1 Atzun ke tyol Salomón jlu: Aju c'wa'lbaj at tnabl, jun tzalajbil jlu te tman; atzunju c'wa'lbaj minti' tnabl, jun bis jlu te ttxu'. 2 Aju k'inumabl mya tuj tumel in cnet, mlayx tz'ajben te xjal, atzunju xjal in bet tuj tumelxix, in clet twitz camic. 3 Aju xjal tz'aklxix, mlay cyaj tcolin Kman tu'n mi'n twa'n, atzunju xjal binchal mya ba'n, nno'c tmayo'n Kman ti'j ju in pon tc'u'j ti'j. 4 Aju xjal tc'i' tz'ak'nan, tal meba xjal c'oquel; atzunju in ak'nanxix wen, ctel tk'inumabl. 5 Aju xjal at tnabl, in jaw tchmo'n tawal oc tul tk'ij, pero aju nok in tan oc tul tk'ij twitz tawal, ctzajel tch'ixwi. 6 Aju xjal tz'aklxix, cy'iwla'n tu'n Kman Dios, atzunju xjal binchal mya ba'n, txolin ti'j tu'n mya ba'n. 7 Aju xjal tz'aklxix, cucx ctzajel na'n tbinchben ba'n; atzunju binchal mya ba'n, jurat c'ic'el tna'l cyu'n xjal. 8 Aju xjal at tnabl, in xi tniman aju xnak'tzbil in tzaj k'o'n te, pero aju in yolin ti'j yol minti' tnabl, cnajel. 9 Segurxix ta' aju in bet tuj tumelxix; atzunju xjal nne'l txalpuj ti'j be ba'n, che elel ke tbinchben mya ba'n tuj k'ancha'l. 10 Aju xjal in cub t-xmutz'i'n jun tbak' twitz tu'n tyec'unte ka mya ax toc aju in tma'n, in tzaj ti'n mya ba'n tibaj; ex aju xjal in yolin ti'j yol minti' ttxolil, cbel tcastiw. 11 Ke tyol ju xjal tz'aklxix in cyk'o'n chwinklal, atzunju xjal binchal mya ba'n, txolin ti'j tu'n mya ba'n. 12 Aju xjal nne'l tic'un tuc'il, nok k'oj in tzaj ti'n, atzunju xjal at tc'ujlalil, in cub tnajsa'n tcyakil mya ba'n in bant cyu'n xjal. 13 Aju tyol xjal at tnabl, ojtzkibl in tk'o'n, atzun teju minti' tnabl, cxel jato'n jun tze' ttzal ti'j. 14 Ke xjal at cynabl in xi cyc'u'n cyojtzkibl, atzunju cyyol ke xjal minti' cynabl in tzaj xitbil tu'n. 15 Aju tk'inumabl ju xjal k'inun, atzun colil ti'j, atzunju xjal meba, ax tmebyil in tzaj k'inte mya ba'n ti'j. 16 Aju tcambabl jun xjal tz'aklxix, atzun chwinklal, atzunju xjal mya ba'n, il in tcamba'n. 17 Aju xjal in tbi'n xnak'tzbil, in bet tuj be te chwinklal; atzunju xjal minti' in xi tbi'n, cyja' in xi' tuj be in pon tuj najen. 18 Aju xjal in k'ojl ti'j tuc'il ex in cub tewan, nic'al yol te; ex aju xjal si'mil yol minti' tnabl. 19 Aju xjal in yolin ti'j nim yol, jacu tzpet ti'j; atzunju xjal in jac'unte ttzi' at tnabl. 20 Aju tyol xjal tz'aklxix ic tten ic tza'n sak pwak tbanilxix; atzunju t-ximbetz xjal binchal mya ba'n minti'x tajben. 21 Ke tyol xjal tz'aklxix in ajben te jun xnak'tzbil cye nimcu, atzunte xjal minti' tnabl, in naj tu'nju minti' tojtzkibl. 22 Aju cy'iwbil tu'n Kman, atzun in k'onte k'inumabl ex minti' in tzaj ti'n jun bis junx tuc'il. 23 Aju xjal minti' tnabl in tzalaj ti'j oc tbinchante mya ba'n; atzunte xjal at tnabl in tzalaj ti'j ju tnabl at. 24 Aju mas in xob xjal binchal mya ba'n ti'j, axtzunju in tzaj ti'j, atzunte xjal tz'aklxix in tc'mo'n aju tajbil. 25 Ic tza'n xcyakinpaẍ in tzaj ex jurat nnic' naj, ictzun in cub naj aju binchal mya ba'n, atzunju xjal tz'aklxix cyjel ten te jumajx. 26 Ic tza'n vinagr nno'cx t-xe ke' bix in tzaj chyo'n tu'n, ex ic tza'n in xi' sib tuj kwitz, ictzun nne'la ju xjal cy'aj teju samalte te. 27 Aju xjal in niman te Kman cxel lak'e' tuj tk'ij, atzun cye ke binchal mya ba'n, c'oquel lak'e' tuj cyk'ij. 28 Aju in ayon ju xjal tz'aklxix ti'j, atzun tzul k'onte tzalajbil te, ex aju in ayon ju binchal mya ba'n ti'j, mlay tc'am. 29 In colin Kman cyi'j keju in cybincha'n ba'n, pero keju binchal mya ba'n in che naj tu'n. 30 Aju xjal tz'aklxix mlay tzic' yucun tuj tlugar, atzunju xjal binchal mya ba'n, mlayx ten twitz tx'otx'. 31 Aju xjal tz'aklxix in yolin ti'j yol at tnabl. Atzunju xjal jumajx tk'on tib tuj mya ba'n, bi'x cmayetel tu'n tyolin. 32 Aju xjal tz'aklxix in yolin ti'j yol txubtxaj tbinx; atzunte xjal binchal mya ba'n o'cx in yolin ti'j yol mya tuj tumel.
