NÚMEROS 9

1Tuj tnejel xjaw te tcabin abk'i cyetzlen aj Israel tuj Ejipt, tzaj yolin Kman tuc'il Moisés tuj tzkij tx'otx' t-xe witz Sinaí ex tma: 2Il ti'j tu'n tcub cyic'sa'n aj Israel Xjan K'ij tujxix tk'ijlalil. 3Ctzyetel cyu'n te kale tuj cyajlaj tajlal xjaw lu, ic tza'nx banimaj ti'j, ex tu'n tbant tcyakil ti'j ic tza'nx in cyma'n ke xnak'tzbil ex ke ley o txi nma'ne teya, chi Kman te Moisés. 4Xitzun tma'n Moisés cye aj Israel tu'n tcub cyic'sa'n Xjan K'ij, 5ex cub cyic'sa'n te kale tuj cyajlaj tajlal tnejel xjaw, tuj tzkij tx'otx' t-xe witz Sinaí. Binchet tcyakil cyu'n ic tza'nx otok tma Kman te Moisés. 6Pero ate'tok junjun xinak otok baj cytz'ilsan cyib tu'nju otok tz'oc cymaco'n jun cyimni, ex cyja'tzun minti' tumel tu'n tcub cyic'san Xjan K'ij tujx k'ij lu. E je'xtzun tuc'il Moisés ex Aarón tujx k'ij lu, 7ex xi cyma'n cyja': —Tz'il ko'ye tu'nju ma tz'oc kmaco'ne jun cyimni. ¿Maj mi'ntzun txi kk'o'ne koyaje te Kman tuj k'ij lu junx cyuc'il mastl aj Israel? 8Atzunte Moisés xi ttzak'we'n: —Che ayone nej alcye ctzajel tma'n Kman cyi'je. 9Tzaj yolin Kman tuc'il Moisés ex tma: 10K'manxa cye aj Israel jlu: Ka at junjun cyeye ex ka junjun cyiyjile, tz'il ate' tu'nju otok tz'oc cymaco'n jun cyimni, ex ka mi a'l tu'nju ate' tuj jun cybe najchak, 11ba'n tu'n tcub cyic'sa'n Xjan K'ij te kale tuj tcyajlajin tajlal tcabin xjaw. Cxel cychyo'n tal tman ẍne'l tuc'il itzaj c'a ex pan minti' t-samel tuj tu'n tjaw mal tc'u'j, 12ex mi'n cyaj cyk'o'n ch'in chibj te juntl k'ij ex mi jun tbakil cbel cytokin. Cbel cyic'sa'n Xjan K'ij lu ic tza'nx tcyakil ley o txi nma'ne. 13Katzun at jun xjal mya ttz'ilsan tib ex ax ta' tuj tja ex minti' ma cub tic'sa'n Xjan K'ij, c'elex lajet xjal lu, tu'ntzun mi'n ttentl cyxol t-xjalil, tu'nju minti' otok tzaj tk'o'n toyaj weye tuj k'ij banimaj ti'j. At til xjal ti'j jlu. 14Katzun at jun stranjer xjal najl cyxole taj tu'n tcub tic'sa'n Xjan K'ij te nimbil weye, il ti'j tu'n tcub tic'sa'n ic tza'nx tcyakil xnak'tzbil ex ley o txi nma'ne. Ax ley ctel cyxol stranjer xjal ic tza'nx cye aj Israel. 15Tuj k'ij tej tjaw bincha'n ja xbalun te mojbabl tibil, bi'x o cub ten muj tlugaril jatum tcub cax c'ubl tley Dios. Oc koc yupj, aju muj nno'c que'yin ic tza'n k'ak', ex cucx tten oc tjawil k'ij. 16Cucx o ten tcyakil maj icju; te k'ijl in cub ten muj tibaj tja Dios, ex te konic'an nno'c que'yin muj ic tza'n k'ak'. 17Ex octzun tjaw lak'e' muj tibaj ja xbalun te mojbabl tibil in che ic'tzun lak'e' aj Israel, ex jatum in we' muj, axtzun in che cub ten aj Israel. 18Ocxi ttzaj tma'n Kman tu'n cyic' lak'e' aj Israel, in che ic'tzun, ex oc ttzaj tma'n jatum tu'n cywe', axtzun in che we'. Nok jte' k'ij in cub ten muj tibaj ja xbalun te mojbabl tibil, ax icx cye aj Israel axtzun in che cub ten. 19Ex oc twe' muj nim k'ij tibaj ja xbalun te mojbabl tibil, ax icx cye aj Israel in xi cyniman tyol Kman, ex axtzun in che cub ten. 20Ex at maj nic'xi k'ij in we' muj tibaj ja xbalun te mojbabl tibil. Ax Kman in k'mante cye tu'n cywe', ex ax in k'mante tu'n cyic' lak'e'. 21At maj o'cx jun konic'an in we' muj, atzunte prim in jaw lak'e' ex in cubtzun be cyu'n aj Israel. Ka k'ijl ex ka konic'an, oc tjaw lak'e' muj in che ic'tzun lak'e'. 22Katzun cabe k'ij, ka jun xjaw ex ka jun abk'i ma cub ten muj tibaj ja xbalun te mojbabl tibil, ax icx cye aj Israel ax in che ten ex minti' in che ic' lak'e'. Pero octzun tjaw lak'e' muj, in cubtzun be cyu'n. 23Ocxi ttzaj tma'n Kman tu'n cycub ten tuj jun lugar, axtzun in che cub ten, ex ocxi ttzaj tma'n Kman tu'n cyic' lak'e', in che ic'tzun lak'e'. Xi cyniman tyol Kman ic tza'nx otok tzaj tma'n Kman te Moisés.

will be added

X\