklulte xjal tuj tbe; atzunte xjal mlay tz'el tnic' ti'j tbe. 25At xobajil ti'j xjal ka jurat ma txi ttziyan jun tyol te Dios, ex te tibajxi mi'n japun tu'n aju otok txi ttziyan. 26Aju rey at tnabl in che ex tlajo'n keju in che binchante mya ba'n, ex in cub tk'o'n cycastiw cyuwxix wen. 27Aju xewbaj o txi tk'o'n Dios te xjal tu'n tten tchwinklal, a jlu jun spic'un in baj xpich'un tuj tanmi xjal tu'n. 28Cyuw tten jun rey tuj tcawbil ka axix toc tyol ex ka at tc'ujlalil. 29Aju mas in che tzalaj ke cu'xun ti'j, tu'nju at cyipun; atzun ke tij xjal at nimbil cye tu'nju ma sakix cywi'. 30Ka ma baj bju'n ex ka ma baj c'ixbisa'n jun xjal mya ba'n, a jlu jun k'anbil nno'c te te; ex tu'nju tcastiw xjal in cub, in sakix tuj tanmi.

will be added

X\