1 Aju c'wa'l at tnabl, ba'n nne'l tuj twitz tu'n toc mayo'n tu'n tman ti'j mya ba'n; atzunju xjal jawni twitz, minti' in xi tniman aju maybil te. 2 Ke xjal ba'n in cyc'mo'n jun oyaj ti'j ju yol ba'n in cyma'n, atzun keju in che oc meltz'aj cyi'j cyuc'il, mas cyaj tu'n cyyajlan cyi'j xjal. 3 Aju xjal toc tcwent ti'j tyol, nno'c tcwentin tib, atzunju xjal jawni yolin, tu'nx tib in naj. 4 Aju xjal cy'aj, nim tgan tu'n tten jun ti'xti te, pero minti' in cnet tu'n, atzunju xjal ak'nal in cnet nim tu'n. 5 Aju xjal tz'aklxix, ic'un nic'aj yol tu'n, atzunju xjal mya ba'n, tu'nx in tzaj ti'n tch'ixwi ex ic'bil te. 6 Aju xjal minti' til, cwentin tu'nju in bet tuj tumel, atzunju xjal aj il, tu'nx tbinchben mya ba'n in naj. 7 At junjun xjal misicyer ch'in at cye ex nno'c cyk'on cyib ic tza'n k'inun; ex at junjuntl tcyakil at cye, pero nno'c cyk'on cyib ic tza'n meba. 8 Aju xjal k'inun in clet tu'n tk'inumabl tu'n mi'n tcub byo'n, atzunju xjal meba mlay che pon ke elek' xobtzal te. 9 Ke xjal tz'aklxix ic cyten ic tza'n jun spic'un in koptz'aj, atzun ke xjal mya ba'n, ic cyten ic tza'n jun candil in cu'x yupj. 10 Aju xjal in jaw tniman tib, nok k'oj in jyon ti'j, atzun keju in xi cybi'n consej, at cynabl. 11 Aju k'inumabl jurat naj in cnet, nok ch'in in ten, atzunju cheba in cnet, in ch'iy. 12 Ka at jun ti'xti in ko ayon ti'j ex ka minti' ma tzul, tzul bis tuj kanmi tu'n, pero ka ma kc'am aju at kgan ti'j, ko tzalajel. 13 Aju xjal minti' in xi tniman aju xnak'tzbil, tzul tilil tu'n, atzunju xjal in xi tniman ju mandamyent, tzul k'o'n t-xel te. 14 Aju xnak'tzbil tu'n xjal at tnabl in tzaj tk'o'n kchwinklal ex in ko clet tu'n, tu'n mi'n ktzyet tu'n camic. 15 Aju xjal ba'n tnabl in che tzalaj xjal ti'j, atzun ke xjal in che oc meltz'aj cyi'j cyuc'il, cyja' cyxi' tuj najen. 16 Aju xjal at tnabl in tbincha'n jun ti'xti tu'n tojtzkibl, atzunju xjal minti' tnabl, tu'nx in tyec'un ka minti' ba'n tu'n. 17 Aju sanjel mya ba'n in tzaj ti'n xitbil cyibaj xjal, atzunju sanjel in japunxix tu'n, in onin tu'n cyten xjal tuj txubtxaj. 18 Mebayil ex ch'ixbajil tzul tibaj ju xjal nne'l tic'un consej ba'n, atzunju xjal in cub tuj twitz oc toc mayo'n ti'j mya ba'n, nimxix cjawil nimsa'n. 19 Aju in pon tc'u'j xjal ti'j ex in cnet tu'n, in tk'o'n tzalajbil te. Ke xjal minti' cynabl minti' nnic'x cyu'n tu'n tel cypa'n cyib ti'j mya ba'n. 20 Ka ma tz'oc tjunin tiba cyuc'il ke xjal at cynabl, ctel tnabla, katzun ma tz'oc tjunin tiba cyuc'il ke xjal minti' cynabl, cnajela. 21 Ke xjal aj il in che yajlanjtz tu'n mya ba'n; atzun ke xjal tz'aklxix in cyc'mo'n ju ba'n te chojbil cye. 22 Aju xjal ba'n tmod in cyaj tk'o'n cyetzbil ke tal tchman; atzun tk'inumabl ju xjal aj il, c'u'n te cye ke xjal tz'aklxix. 23 Tuj cycojbil ke xjal meba at nim twitz awal, pero jacu cub naj jlu tu'nju minti' in cybincha'n xjal aju tz'aklxix. 24 Aju xjal minti' in xi tcawin tc'wa'l, nne'l tic'un; atzunju c'ujla'n tc'wa'l tu'n, in xi tcawin. 25 Aju xjal tz'aklxix in wa'n ex in noj tc'u'j, atzunju xjal binchal mya ba'n in wa'n ex minti' in noj tc'u'j.
