ABDÍAS 1

1Atzun tkanil lu tzaj tma'n Kman Dios te Abdías cyi'j aj Edom, chi cyja': Ma kbi jun tkanil tu'n Kman, ma txi sama'n jun sanjel k'malte cyuj ke nasyon cyja': Chux keye, ko'ke k'ojlel cyi'j aj Edom, chi sanjel. Chi Kman in tma'n cyja' cye aj Edom: 2Che oquel nk'o'ne te ch'in cyoclene cyxol mastl nasyon ex che elel ic'une cyu'n. 3Tu'nx ju cynimbil cyibe ma che cub sbu'ne. Najl keye tuj tpa'xil pic ex cyjax cyjaye cywi witz, ex tu'ntzunju in cyma'ne: ¿Alcye jun jacu cub ki'j tu'n? Che chiye. 4Masque che jax lak'e'ye wen ic tza'n jun t'iw, ex masque cub cyk'o'ne cyk'u'ye cyxol ke che'w, maxtzun ma chixin che tzajel nxo'ne, chi Kman. 5Nokwit elek' keju che ul elk'alte cyi'je te konic'an, mlaylo txi cyi'n tcyakilju at cyeye; nokwit xilil twitz uva keju che ul cyi'je, jaculo cyaj cyk'o'n junjun rasim twitz uva. Pero atzun ke aj k'oj cyi'je jumajx ma che naje cyu'n. 6Akeye tiyjil Esaú, cxel k'i'n tcyakilju at cyeye. Cxel elk'a'n tcyakil cyk'inumable. 7Cycyakil ke xjal mojl cyyole cyuc'il che cbel sbu'ne cyu'n; che elex lajo'ne twitz cytx'otx'e cyu'n. Ex ajunpe ke cyamiwoye cjawil cyi'n cyib cyi'je, ex ke cyamiwoye k'ukl cyc'u'je cyi'j cbel cyk'o'n c'obil tuj cybeye. Minti' cynabl ke aj Edom. 8Chi Kman in tma'n: Oc tcub cycastiw ke aj Edom wu'ne, che najel cycyakil ke xjal at cynabl, akeju ate' cyxol, ex c'elel wi'ne cyojtzkibl xjal, akeju ate' tuj tiwitz tx'otx' cye tiyjil Esaú. 9Ke xinak aj Temán, akeju cyuw cyc'u'j tuj k'oj, che tzajel lu'lun tu'n cyxobil, ex keju ate' tuj tiwitz tx'otx' cye tiyjil Esaú, mi jun cyjel ank'in. 10Cbel cych'ixwiye ex jumajx che najele tu'nju el cyelk'a'ne aju at cye tiyjil Jacob, aju cyermaniye, ex cub cybyo'ne. 11Tej tetz cyi'n aj k'oj aju k'inumabl at tuj tnam, tej cyocx pa'n ke tlamel tnam Jerusalén cyu'n ke soldad tzajni ke tuj juntl tnam, atzun cyeye nok xi cyque'yine. Tej tjaw cyi'n swert ti'j tu'n tel cyi'n aju at cye aj Jerusalén ex tej t-xi cyi'n cyk'inumabl, ax icxtzun cybinchaye ic tza'n cybincha ke aj k'oj. 12Miwt e jaw tzalaje tej ttzaj mya ba'n cyibaj cyermaniye akeju aj Judá; miwt e jaw tzalaje tej tcyile tej cynaj, ex miwt e xmayine cyi'j tej ttzaj nim bis cyi'j. 13Miwt e ocxe tuj tnam etzan wu'ne tej ttzaj yajbil cyi'j ex miwt e tzalaje cyi'j tej ttzaj xitbil cyibaj ex tej ttzaj ju mya ba'n cyibaj, ex miwt xi cyelk'a'ne cyk'inumabl tej ttzaj xitbil cyibaj. 14Miwt e cub we'ye cyuj tcrusil be tu'n tcub cybyo'ne ke xjal in che etz tzokpaj, ex miwt xi cyk'o'ne ke xjal in che el ok tuj cyk'ab aj k'oj tej ttzaj xitbil cyibaj. 15Ma tzul lak'e' tk'ijlalil tu'n tul Kman tu'n cyoc cycyakil nasyon tuj xjel tu'n. Akeye aj Edom, aju ma cybinchaye cyi'j txkantl, atzun cbantel cyi'je, oc cyc'ma'ye aju chojbil cyeye ti'j cybinchbene mya ba'n. 16Akeye aj Israel, como puro c'a aju tcu'x tuj copa, aju xi cyc'a'ne twi' ju witz xjan etzan wu'ne, axtzun c'a aju tcu'x tuj copa cxel k'ot cye txkantl nasyon, aju cucx cxel cyc'a'n ex che najel te jumajx. 17Pero at junjun che cletel twi witz Sión ex c'oquel ju witz lu te jun lugar xjan. Ake tiyjil Jacob ctzyetel juntl maj cyu'n aju tx'otx' etzan cyu'n nej. 18Ke tiyjil Jacob ic che oquel ic tza'n k'ak', ex ke tiyjil José ic che oquel ic tza'n tkan k'ak', ex atzun ke tiyjil Esaú ic che oquel ic tza'n tkan triw jurat in baj tz'e'y. Jumajx che bajel tz'e'y tu'n k'ak' lu, mi jun tiyjil Esaú cyjel clet. Akine Dios in chin k'mante jlu. 19Ke aj Israel ate' tuj tx'otx' Néguev ctzyetel aju tiwitz tx'otx' cyu'n, aju cytx'otx' tiyjil Esaú, ex keju najl tuj chk'ajlaj t-xe witz ctzyetel cytx'otx' aj Filistey cyu'n. Ax icx ctzyetel cytx'otx' aj Efraín cyu'n, tuc'ix cytx'otx' aj Samaria ex atzun ke aj Benjamín ctzyetel cytx'otx' aj Galaad cyu'n. 20Atzun txkantl aj Israel, akeju otok che pon k'in cyuj mastl nasyon, ctzyetel cytx'otx' aj Canaán cyu'n tu'n tpon baj max tuj tnam Sarepta, ex ke aj Jerusalén, akeju otok che pon k'in tuj tnam Sefarad, che tzyetel ke tnam ate' tuj tx'otx' Néguev cyu'n. 21Ke xjal otok che camban oc che jawix twi witz Sión tu'n tcub cyk'o'n cysentens ke xjal najl tuj tiwitz tx'otx' cye tiyjil Esaú ex a Kman ccawil tibaj tcyakil.

will be added

X\