PROVERBIOS 12

1Aju xjal in tzalaj oc tcub cawin, nabl in tc'ujla'n, atzunju xjal tc'i' tu'n tcub cawin, minti' tnabl. 2Aju xjal ba'n tmod in tc'mo'n t-xtalbil Kman, atzunju xjal mya ba'n t-ximbetz, tcub t-sentens tu'n. 3Minti' cyuwsabl te xjal tu'nju mya ba'n in bant tu'n, atzun ke xjal tz'aklxix cyuw cyten ic tza'n jun tze' nim tloc'. 4Aju xu'j ba'n tmod, jun tzalajbil jlu te tchmil, atzunju xu'j mya ba'n, bi'x in naj tchmil tu'n. 5Ke xjal tz'aklxix o'cx toc cyximbetz ti'j ju tz'aklxix; atzun ke xjal binchal mya ba'n o'cx in che ximan tu'n cysbun. 6Ke cyyol xjal binchal mya ba'n, jun c'obil jlu tu'n cynaj xjal tu'n; atzun cyyol ke xjal tz'aklxix, in che clet xjal tu'n. 7Ke xjal binchal mya ba'n che bel tz'ak ex bi'x che najel, atzun ke cyiyjil xjal tz'aklxix cucx che cyjel ten te jumajx. 8In jaw nimsa'n xjal ic tza'nxju tojtzkibl at, atzun teju minti' tnabl nok o'cx nne'l ic'un. 9Mas ba'n tu'n koc k'o'n te ch'in koclen pero at jun ajbel ke, twitzju tu'n kjaw nimsa'n ex minti' kwa. 10Aju xjal tz'aklxix in che oc tcwentin ke talun, atzunju xjal binchal mya ba'n minti' in tz'e'y tc'u'j cyi'j talun. 11Aju xjal in ak'nan twitz tx'otx' at nim twa; atzunju minti' tnabl o'cx in xi tk'on tib tu'n tbinchante aju minti' tajben. 12Aju xjal binchal mya ba'n in tzyet tu'nx ju mya ba'n in pon tc'u'j ti'j; ex atzun ke xjal tz'aklxix cyuw cyten ic tza'n jun tze' nim tloc'. 13Aju xjal binchal mya ba'n in baj t-sacun tib tujx ju yol in xi tnic'an, atzunju xjal tz'aklxix ba'n nne'x tuj ju yajbil te. 14Tu'nju yol ba'n in yolin xjal ti'j in tc'mo'n nim ba'n, ex in tc'mo'n chojbil ti'j tbinchben. 15Aju xjal minti' tnabl, tuj twitz ka ba'n tcyakilju in tbincha'n, atzunju xjal at tnabl in xi tniman ke consej. 16Aju xjal minti' tnabl jurat in tzaj tk'oj; atzunju xjal at tnabl minti' nno'c tk'o'n tcwent ti'j ju mya ba'n in binchanjtz ti'j. 17Aju testiw axix toc tyol in tchic'ba'n ju ax toc; atzunju testiw nic'al yol in tcyuwsa'n aju mya ax toc. 18At xjal in c'ixbisan ti'j juntl cyu'n ke tyol, atzun cyyol ke xjal at cynabl nno'c te k'anbil cye mastl. 19Aju xjal in yolin ax toc cucx ctel te jumajx, atzunju xjal nic'al yol mya nim k'ij ctel. 20At sbubl tuj tanmi xjal in ximan ti'j tu'n tbinchante mya ba'n ti'j juntl, ex at tzalajbil cye xjal nno'c tilil cyu'n tu'n cyten xjal tuj tzalajbil. 21Aju xjal tz'aklxix mlay tzaj jun mya ba'n ti'j, atzunte xjal binchal mya ba'n ctzajel nim mya ba'n ti'j. 22Ic'un tu'n Kman ke xjal nic'al yol, pero in tzalaj cyi'j keju in che yolin axix toc. 23Aju xjal at tnabl minti' in baj tyolin ka at tojtzkibl, atzunju xjal minti' tnabl, tu'nx tyol in tyec'un ka minti' ba'n tu'n. 24Aju xjal puro sec' ti'j tak'un c'oquel te nejenel cye mastl; atzunju xjal cy'aj cucx cyjel tjak' tcawbil juntl. 25Tu'n tlaj bis, bi'x in tzaj baj tc'u'j xjal; pero tu'nju yol ba'nxix, in jaw tzalaj. 26Aju xjal tz'aklxix in ajben tu'n t-xi t-ẍaklun tuc'il, atzun ke xjal binchal mya ba'n in che el tzpet ti'j be. 27Aju xjal ba'n camban pero ka cy'aj, mlay tzyet tcanb, atzunju xjal sec' tnabl, cnetel nim tk'inumabl. 28Aju cybe ke xjal tz'aklxix atzun in pon tuj chwinklal, ex minti' camic tuj cybe.

will be added

X\