Filipenses 2

1Cyja'tzun, ka ma tzaj k'o'n cynable tu'n Crist, ex ka ma k'ukbanjtz cyc'u'je tu'n tc'ujlalil, ex ka at cymojbabl cyibe tuc'il Xewbaj Xjan, ex ka at cyc'u'je ti'j juntl ex ka in k'ak'an cyc'u'je ti'j juntl, 2cytzalajsame nc'u'je, junxwit cynable, junxwit cyc'ujlalile cyxolxe, junxwit cyximbetze, mojl tak'pon cyu'ne cycyakile. 3Mi'n cybinchaye jun ti'xti tuc'il k'oj, ex mi'n jaw cyniman cyibe, nok o'cx tu'n tcub cymansin cyibe, teyle junjun ba'n tu'n t-ximan cyi'j txkantl ocslal ka at mas cyoclen twitz. 4Teyle junjun mya nok o'cx tu'n toc tk'o'n tcwent ti'j aju at tajben te, ax icx tu'n toc tk'o'n tcwent ti'j aju at tajben cye mastl. 5Junxwit cyximbetze ic tza'n t-ximbetz Jesucrist. 6Ate Crist junx ta' ic tza'n Dios, pero minti' cub t-ximan tu'n mi'n tcyaj ttzokpi'n toclen ic tza'n Dios, 7nok o'cx cyaj ttzokpi'n toclen, oc tk'on tib te majen, ex oc ic tza'n ke xjal. 8Tejtzun toc ic tza'n xjal, mas cub tmansin tib, xi tniman tajbil Dios, ex xi tk'on tib tu'n tcyim, masque atzun tu'n tcyim twitz crus. 9Cyja'tzun, mas jaw nimsa'n tu'n Dios tibaj tcyakil, ex oc tk'o'n Dios jun tbi mas ma' t-xilen twitz cybi cycyakil, 10tu'ntzun cycub ẍmeje' cycyakil c'ulul twitz Jesús oc cybinte aju tbi, tza'nx keju ate' tuj cya'j, icx keju ate' twitz tx'otx', ex keju ate' tjak'xi tx'otx'; 11ex tu'n cymante cycyakil: Ax toc ate Jesucrist Kajaw, tu'ntzun tjaw nimsa'n tbi Kman Dios. 12Cyja'tzun erman, akeye at nc'u'je cyi'je, cucx in xi cynimane nyole; ic tza'n xi cynimane tej ntene cyuc'ile, ax icx ja'lo cucx t-xi cynimane mi a'l kine cyuc'ile. Japunx cyu'ne aju in tma'n colbil cyeye, atwit tchi Dios tuj cywitze tu'n cyxobe twitz. 13Porque ate Dios in ak'nan tuj cyanmiye tu'n tten cyganiye ti'j ju tajbil ax icx tu'n cybinchanteye. 14Oc tbant nok alcyexcu cyu'ne, mi'n txi' jun cyyole ti'j juntl ex mi'n tzaj jun yol cyxole, 15tu'n cytene minti' cypaltile ex tu'n cytene minti' jun mya ba'n tuj cyximbetze, nok o'cx tu'n cyoque te tc'wa'l Dios minti' ch'in tz'il cyi'je cyxol ke xjal mya ba'n ke ex miban che bin. Ic cytene ic tza'n ke che'w in che koptz'aje cyxol xjal ate' tuj klolj. 16Cymanxe ju yol te chwinklal cye, tu'ntzun ntzalaje tuj tk'ijlalil oc tul Crist, ka mya nokx gan otok tz'oc tilil wu'ne ex mya nokx gan otok chin ak'nane. 17Masque ma chin cyime tu'n tlaj tak'un Crist, pero in chin tzalaje ti'j, porque jun oyaj jlu in xi nk'o'ne te Dios junx tuc'il ju cyoyaje. Aju cyoyaje in xi cyk'o'ne atzunju, cyajbeble te Dios nok tu'n cyocslable. Cyja'tzun junx in chin tzalaje cyuc'ile cycyakile. 18Ax icxtzun cyeye che tzalajxe ex che tenxe alegr junx wuc'ile. 19Ka ic tajbil Kajaw Jesús, ximan wu'ne tu'n t-xi nsama'n naje Timotey cyuc'ile, tu'ntzun tke' nc'u'je oc nbinteye tkanil cyi'je. 20Porque minti' juntl at wuc'ile ic tza'n te Timotey, at tc'u'j cyi'je tu'n tonin cyuc'ile. 21Porque cycyakil o'cx nno'c tilil cyu'n ti'j ju at tajben cye, ex mya ti'j ju tajbil Jesucrist. 22Porque ojtzki'n cyu'ne tza'n tten tz'ak'nan Timotey, ic tza'n jun c'wa'lbaj in ajben te tman, icxtzun ma tz'ajben Timotey wuc'ile tu'n tpacbanjtz tkanil colbil. 23Cyja'tzun ximan wu'ne tu'n t-xi nsama'ne Timotey cyuc'ile, pero nej tu'n nbinteye tza'n ta' ncawse. 24Ex k'ukl nc'u'je ti'j Kajaw, ax icx weye chin pol naje cyuc'ile. 25Pero ma cub nximane ka il ti'j tu'n t-xi nsama'ne Epafrodito cyuc'ile aju wermaniye ex in onin wuc'ile tuj ak'untl, ex soldad junx wuc'ile; atzun cysanjele ex ajbel weye ti'j ju at tajben weye. 26Porque nimxix o tajbe tu'n t-xi' que'yil cyeye cycyakile, ex nimxix tzaj tbis tu'nju otok cybiye ka otok yabt. 27Ax toc o yabt, ch'ixmi o cyim; pero tzaj k'ak'an tc'u'j Dios ti'j, mya o'cx ti'j tzaj k'ak'an tc'u'j Dios, icx wi'je, tu'ntzun mi'n ttzaj mastl nbise. 28Cyja'tzun cxel nsama'n naje, tu'ntzun cytzalaje oc cylonteye juntl maj twitz ex tu'n tel ch'in nbise. 29Cyc'momtzune tu'n tcyakil tzalajbil tu'nju ocslal ti'j Kajaw, ex cyc'ujlame keju ic cyten ic tza'n te; 30porque ch'ixmi xcyim tu'nju in ajben tuj tak'un Crist, xi toyin tib tu'n tcyim tu'n tul ti'n ju onbil weye, aju minti' tumel tu'n cyule k'ol te.

will be added

X\