PROVERBIOS 16

1In baj t-ximan xjal alcye tu'n tbant tu'n, pero a Dios in k'mante alcye tu'n tbant. 2Tuj twitz xjal ka ba'n tcyakilju in tbincha'n, pero ate Kman in baj malonte t-ximbetz xjal ka ba'n ex ka mi'n. 3K'onxa tuj tk'ab Kman tcyakil aju in bant tu'na, ex ba'ntzun c'elel aju ma cub t-ximana tu'n tbant. 4Tcyakil o tbincha Kman tu'n tjapun baj, aju ximamajtl tu'n; ax icxpe ke xjal binchal mya ba'n tu'n cyten tuj k'ij te c'ixbisabl. 5Ic'un tu'n Kman ke xjal in jaw cyniman cyib; ax toc mlay tzic'x ti'j tu'n mi'n tcub cycastiw. 6Ka at tc'ujlalil xjal ex ka in yolin axix toc, jacu najset til; ka in niman xjal te Kman, nne'l tpa'n tib ti'j ju mya ba'n. 7Ka in tzalaj Kman ti'j tbinchben jun xjal, cyuc'ixpe ke aj k'oj ti'j in bant cyten tuc'il. 8Mas ba'n nok ch'in at ke, pero tuj tumelxix otok cnet ku'n, twitzju nimcu at ke, pero mya tuj tumel otok cnet. 9In baj t-ximan xjal alcye tu'n tbant tu'n, atzunte Kman ẍaklul te. 10Mlay cub tk'o'n rey cysentens xjal mya tuj tumel, porque a Dios in k'onte tnabl. 11Atzun taj Dios tu'n tbaj malet tcyakil tuj balans cabalxix, ex tu'n o che binchet ke marc in che ajben te malbil. 12Ic'un cyu'n rey ke xjal binchal mya ba'n, porque aju cycawbil rey in cyuwsanjtz tu'nju cybinchben tuj tumelxix in bant. 13Ke xjal in che yolin tuj tumelxix, c'ujla'n ke tu'n rey, ax icx in tzalaj cyi'j keju axix toc cyyol. 14Ka ma tzaj tk'oj rey, tkanil camic jlu, atzunju xjal at tnabl, nno'c tilil tu'n tu'n tchewix tk'oj rey. 15Ka in tzalaj twitz rey ti'j ju xjal in pon twitz, at tchwinklal xjal tu'n jlu, ex aju xtalbil in tk'o'n ic tten ic tza'n muj in tzaj jbal tu'n. 16Aju tu'n toc knabl, mas ma' t-xilen jlu twitz k'an pwak; ex aju tu'n tten kojtzkibl, mas ma' t-xilen jlu twitz sak pwak. 17Aju cybe ke xjal tz'aklxix tpa'n tib ti'j ju mya ba'n; ex ka toc tcwent xjal ti'j tbinchben, in cub tcwentin tib. 18Tu'nju in jaw tniman tib xjal in tzaj xitbil ti'j; ex tu'nju jawni twitz in cub tz'ak. 19Mas ba'n tu'n tcub kmansin kib cyxol ke xjal meba twitzju tu'n koc te k'inun cyuc'il ke xjal in jaw cyniman cyib. 20Ka ma txi tniman xjal aju xnak'tzbil in xi k'o'n te, ba'n nne'la te te; ex aju xjal k'ukl tc'u'j ti'j Kman, at tzalajbil te. 21Aju xjal at tnabl nne'l tkanil ti'j ka at tnabl; cyu'n ke yol ba'n tbinx in cub ti'j cynabl xjal tu'n. 22Aju xjal at tnabl, jun chwinklal jlu te te; atzunju xjal minti' tnabl, in tzaj tcastiw tu'n jlu. 23Aju xjal at tnabl, toc tcwent ti'j tyol, ex in cub ti'j cynabl xjal tu'n tyol. 24Aju yol ba'n tbinx ic tten ic tza'n ta'l cab puro chi' wen: chi'xix in pon ti'j tc'u'j xjal tu'n, ex in tk'o'n ac'aj tipumal. 25At be jikun ti'j tuj twitz xjal, pero aju bajsbil te in pon tuj camic. 26Tu'nju in tzaj el tc'u'j xjal, cyja'tzun in ak'nan; porque oc tna'nte xjal we'yaj in jaw we' tu'n tak'nan; 27Aju binchal mya ba'n, o'cx in ximan ti'j tu'n tbinchante mya ba'n ti'j juntl, ex ke tyol ic cyten ic tza'n tkan k'ak'. 28Aju xjal tk'on tib jumajx tuj mya ba'n, nok k'oj in jyon ti'j; ex aju xjal si'mil yol, nok ic'bil in tk'o'n cyxol xjal cyamiwxix cyib. 29Aju xjal mya ba'n in cub t-sbu'n tuc'il ex in xi ti'n tuj be mya ba'n; 30in cub t-xmutz'in ttzi twitz oc in cub ten ximal tu'n tbinchante mya ba'n; ex in che cub tbetz'an ke ttxo'w ttzi' cyu'n ke twitz te' oc tbinchante mya ba'n. 31Oc t-sakix twi' jun xjal, nno'c ic tza'n jun coron te nimbil te, ma tcamba jlu tu'nju ba'n tbinchben. 32Mas ba'n ka mya jurat in ko jaw k'ojl twitzju tu'n koc cyuw kc'u'j; mas ba'n ka ma kjac'unte kib ku'nx kib twitzju tu'n tcub ti'j jun tnam ku'n. 33In jaw ti'n xjal swert ti'j tu'n tlonte alcye tu'n tbant tu'n; pero ate Kman in tzaj yec'unte te alcye tu'n tbant tu'n.

will be added

X\