Filemón 1

1Akine Pablo, pres kine tu'n tlaj Jesucrist. Ma tzul erman Timotey wuc'ile, cyja'tzun in xi ktz'ibane ju u'j lu teya Filemón, at-xix kc'u'je ti'ja ex junx in ak'nana kuc'ile. 2Ax icx in xi ktz'ibane te kerman Apia ex te Arquipo, aju soldad junx kuc'ile, ex cye cycyakil ocslal nno'c cychmon cyib tuj tjaya. 3Awt Kman Dios tuc'ix Kajaw Jesucrist che tzaj k'onte xtalbil cyeye ex tu'n tke'xix cyc'u'je. 4Cucx in xi nk'o'ne chjonte te Dios, aju Dios in chin ajbene te, in xi nk'o'ne chjonte ti'ja Filemón, ex in tzaj nna'ne tuj nna'j Diose, 5porque in nbi'ne at tc'ujlalila ti'j Kajaw Jesús, ex cyi'j cycyakil ocslal, ex at tocslabla ti'j Kajaw Jesús. 6Chin cubsale twitz Dios cyi'j keju ma che ocslan tu'nju ma txi tchic'ba'na tocslabla cye; chin cubsale cyi'j tu'n telxix cynic' ti'j t-xtalbil Dios ma tzaj tk'o'n ke nok tu'n Jesucrist. 7Porque tu'nju tc'ujlalila erman, ma ko tzalaje nim ex ma ke'xix kc'u'je, porque ma k'ukbanjtz cyc'u'j ocslal tu'na. 8Cyja'tzun masque at woclene tu'n Crist tu'n t-xi nma'ne alcye tu'n tbinchanteya, 9pero tu'nju at nc'ujlalile ti'ja, mas ba'n chin cubsale twitza, porque akine Pablo tij xjal kine, ex presin kine ja'lo tu'n tlaj Jesucrist. 10Chin cubsale twitza ti'j nc'wa'le Onésimo, aju ma tz'oc te nc'wa'le tuj ocslabl tuj presbil weye. 11Ojtxi minti'xix ajben Onésimo teya, atzun ja'lo at tajben teya ax icx weye. 12C'ajeltzun nsama'ne tuc'ila; c'momtzuna mer ic tza'n ax kine oc chin tc'ma'ya. 13Ma wajbeye tu'n tten Onésimo junx wuc'ile, tu'n tajben weye te t-xela tuj presbil weye, porque pres kine tu'n tlaj tkanil colbil, 14pero mi'n waje tu'n nbinchanteye ka na'nxtok nyoline tuc'ila, ex mi'n waje tu'n ttzaj tk'o'na jun xtalbil weye lajwers, nok o'cx waje tu'n ttzaj tk'o'na tu'n tcyakil tc'u'ja. 15Balo tu'n jlu el tpa'n tib Onésimo ti'ja cab k'ij, tu'n tajtl tuc'ila tu'n tten te jumajx. 16Oc tpontl tuc'ila, mlay tentl ic tza'n jun majen tc'ayin tib, nok o'cx tu'n tten ic tza'n jun erman c'ujla'n tu'na. Porque mas at toclen ja'lo twitz jun majen. At-xix nc'u'je ti'j, pero atzun teya mas at-xix tc'u'ja ti'j. Mya nok o'cx at tc'u'ja ti'j Onésimo tu'nju tmajena, pero icx tu'nju ocslal ti'j Kajaw. 17Katzun tuc'ila kine tuj twitza, c'moma Onésimo ic tza'n ax kine. 18Ex ka at mya ba'n ma tbincha teya, ex ka at tc'as tuc'ila, k'ontza tuj ncwente. 19Akine Pablo ma cub ntz'ibane jlu tu'n nk'abe, akine chin chjolte c'as; masque icx teya nim tc'asa wuc'ile, jacu bant tu'n t-xi nma'ne tu'n toca te nmajene, pero mlay txi nma'ne. 20Cyja'tzun erman, cuchiwt tu'n tbinchanteya jun xtalbil weye, tu'nju ocslala ti'j Kajaw; k'ukbama nc'u'je tu'nju ocslal ko' ti'j Crist. 21Cyja'tzun ma txi ntz'ibane jlu teya tu'nju k'ukl nc'u'je ti'j ka cxel tnimana nyole, ex ba'n wu'ne mas oc tbincha'ya twitzju ma txi nma'ne teya. 22Ax icx at juntl tu'n t-xi nma'ne teya, binchama tten nposadiye; porque k'ukl nc'u'je ti'j Dios oc chin pole juntl maj cyuc'ile nok tu'n cyna'j Diose. 23In xi k'olbe'na tu'n Epafras, junx ta' wuc'ile tuj pres tu'n tlaj Jesucrist. 24Ax icx in xi k'olbe'na tu'n Marcos, ex tu'n Aristarco, ex tu'n Demas, ex tu'n Lucas, akeju junx in che ak'nan wuc'ile. 25Awt t-xtalbil Kajaw Jesucrist ten tuj cyanmiye. Icxwitju.

will be added

X\