Filipenses 4

1Cyja'tzun erman, che we'xixe tuj cyocslable ti'j Kajaw, akeye at nc'u'je cyi'je ex wajbile tu'n toc nque'yine cywitze, cyu'ne in chin tzalaje, ex akeye ncambable, akeye at nc'u'je cyi'je. 2Akeye erman Evodia tuc'ix erman Síntique, chin cubsale cywitze tu'n cytene junx cynable, tu'nju ocslal keye ti'j Kajaw. 3Ax icx teya wuc'il ma japun tu'na tuj ak'untl, chin cubsale teya, onina cyi'j xu'j lu, porque junx e ak'nan wuc'ile tu'n tpacbanjtz tkanil colbil, ex tuc'ix Clement ex mastl e onin wuc'ile tuj ak'untl, tz'iban cybi tuj tu'jil chwinklal. 4Cucx che tzalaje ti'j Kajaw. Cxel nma'ne juntl maj cyeye: Che tzalajxe. 5Tz'elxwit nic'baj cyi'je cyu'n cycyakil xjal ka mejor cymodiye. In lak'ex ttzaj tk'ijlalil tu'n tul Kajaw. 6Mi jun tu'n tbaj cyc'u'je ti'j; tcyakil cymanxe te Dios tuj cyna'j Diose; cykaninxe te, ax icx cyk'onxe chjonte te. 7Cyja'tzun ckebil cyc'u'je tu'n Dios; mas ma' t-xilen jlu twitz tcyakil cynabl xjal, tu'n jlu c'oquel cwentin cyanmiye ex cyximbetze, tu'nju at cymojbabl cyibe tuc'il Jesucrist. 8Ja'lotzun erman, atzun che ximane ti'j: Tcyakilju axix toc, tcyakilju ba'n tu'n tnimanjtz, tcyakilju tz'aklxix, tcyakilju sakxix, tcyakilju tbanilxix ex tcyakilju in yolinjtz ba'n ti'j. Ka at jun tbanilxix, ex ka at jun ba'n tu'n tjaw nimsa'n, atzun che ximane ti'j jlu. 9Cybinchame aju ma tz'el cycano'ne wi'je, aju ma cyc'ame weye, aju ma cybiye weye, ex aju ma cyile wi'je; atzun jlu cybinchame, ex ctel Dios cyuc'ile, aju k'ukbalte cyc'u'je. 10Nim ma chin tzalaje ti'j Kajaw, porque ma cub cyximane tu'n cyonine juntl maj wi'je. Cucx in che ximane wi'je, pero minti' cnet jun tumel cyu'ne tu'n cyonine wi'je. 11Mya tu'nju atx taj weye ma txi nma'ne jlu, porque ma chin nak'ete tu'n ntzalaje ka at weye ex ka minti'. 12Ojtzki'maj wu'ne ka tu'n ntene tuj mebayil ex ka tu'n tten nim weye; tuj tcyakil xnak'tza'maj kine, ka tu'n tnoj nc'u'je ex ka tu'n tic'x we'yaj wu'ne, ka tu'n ntene nim at weye, ex ka tu'n ntene minti' at weye. 13Tcyakil jacu tzic'x wu'ne ex jacu bant wu'ne, porque ate Crist in k'onte wipumale. 14Pero ba'n ma cybinchaye tu'nju ma che onine wuc'ile tuj yajbil weye. 15Ax icx bi'n cyu'ne, akeye aj Filipos, tej t-xe't wu'ne tu'n npacbane ti'j tkanil colbil, ex tej wetze tuj tx'otx' Macedonia, minti' tzaj cyk'o'n ocslal tuj juntl tnam jun oyaj weye, o'cx akeye tzaj cyk'o'ne jun oyaj te t-xel ju xtalbil o cyc'ame weye. 16Porque tej ntene tuj tnam Tesalónica, tzaj cysama'ne jun oyaj cab ox maj tu'n tajben weye. 17Myatzun toc nc'u'je ti'j tu'n nc'monteye jun oyaj, pero aju wajbile tu'n cyc'monteye nimxix t-xelju ma tzaj cyk'o'ne. 18Tcyakil at weye ex sobr at weye, minti' atx taj weye, porque ma nc'ame te Epafrodito aju oyaj tzaj cysama'ne; aju oyaj ma tzaj cysama'ne ic tten ic tza'n storac at tc'oc'jal, ex ic tten ic tza'n jun oyaj in tc'mo'n Dios ex in tzalaj ti'j. 19Tcyakilju atx taj cyeye ctzajel tk'o'n Dios cyeye, aju Dios in chin ajbene te; nok tu'n Jesucrist ctzajel tk'o'n, porque nimxix tk'inumabl Dios at ex tbanilxix. 20Nimanxwit tbi Kman Dios tuj tcyakil tabk'iyil te jumajx. Icxwitju. 21Cyk'onxe nk'olbeble cye cycyakil ocslal ti'j Jesucrist. Ke erman ate' wuc'ile in che'x k'olbe'ne cyu'n. 22In che'x k'olbe'ne cyu'n cycyakil ocslal ex cyu'n keju in che ajben tuj tja gobierni. 23Aju t-xtalbil Kajaw Jesucrist tenwt cyuc'ile cycyakile. Icxwitju.

will be added

X\